Read bahnar Est 1 Bible Online

Est 1 - bahnar bible

Est 1

¹chăl pơtao Asêrus, sư pơgơ̆r lăm minh-hrĕng 'bar-jĭt tơpơh tŏ char iŏk đơ̆ng char Ânđô̆ truh tơ Êthiôpi.

²Kơplah pơtao Asêrus pơgơ̆r sư oei lăm pơlei tih Susa.

³Lăm sơnăm mă pêng chăl sư pơgơ̆r, sư pơih sŏng sa tih, sư krao wơ̆n lu kră pơgơ̆r wei-lăng tơring păng lu yŏng linh char Phersia hăm Mêdi năm 'bơ̆t anăp sư.

⁴Lăm đunh năr wă khan minh-hrĕng tơhngam-jĭt năr, sư pơdah tơdrong 'lơ̆ng rŏ hơbŏ sor sư.

⁵Đơ̆ng rŏng kơ lu năr noh hlôi boih, pơtao krao đĭ-đăng lu kon pơlei mă oei lăm pơlei tih Susa, mă pơm tih, pơm iĕ sŏng sa lăm tơpơh năr tơ anih lăm pơgar pơkao sư.

⁶Tăp dăr kơ pơgar đei dăng che kok, che dreng hla 'long, dreng jơk plĕnh, iŏk tơlei kok păng 'brê hơhĭm chô̆ tơ kong hu păng jrăng tơmo brông, lu giơng pơm păng hu maih, dan kơpal hơnă lơ̆k tơmo gôh kok păng tơmo rang gĭt găm.

⁷Lu sư huch sa păng kơchŏk maih, đei lơ kơchŏk phara pha, đei tơdrô lơ trŏ kơ tơdrong mơdrŏng pơtao.

⁸Tơdrong huch sa kiơ̆ thoi ưh kơ đei bu pơgŏ ôh, yua kơ pơtao pơkă boih kơ lu bơngai mă bơ̆jang lăm hnam pơtao ăn kon pơlei huch sa mơ̆ng kiơ̆ kơ akâu kơdih wă.

⁹Yă pơtao Wathi kư̆m hơmet sŏng sa tih ăn kơ lu bơngai drŏ-kăn tơ lăm hnam pơtao Asêrus.

¹⁰Truh lăm năr mă tơpơh jơhngơ̆m pơtao hiôk dêh đơ̆ng huch tơdrô na sư pơkă kơ Mêhuman, Bistha, Harbôna, Biktha, Abaktha, Sethar păng Karkas. Tơpơh 'nu linh krĕo bơ̆jang lăm hnam pơtao Asêrus,

¹¹chông yă pơtao Wathi năm 'bơ̆t anăp pơtao, pơyơ̆l ăn kơ sư môk pơtao, wă tơ'bôh ăn tơdrong 'lơ̆ng sư kơ kon pơlei pơla păng kơ lu kuan tih lăng, yua kơ akâu sư hơbŏ 'lơ̆ng dêh.

¹²Mă-lei yă pơtao Wathi ưh kơ wă chu nơ̆r pơtao tơtă đơ̆ng lu linh krĕo khan, yua kơ tơdrong noh na pơtao blĕk dêh tơtŏ lăm jơhngơ̆m sư.

¹³Pơtao mưh sư đei tơdrong truh sư juăt kơ apinh lu bơngai hơgei lu bơngai băt tơdrong juăt păng băt kơ sek tơlang.

¹⁴Na sư apinh lu kuan tih oei jê̆ sư Karsena, Sethan, Atmatha, Tarsis, Mêdi, Marsena păng Memukan, tơpơh 'nu kuan tih Phersia păng Mêre, lu đe âu juăt kơ 'bôh pơtao păng lu sư hơ-oei 'bơ̆t anih kơjung hloh kơ đĭ-đăng.

¹⁵Sư apinh thoi âu: Yă pơtao Wathi ưh kơ chu nơ̆r pơtao Asêrus tơtă kơ lu linh krĕo thoi noh kiơ̆ tơdrong juăt lu bơ̆n wă sek tơdrong thoi yơ?

¹⁶Mêmukan tơl 'bơ̆t anăp pơtao păng lu kuan tih thoi âu: Yă pơtao Wathi âu ưh kơ sĭ pơm hơdrô̆ ih đĕch ôh ưh kơ hiôk, mă-lei kư̆m pơm kơ đĭ-đăng lu kuan tih păng đĭ-đăng kon pơlei oei lăm char pơtao Asêrus pơgơ̆r.

¹⁷Yua kơ đĭ-đăng bơngai drŏ-kăn gô kơtơ̆ng tơdrong yă pơtao Wathi pơm na lu sư kư̆m ưh kơ wă chu klo lu sư kơdih, yua kơ lu sư khan, pơtao Asêrus tơtă nơ̆r sư krao yă pơtao Wathi năm 'bơ̆t anăp sư ră, mă-lei yă pơtao noh ưh kơ chu năm.

¹⁸Năr 'nâu akăn lu 'bok kuan tih lăm char Phersia păng char Mêdi gô kơtơ̆ng kơ tơdrong yă pơtao Wathi đei pơm, lu sư kư̆m gô pơma kơ lu klo sư thoi noh đơ̆ng noh gô đei lơ tơdrong hil păng pơdê.

¹⁹Tơdah pơtao lăp đon, lei tơjur bĕ nơ̆r pơtao pơkă, na chih lăm sơ̆p hla bơar tơdrong juăt dêh char Phersia păng char Mêdi wă ưh kơ đei bu gơh tơplih, wă kơ yă pơtao Wathi âu ưh pă gơh mơ̆t 'bơ̆t anăp pơtao Asêrus. Pơtao athei rơih chă yă pơtao plơ̆ng 'lơ̆ng hloh tơplih kơ yă Wathi.

²⁰Thoi noh tơdah layơ nơ̆r pơtao noh đei roi tơbăt tơ jơ̆p-jang lăm teh đak ih, mă să păng tih dêh, lei na đĭ-đăng lu drŏ-kăn gô chu yom kơ klo lu sư, mă mơdrŏng yŏng mơng truh tơ bơngai pă rơ-a.

²¹Pơtao păng lu kuan tih lăp đon kơ tơdrong pơđâu 'nâu pơtao pơm kiơ̆ hloi nơ̆r Memukan pơđâu.

²²Sư tơjur nơ̆r chih ăn kơ đĭ-đăng char lăm dêh char sư pơgơ̆r kiơ̆ kơ nơ̆r pơma lăm rim tơring, wă kơ rim 'nu drŏ-nglo jing pơm yŏng tơ'ngla lăm hnam dơnŏ sư kơdih, yua nơ̆r sư kơdih chă bơtho tơ'bôh.