Read bahnar Ne 8 Bible Online

Ne 8 - bahnar bible

Ne 8

¹Kon pơlei pơgơ̆p akŭm băl jing thoi minh 'nu bơngai, tơ lăm pơlei tih 'bơ̆t anăp 'măng jang Đak lu sư pơma hăm Esơra thây bơtho, apinh sư chĕp sơ̆p hla bơar khôi juăt Môis mă đơ̆ng Kră Yang đei bơtho ăn kơ Isơrael.

²Năr mă mônh khei tơpơh, Esơra 'bok soi chĕp ba sơ̆p hla bơar khôi juăt truh 'bơ̆t anăp kon pơlei, drŏ-nglo păng drŏ-kăn hăm đĭ-đăng lu bơngai mơ̆ng păng hlôh.

³Sư dơ̆ng tơ kơphô̆ 'bơ̆t anăp 'măng jang Đak, đŏk lăm sơ̆p hla bơar ei đơ̆ng pơgê hrôih truh tơ 'năr dơ̆ng, đei lu drŏ-nglo păng drŏ-kăn hăm đĭ lu bơngai mơ̆ng gơh hlôh. Đĭ-đăng kon pơlei pơla mơ̆ng đŏk sơ̆p hla bơar khôi juăt.

⁴Thây bơtho khôi juăt Esơra dơ̆ng tơ kơpal hơdrơ̆l đe pơm păng 'long; kơplah noh Matithia, Sêma, Anaia, Uri, Hilkia păng Masêia, dơ̆ng gah 'ma sư; gah 'ngiĕo sư đei Pêđaia, Misael, Malkija, Hasum, Hasbađana, Sachari păng Mêsulam.

⁵Esơra pơih sơ̆p hla bơar 'bơ̆t anăp đĭ-đăng kon pơlei; sư dơ̆ng tơ anih kơjung hloh kơplah sư pơih sơ̆p hla bơar, na kon pơlei iung dang dơ̆ng đĭ.

⁶Esơra bơnê ư-ang kơ Kră Yang 'Bok Kei-Dei Tih hloh, na đĭ-đăng kon pơlei yơ̆r ti na tơl khan A-men; A-men! Đơ̆ng noh kŭp kơ̆l drap muh măt tơ teh kơkuh kơ Kră Yang.

⁷Kŭm đei Jêsua, Bani, Sêrêbia, Jamin, Akup, Sabêthai, Hôđia, Masêja, Kêlita, Asaria, Jôsabat, Hanan, Pêlaia păng bơngai Lêwi, kư̆m tơblang ăn kơ kon pơlei hlôh khôi juăt; păng lu kon pơlei dơ̆ng kơtă anih lu sư.

⁸Sư đŏk hơđăl lăm sơ̆p hla bơar khôi juăt Kră Yang 'Bok Kei-Dei, đơ̆ng noh tơblang, tơgŭm bơngai mơ̆ng gơh hlôh nơ̆r sư đŏk.

⁹Nêhêmi kră pơgơ̆r, Esơra 'bok soi păng pơm thây bơtho khôi juăt, lu bơngai Lêwi mă bơtho kon pơlei, kư̆m pơma khan kơ đĭ-đăng Isơrael thoi âu! 'Năr 'nâu jơ̆ 'lơ̆ng rơgoh ăn kơ Kră Yang 'Bok Kei-Dei lu iĕm; 'nĕ kơ sơ'ngon, kư̆m 'nĕ kơ nhơ̆m hmoi, yua kơ kon pơlei nhơ̆m kơplah lu sư kơtơ̆ng đŏk dôm lu nơ̆r khôi juăt.

¹⁰Nêhêmi pơma khan kơ lu sư thoi âu: Năm sa bĕ tơmam kiơ bek, huch nhă bĕ sik hơmu 'ngam păng tơgŭm lu bơngai ưh kơ đei hơmet sa tơmam kiơ; yua kơ 'năr 'nâu jơ̆ năr 'lơ̆ng rơgoh, 'măn kơ Kră Yang lu bơ̆n. 'Nĕ kơ sơ'ngon, yua kơ tơdrong hiôk chơt đơ̆ng Kră Yang pơm kơ jơhngơ̆m lu iĕm pran.

¹¹Thoi noh bơngai Lêwi tơgŭm kon pơlei gơh hiôk hơđơ̆ng, khan: Oei hreh bĕ, yua kơ 'năr 'nâu jơ̆ năr 'lơ̆ng rơgoh, 'nĕ kơ sơ'ngon.

¹²Đĭ-đăng kon pơlei năm sŏng sa păng huch nhă păng tơgŭm ăn tơmam sa pơm tơdrong hiôk chơt tih; yua kơ lu sư đei hlôh 'bôh nhen dôm lu nơ̆r đei bơtho boih kơ lu sư.

¹³Hlôi kơ năr mă 'bar, lu kră kơdră lăm hnam 'bă kơ đĭ-đăng kon pơlei, lu 'bok soi păng bơngai Lêwi, năm akŭm tơ Esơra, bơngai bơtho khôi juăt năm mơ̆ng wă pơhrăm iŏk dôm lu nơ̆r lăm khôi juăt.

¹⁴Lu sư đei 'bôh chih lăm khôi juăt; Kră Yang tơtă kơ Môis khan kơ kon pơlei Isơrael athei oei lăm hnam bơsŭn kơplah pơm giĕng et sa lăm khei tơpơh

¹⁵păng wă kơ lu sư athei năm ră roi lăm rim pơlei păng tơ Jêrusalem kơtơ̆ng: Năm bĕ tơ pơlei groi kông gơ̆ ba lu dơng 'long ôliwơ păng 'long ôliwơ bri, lu dơng 'long gơsing păng lu dơng 'long roh, đei hơmŭl hla lơ wă pơm bơsŭn, thoi đei chih boih.

¹⁶Kon pơlei năm na brŏk chĕp ba lu hla ei, rim 'nu pơm bơsŭn lu sư pơyơ̆l kơpal bơbŭng bơsŭn lu sư păng tơ cham lu sư kơdih, tơ lăm cham kơdeng hnam Kră Yang 'Bok Kei-Dei, tơ anih cham 'măng jang Đak păng tơ cham să 'măng jang Êphraim.

¹⁷Kon pơlei khŭl akŭm lu bơngai đơ̆ng pơm bơnă gơh wih brŏk pơm bơsŭn păng oei tơ noh. Yua kơ đơ̆ng chăl Jôsuê kon drŏ-nglo Nun, truh tơ năr noh, kon pơlei Isơrael tam mă biơh pơm et sa tih thoi noh, đei tơdrong hiôk chơt tih dêh.

¹⁸Rim năr, đơ̆ng năr blŭng-a truh tơ năr tuch-luch, sư đŏk lăm sơ̆p hla bơar khôi juăt Kră Yang 'Bok Kei-Dei. Lu sư pơm giĕng sŏng sa lăm tơpơh năr; truh năr mă tơhngam đei akŭm pơm giĕng tih, pơm kiơ̆ thoi đei tơtă boih.