Read bahnar Est 4 Bible Online

Est 4 - bahnar bible

Est 4

¹Kơplah Morđêkai băt đĭ-đăng kơ tơdrong wă truh noh na sư hek ao sư, iŏk su ao 'bi păng pung tơnuh tơ akâu sư, năm tơ tŏk-bŏk pơlei ôr krao păng nhơ̆m hmoi ơh sơ'ngon.

²Sư năm truh tơ 'nguaih 'măng dur pơtao đĕch yua kơ lu bơngai bu mă su 'bi ưh kơ gơh kơ mơ̆t ôh lăm 'măng dur pơtao noh.

³Lăm rim tơring mă đei hla bơar pơtao tơtă truh, đei ơh sơ'ngon nhơ̆m hmoi tih lăm adrĕch Juđa, nhơ̆m hmoi ơ̆t kơ sŏng sa ơh sơ'ngon, lơ bơngai su 'bi 'bĭch păng pung tơnuh.

⁴Kơplah lu kuan krĕo păng lu drŏ-kăn awih awăn kơ Esther năm roi tơbăt ăn kơ Esther tơdrong 'nâu, yă pơtao sơ'ngon rŭng răng dêh. Sư gơih ăn kơ Morđêkai ao wă kơ sư plôh lê̆ ao 'bi mă-lei sư ưh kơ wă iŏk.

⁵Esther krao Hathach minh 'nu lăm lu kuan krĕo bơngai jang tơgŭm yă pơtao athei năm truh tơ Morđêkai apinh wă kơ băt đei tơdrong kiơ, yua kơ kiơ đei tơdrong thoi noh.

⁶Hathach năm truh tơ Morđêkai tơ anih pơlei anăp 'măng dur pơtao.

⁷Morđêkai roi đĭ dôm tơdrong truh kơ sư păng kư̆m roi tơbăt nơ̆r Haman pơkă wă tah kơsô̆ jên hu lăm hnam tah tơmam pơtao, yua wă pơlôch lu adrĕch Juđa.

⁸Morđêkai kư̆m ăn minh hlak hla bơar chih rok nơ̆r tơtă roi tơlĕch boih tơ lăm pơlei tih Susa tơdrong wă pơlôch adrĕch Juđa, wă kơ sư roi tơbăt ăn kơ Esther dôm nơ̆r đơ̆ng Morđêkai tơlang ăn kơ Esther păng roi ăn wă ăn Esther athei năm apinh pơtao mơnat pơklaih adrĕch Juđa sư kơdih.

⁹Hathach brŏk roi kơ Esther dôm nơ̆r đơ̆ng Morđêkai khan.

¹⁰Esther roi kơ Hathach athei năm roi ăn kơ Morđêkai thoi âu:

¹¹Đĭ-đăng mă lu kuan linh krĕo jang kơ pơtao, dah kon pơlei pơla lăm char pơtao đĭ-đăng băt ngăl mă drŏ-nglo dah drŏ-kăn ưh kơ gơh kơ mơ̆t tơ lăm anih pơtao tơdah pơtao ưh kơ krao, tơdah bu mơ̆t ưh kơ kiơ̆ tơdrong juăt đe gô pơlôch; mă-lei tơdah pơtao yơ̆r 'long jra maih lei bơngai noh arih. Đei pêng-jĭt năr boih pơtao ưh kơ đei krao inh mơ̆t.

¹²Hathach roi kơ Morđêkai nơ̆r Esther.

¹³Na Morđêkai athei năm roi dơ̆ng kơ Esther thoi âu: Ih 'nĕ tơchĕng khan yua kơ ih oei lăm hnam pơtao na gơh klaih hloh kơ adrĕch bơngai Juđa.

¹⁴Yua kơ tơdah ih ngăn lăm jơ 'nâu gô đei trong nai dơ̆ng pơklaih adrĕch Juđa, mă-lei ih păng hnam dơnŏ 'bă ih kư̆m gô lôch răm. Bu băt lê̆ ih gơh pơm yă pơtao kư̆m yua kơ tơdrong lâu?

¹⁵Kơtơ̆ng thoi noh boih, Esther athei sư năm roi dơ̆ng kơ Morđêkai thoi âu:

¹⁶Akŭm đĭ-đăng lu adrĕch bơngai Juđa tơ pơlei Susa bĕ, đơ̆ng noh athei ơ̆t kơ sŏng sa lăm pêng năr yua kơ inh, 'nĕ sŏng sa, kư̆m 'nĕ kơ nhă đak. Inh hăm lu bơngai awih awăn tơgŭm inh kư̆m ơ̆t kơ sŏng sa mơ̆n. Thoi noh inh gô mơ̆t tơ anih pơtao, mă khan pơm glăi kơ tơdrong juăt bưh mơ̆n. Tơdah trŏ kơ lôch lei inh lôch.

¹⁷Thoi noh Morđêkai năm pơm kiơ̆ dôm tơdrong Esther đei pơkă kơ sư.