Read bahnar Ne 9 Bible Online

Ne 9 - bahnar bible

Ne 9

¹Năr 'bar-jĭt puăn lăm khei noh, kon pơlei Isơrael akŭm ơ̆t kơ sŏng sa asu 'bi păng pung 'mui teh tơ kơ̆l lu sư.

²Adrĕch Isơrael tơklah đơ̆ng lu bơngai tơmoi, iung tơbral tơdrong yoch kơdih păng tơdrong kơnê̆ đơ̆ng 'bok lu sư.

³Lu sư iung dơ̆ng kơtă anih, đŏk lăm sơ̆p hla bơar khôi juăt Kră Yang 'Bok Kei-Dei lu sư kơdih đunh dang minh lăm puăn lăm năr noh, minh lăm puăn dơ̆ng, lu sư tơbral tơdrong yoch păng kơkuh kơ Kră Yang 'Bok Kei-Dei lu sư.

⁴Jêsua, Bani, Katmiêh, Sêbania, Buni, Sêrêbia, Bani păng Kênani, iung dơ̆ng tơ kơpal hơdrơ̆l bơngai Lêwi păng ôr 'bơ̆r re krao apinh Kră Yang 'Bok Kei-Dei sư kơdih.

⁵Kơplah noh lu bơngai Lêwi, Jêsua, Katmiêh, Bani, Hasapneia, Sêrêbia, Hôđia, Sêbania păng Pêtahia khan: Iung bơnê ư-ang bĕ kơ Kră Yang 'Bok Kei-Dei lu iĕm, Kră Yang đei ling-lang dang ei dĭng truh tơ ning-mônh. Trŏ kơkuh bơnê Anăn 'lơ̆ng rŏ Sư, kơjung hloh kơ tơdrong kơkuh păng nơ̆r bơnê.

⁶Ơi! Minh 'nu Kră Yang đĕch, ưh kơ đei 'bar nai. Ih boih Kră Yang pơjing kơ lu tăl plĕnh păng lu hơtăl plĕnh hăm lu linh jang 'lơ̆ng kơpal plĕnh, kơtuăl teh păng lu tơmam kơpal teh, đak dơsĭ păng dôm lu kon sem brem lăm noh; Ih wei rong lu tơmam noh păng dôm lu linh kơpal plĕnh kư̆m kơkuh, pơyom kơ Ih.

⁷Ơ! Kră Yang Ih Kră Yang 'Bok Kei-Dei mă đei rơih iŏk Abram, chông sư lĕch đơ̆ng Ur kon pơlei Kalđê păng krao anăn sư Abraham.

⁸Kră Yang 'bôh boih jơhngơ̆m sư tơpăt tơnăp 'bơ̆t anăp Ih păng Ih pơgơ̆p hăm sư, ăn kơ adrĕch adrung sư char đe Kanaan, kon pơlei Hêtit, kon pơlei Amôrit, kon pơlei Phêrêsit, kon pơlei Jêbus păng kon pơlei Girgasit păng pơsĭt 'blep trŏ boih thoi nơ̆r Ih pơkă, yua kơ Ih tơpăt hơnơ̆ng.

⁹Ih 'bôh boih tơdrong pơmat-tat lu 'bok nhôn lăm dêh Êyiptơ, đei kơtơ̆ng boih nơ̆r lu sư krao ôr 'bơ̆t đak dơsĭ 'brê.

¹⁰Pơm boih tơdrong mơsêh hlĭch păng tơdrong hlĭch chrơp wă blah Pharaôn, hăm lu đĭch đam sư păng kon pơlei pơla lăm teh đak sư; yua kơ Ih băt: Lu sư pơgŏ pơjuă pơđep 'bok lu nhôn kơnê̆ dêh, đe oei ang truh tơ dang ei.

¹¹Ih tơklah lê̆ đak dơsĭ 'bơ̆t anăp lu sư. Lu sư yak tŏk-bŏk đak dơsĭ hlôi thoi nơnăm kơpal teh hrĕng kro, bĕ lu bơngai druh, Ih klơ̆m lê̆ lu sư tơ sơlŭng jrŭ, nhen thoi klơ̆m tơmo lăm đak tih.

¹²Kơ'năr Ih yua hơmơ̆l chông anhăk lu sư păng kơmăng Ih yua jrăng ŭnh, wă pơchrang hơdah kơ lu sư yak năm rok trong.

¹³Ih kư̆m jur tơ kơpal kông Sinai, pơma hăm lu sư đơ̆ng kơpal plĕnh, tơjur ăn kơ lu sư dôm tơdrong trŏ, khôi juăt tơpăt 'lơ̆ng, tơdrong tơtă sĭt.

¹⁴Ih tơbăt kơ lu sư năr Sa'bat năr 'lơ̆ng rơgoh đơ̆ng Ih, yua Môis đĭch đam Ih, bơtho kơ lu sư dôm tơdrong tơtă tơdrong rơgoh 'lơ̆ng păng khôi juăt.

¹⁵Đơ̆ng kơpal plĕnh Ih tơjur ăn 'bĕng sa wă huay kơ pơngot, pơm kơ tơmo đei đak lĕch ro ăn kơ lu sư nhă, pơkă kơ lu sư mơ̆t iŏk asong dêh char mă Ih wă ăn kơ lu sư.

¹⁶Mă-lei 'bok lu nhôn pơang arăng kơ̆l, ưh kơ mơ̆ng dôm tơdrong Ih tơtă.

¹⁷Lu sư ưh kơ chu kiơ̆ păng ưh kơ 'blŏk dôm tơdrong mơsêh mơyang Ih đei pơm boih tŏk-bŏk lu sư; mă-lei lu sư arăng kơ̆l, lăm tơdrong lu sư pơm kơchu rơih chă minh 'nu bơngai pơm yŏng wă chông hơlơ̆k brŏk tơ dêh char Êyiptơ dơ̆ng mă đêl lu sư pơm đĭch. Mă-lei Ih boih Kră Yang 'Bok Kei-Dei huay kơ jô̆ yo băt kơ 'mêm mơnat, hiơ̆ kơ hil păng 'bĕnh hăm tơdrong 'mêm mơnat, Ih ưh kơ achăng lê̆ lu sư ôh.

¹⁸Mă khan lu sư man minh pôm rup kon rơmo na khan: 'Nâu boih yang mă chông anhăk lu iĕm lĕch đơ̆ng dêh Êyiptơ păng tơblĕk Ih dêh tơpă.

¹⁹Mă-lei Ih yua tơdrong Ih 'mêm, ưh kơ đei achăng lê̆ lu sư lăm char glă, jrăng hơmơ̆l chông anhăk rok trong kơ'năr, ưh kơ weh đơ̆ng lu sư ôh, kơmăng jrăng ŭnh pơchrang hơdah păng tơ'bôh trong kơ lu sư yak kiơ̆.

²⁰Ih ăn boih kơ lu sư yang Bơhngol 'lơ̆ng tơpăt Ih wă bơtho tơ'bôh ăn kơ lu sư, kư̆m ưh kơ sơngah mana kơ 'bơ̆r lu sư sa păng đak nhă kơ lu sư rơhing.

²¹Tơpă, Ih wei rong lu sư puăn-jĭt sơnăm lăm char glă; lu sư huay kơ lah kiơ ôh; hơbĕn ao lu sư kư̆m huay kơ so hiah păng jơ̆ng lu sư kư̆m huay kơ pơ'ngeh.

²²Đơ̆ng noh Ih kư̆m ăn kơ lu sư đei teh đak păng lu kon pơlei pơla, Ih klah asong kơ lu sư teh đak oei, lu sư iŏk đơ̆ng teh đak Sihôn pơtao pơlei Hesbôn păng đơ̆ng teh đak Ok pơtao char Basan.

²³Ih kư̆m thim ăn đei kon sâu hrôh ngôh lơ thoi lu sơnglŏng tơ kơpal plĕnh, ba lu sư mơ̆t tơ dêh mă Ih đei pơkă hăm 'bok lu sư sơ̆: Lu iĕm gô mơ̆t tơ noh na iŏk asong băl dêh noh.

²⁴Thoi noh kon sâu lu sư mơ̆t păng iŏk dêh char, Ih pơlung lu kon pơlei dêh Kanaan, pơjao kon pơlei noh păng lu pơtao dêh noh hăm lu kon pơlei lăm tơpang ti lu sư pơgơ̆r mơ̆ng kơ lu sư wă.

²⁵Lu sư blah tơgar iŏk pơlei tih kơjăp păng chŭn mir teh 'lơ̆ng, lu hnam 'bĕnh kơ tơmam 'lơ̆ng, lu đak sơlŭng, pơgar hơmu, pơgar ôliwơ păng plei 'long lơ; lu sư sa phĭ mah rơkah rơkai păng bek, hiôk chơt lăm tơdrong 'mêm Kră Yang tih dêh.

²⁶Mă-lei, lu sư ưh kơ chu kiơ̆ nơ̆r păng sơngah kơ Ih, hŭt lê̆ khôi juăt Ih tơ rŏng păng pơlôch lu bơngai khan lê̆ adrol Ih wă chông ba lu sư brŏk tơ Ih; mă-lei lu sư tơblĕk Ih rai dêh.

²⁷Yua kơ thoi noh Ih jao boih lu sư lăm tơpang ti đe ayăt kơ lu sư; lu đe pơmat pơm kơnê̆ kơ lu sư, lăm lu sư đei tơdrong pơmat-tat lu sư ôr krao chă Ih păng Ih đơ̆ng kơpal plĕnh mơ̆ng lu sư; jơhngơ̆m 'mêm Ih tih dêh, Ih yua lu bơngai nuih pran kơtang dŏng pơklaih đơ̆ng lu bơngai ayăt kơ lu sư.

²⁸Mă-lei tơdah lu sư hiôk-hian, wơ̆t pơm tơdrong kơnê̆ dơ̆ng 'bơ̆t anăp Ih; yua kơ thoi noh Ih achăng lê̆ jao lu sư lăm tơpang ti lu đe ayăt wei-lăng pơgơ̆r lu sư. Mă-lei lu sư ôr krao Ih dơ̆ng, na Ih đơ̆ng kơpal plĕnh mơ̆ng lu sư, kiơ̆ thoi Ih 'mêm, đơ̆ng noh dŏng pơklaih lu sư đei lơ 'măng, kiơ̆ thoi tơdrong 'mêm Ih tih dêh.

²⁹Ih pơma chrih kơ lu sư, wă kơ chông lu sư wih brŏk dơ̆ng tơ khôi juăt Ih lei ră lu sư kư̆ pơang kuă kơ mơ̆ng dôm lu khôi juăt Ih, pơm glăi kơ tơdrong juăt Ih. Tơdrong juăt mă tơdah bơngai bu chu pơm kiơ̆ gơh đei tơdrong arih; lu sư arăng kơ̆l wih rŏng ưh kơ wă pơm kiơ̆.

³⁰Ih mơnat kơ lu sư lơ sơnăm, yua Yang bơhngol 'lơ̆ng păng lu 'bok khan lê̆ adrol pơm kơdranh kơ lu sư, mă-lei lu sư ưh kơ wă pơgling đon mơ̆ng, thoi noh Ih pơjao lu sư lăm tơpang ti lu kon pơlei lăm char noh.

³¹Yua kơ Ih đei jơhngơ̆m 'mêm tih dêh, Ih ưh kơ đei pơlôch pơrăm lu sư, kư̆m ưh kơ đei achăng lê̆ lu sư, yua kơ Ih boih Kră Yang 'Bok Kei-Dei 'mêm mơnat păng pơm 'lơ̆ng.

³²Yua kơ thoi noh na dang ei. Ơ Kră Yang 'Bok Kei-Dei lu nhôn Ih boih Kră Yang 'Bok Kei-Dei tih hloh mơsêh mơyang trŏ kơ hli yom, bơwei tơdrong pơgơ̆p păng tơdrong pơm 'lơ̆ng, 'nĕ lăng tơdrong âu thoi iĕ đĕch 'bơ̆t anăp Ih dôm lu tơdrong jĭ jăn pơmat-tat đei truh boih kơ lu nhôn, tơ lu pơtao păng lu kră pơgơ̆r, tơ lu 'bok soi păng lu 'bok khan lê̆ adrol, kơ 'bok yă lu nhôn păng tơ kon pơlei Kră Yang, đơ̆ng chăl lu pơtao Asiri truh tơ dang ei.

³³Lăm dôm tơdrong truh kơ lu nhôn, Ih oei tơpăt hơnơ̆ng đĕch; yua kơ Ih pơm trŏ tơpă, gah lu nhôn pơm tơdrong kơnê̆.

³⁴Lu pơtao nhôn lu kră pơgơ̆r, lu 'bok soi păng lu 'bok nhôn, ưh kơ bơwei khôi juăt Ih, kư̆m ưh kơ wă mơ̆ng nơ̆r Ih tơtă păng tơbăt, Ih phak bơtho lu nhôn.

³⁵Tơ lăm dêh sư oei pŭn hiôk rơkah rơkai đơ̆ng Ih ăn, teh rơhơi să păng jing 'lơ̆ng Ih asong ăn, mă-lei lu sư ưh kơ wă kơkuh kơ Ih, ưh kơ weh ôh đơ̆ng tơdrong jang kơnê̆ lu sư.

³⁶Na dang ei lu nhôn pơm đĭch; 'nâu lu nhôn jing đĭch lăm dêh char mă Ih ăn kơ lu 'bok nhôn, phĕ sa plei păng tơmam lĕch đơ̆ng noh.

³⁷Tơmam plei sa lĕch đơ̆ng teh đak âu rơkah rơkai Ih ăn kơ lu pơtao pơgơ̆r nhôn, yua kơ lu nhôn pơm tơdrong yoch, lu pơtao noh mơ̆ng kơ sư wă pơm kiơ kơ akâu jăn lu nhôn păng sem dơrong lu nhôn păng dang ei pơm kơ lu nhôn oei pơmat-tat dêh.

³⁸Mă đei thoi noh, lu nhôn pơm minh tơdrong pơkăm pơkă pơgơ̆p kơjăp sĭt, chih răk lăm sơ̆p hla bơar, lu kră pơgơ̆r, bơngai Lêwi păng 'bok soi lu nhôn gô chơ̆m tơdra pơsĭt.