Read bahnar Est 5 Bible Online

Est 5 - bahnar bible

Est 5

¹Lăm năr mă pêng Esther hrŭk ao yă pơtao sư klaih kơ noh sư năm dơ̆ng 'bơ̆t anăp 'măng tơklă anih tang-dŏ pơtao hơ-oei, pơtao sư hơ-oei tang-dŏ tơklă 'măng mơ̆t anih pơtao sư.

²Lăp pơtao 'bôh yă pơtao Esther dơ̆ng 'bơ̆t anăp 'măng, sư lăng 'brơ̆k mơnat, sư yơ̆r 'long jra maih sư tơ yă Esther, yă Esther năm jê̆ păng pel kơnhŏng 'long jra noh.

³Pơtao pơma apinh. Ơ yă pơtao Esther ih wă apinh inh tơdrong kiơ? Ih wă kơ inh ăn kơ ih kiơ? Mă ih apinh minh puăt teh đak inh kư̆m ăn kơ ih.

⁴Yă Esther tơl: Tơdah ih lăp đon, apinh ih păng Haman năr âu năm sŏng sa inh đei hơmet ăn kơ ih boih.

⁵Pơtao khan kơ bơngai awih awăn kơ sư Chông ba Haman mă tĕnh wă kơ bơ̆n pơm kiơ̆ thoi Esther wă na pơtao păng Haman năm sŏng sa mă Esther đei hơmet boih.

⁶Kơplah sư oei et sik hơmu, pơtao apinh Esther Ih wă apinh kiơ? Inh gô ăn kơ ih. Tơdrong kiơ ih wă? Mă khan minh puăt dêh char inh pơgơ̆r inh kư̆m ăn mơ̆n.

⁷Esther tơl: 'Nâu tơdrong inh wă păng tơdrong inh hơpơi.

⁸Tơdah pơtao mơnat kơ inh păng tơdah pơtao đei jơhngơ̆m 'lơ̆ng na mơ̆ng nơ̆r inh apinh asong kiơ̆ kơ nơ̆r inh hơpơi, lei dơning apinh ih păng Haman năm sŏng sa mă inh gô hơmet dơ̆ng, năr dơning inh gô roi tơdrong kiơ inh wă apinh ih.

⁹Lăm năr noh Haman lĕch năm hăm jơhngơ̆m hiôk chơt. Mă-lei lăp sư 'bôh Morđêkai oei 'bơ̆t 'măng dur pơtao, ưh kơ iung păng huay kơ hli tơtơ̆ 'bơ̆t anăp sư, Haman blĕk dêh.

¹⁰Mă-lei Haman ĕnh, na wih brŏk tơ hnam sư. Sư wơh đe năm krao bôl buăl sư păng akăn sư Sêrêt.

¹¹Haman roi pơư kơdih akâu, tơdrong mơdrŏng sư, roi sư đei kon drŏ-nglo lơ, roi kơ pơtao pơyom kơ sư păng sư pơm yŏng hloh kơ lu kuan tih nai.

¹²Haman khan dơ̆ng. Mă yă Esther ưh kơ đei pơtơm đe nai ôh, pơtơm lăp minh 'nu đĕch sŏng sa hơdai pơtao mă yă pơtao Esther đei hơmet boih păng dơning sư kư̆m krao pơtơm inh năm sŏng sa tơ hnam sư hơdai păng pơtao dơ̆ng.

¹³Mă-lei tơdrong noh ưh kơ đei yua kiơ kơ inh mưh inh lăng Morđêkai bơngai Juđa hơ-oei 'bơ̆t 'măng jang hnam pơtao.

¹⁴Akăn sư Sêrêt păng đĭ-đăng lu buăl sư wang khan kơ sư: Athei bĕ đe pơdơ̆ng gơ̆ng atol bơngai kơjung pơđăm-jĭt hơgăt, na pơgê dơning athei pơtao ăn đe rôp hrek atol Morđêkai tơ noh. Đơ̆ng noh hiôk bĕ năm sŏng sa hơdai hăm pơtao. Tơdrong noh pơm ăn kơ Haman lăp, na sư ăn hloi đe pơdơ̆ng 'long gơ̆ng wă hrek atol đe.