Read bahnar Ne 5 Bible Online

Ne 5 - bahnar bible

Ne 5

¹Kơplah noh đei kơtơ̆ng nơ̆r pơma jŏk tơtok tih lăm lu kon pơlei păng akăn lu 'nhŏng oh lu sư kơdih bơngai Juđa.

²Đei bơngai khan: Kon tơdăm kon adruh lu nhôn lơ, na lu nhôn kư̆m athei đei phe 'ba kơna gơh arih.

³Kŭm đei bơngai khan dơ̆ng: Lăm kơplah đei pơngot rơwĕt, lu nhôn pơjao chŭn mir pơgar hơmu păng hnam dơnŏ lu nhôn, wă kơ đei phe 'ba sa mơ̆n.

⁴Kŭm đei bơngai nai khan dơ̆ng; lu nhôn kư̆m đei pơjao chŭn, mir hơmu, na wă kơ đei jên ăn kơ pơtao.

⁵Akâu akar lu nhôn kư̆m nhen akâu akar lu 'nhŏng oh lu nhôn mơ̆n, kon tơdăm lu nhôn kư̆m nhen kon tơdăm lu sư mơ̆n; na dang ei lu nhôn rôp kon tơdăm păng kon adruh lu nhôn pơm đĭch hă păng kư̆m đei boih kon adruh lu nhôn pơm đĭch boih, mă tơpă lu nhôn pă đei gơh wă huai iŏk dơ̆ng; yua kơ chŭn mir păng pơgar hơmu lu nhôn đĭ tơ lu đe nai iŏk boih.

⁶Kơplah inh kơtơ̆ng dôm lu nơ̆r âu păng nơ̆r krao ôr lu sư, na inh blĕk dêh.

⁷Inh kư̆m hiơ̆k gah tơdrong noh, 'maih chrih kơ lu bơngai mơdrŏng păng lu bơngai pơm kuan tih: Inh khan: Lu iĕm chă jên kiĕng đơ̆ng lu 'nhŏng oh bơ̆n! Inh pơtơm akŭm minh khŭl lơ wă jet lu sư.

⁸Khan thoi âu: “Kiơ̆ kơ lu bơ̆n gơh đei huai boih 'nhŏng oh lu bơ̆n, bơngai Juđa mă đe tĕch tơ lu adrĕch nai, na dang ei iĕm wă 'maih tĕch lu 'nhŏng oh bơ̆n dơ̆ng hă? Na lu sư wă tĕch tơ lu bơ̆n dơ̆ng hă?” Lu sư ngăn hreh ưh pă gơh wă pơma kiơ dơ̆ng.

⁹Inh khan dơ̆ng: “Tơdrong mă lu iĕm pơm noh ưh kơ 'lơ̆ng ôh hăm trŏ lu iĕm arih sa kiơ̆ trong băt hli yom kơ Kră Yang 'Bok Kei-Dei hli kơ lu bơngai ayăt che bơle hiĕk ăr kơ bơ̆n.

¹⁰Inh, lu 'nhŏng oh inh păng lu đĭch đam inh kư̆m đei asong ăn kơ lu sư mưng jên păng 'ba, mă-lei inh apinh lu iĕm athei 'nĕ kơ iŏk jên kiĕng.

¹¹Inh apinh lu iĕm năr âu hloi, athei pơdrâu bĕ kơ lu sư chŭn mir, pơgar hơmu, pơgar ôliwơ păng hnam lu sư, kư̆m pơdrâu minh lăm mơjĭt gah jên, phe 'ba, sik păng đak rơmă, mă lu iĕm đei pơgŏ đơ̆ng lu sư.

¹²Lu sư khan. “Lu nhôn gô pơdrâu đĭ păng kư̆m ưh pă wă apinh kiơ đơ̆ng lu sư dơ̆ng; lu nhôn gô pơm trŏ thoi nơ̆r ih khan, inh krao lu 'bok soi tơm wă kơ lu sư drơ̆ng kiơ̆ thoi nơ̆r lu sư pơkă noh.

¹³Inh kư̆m tơtuh tơdrơi ao inh na khan: Tơdah bơngai bu ưh kơ wei răk pơm kiơ̆ nơ̆r pơkă âu, na apinh Kră Yang 'Bok Kei-Dei gô tơtuh lê̆ hnam, mŭk drăm bơngai ưh kơ pơm kiơ̆ nơ̆r pơkă 'nâu păng tơtuh kơ bơngai noh jing hoh-hoy! Tơpôl lơ kư̆m wang drơ̆ng: “A-men!” Lu sư ư-ang kơ Kră Yang, lu bơngai ei pơm kiơ̆ thoi nơ̆r đei pơkă.

¹⁴Hloh kơ noh dơ̆ng, đơ̆ng năr inh pơm kră wei-lăng lăm dêh Juđa wă khan đơ̆ng sơnăm mă 'bar-jĭt truh tơ sơnăm pêng-jĭt 'bar chăl pơtao Artaserses, jô̆ đĭ 'bar-jĭt 'bar sơnăm inh păng lu 'nhŏng oh jang hơdai inh ưh kơ đei sa jên dah tơmam đơ̆ng đe apah inh pơm yŏng ôh.

¹⁵Mă-lei lu kră wei-lăng adrol kơ inh pơgŏ kon pơlei tơgŭm tơmam sa păng sik, 'nguaih kơ puăn-jĭt sêikơl jên hu; lu bơngai đĭch đam kiơ̆ wei-lăng sư kư̆m wang chă apinh đơ̆ng kon pơlei đơ̆ng, mă-lei gah inh ưh kơ pơm thoi noh ôh; yua kơ hli yom kơ Kră Yang 'Bok Kei-Dei.

¹⁶Inh kư̆m bơwei kơjăp lăm tơdrong jang man hơmet ming dur 'nâu kư̆m ưh kơ đei răt minh hlak chŭn ayơ păng wă kơ lu đĭch đam inh akŭm pơpôi băl bơ̆jang tơ noh.

¹⁷Tơ anih gơ'bang inh sŏng sa kư̆m đei minh-hrĕng pơđăm-jĭt 'nu bơngai Juđa păng kuan tih, ưh kơ đei jô̆ 'nguaih kơ bơngai tăp dăr kơ nhôn năm ngôi.

¹⁸Hơmet tơmam sa rim năr minh pôm rơmo tơdrâu tŏ triu đei rơih iŏk; kư̆m hơmet lu 'nhĕm iĕr, bip, kiơ̆ kơ lăm mơjĭt năr đei hơmet tôm kơ tơmam đei sik lơ. Mă-lei ră inh ưh kơ wă ôh apinh tơmam sa kơ inh kră wei-lăng păng kơnh tơpŭ pơm anat kơ kon pơlei pơla đĕch.

¹⁹Ơ Kră Yang 'Bok Kei-Dei inh ơi! Apinh Ih 'blŏk kơ inh dôm tơdrong 'lơ̆ng inh đei pơm boih kơ lu kon pơlei âu.