Read bahnar Est 6 Bible Online

Est 6 - bahnar bible

Est 6

¹Lăm măng noh pơtao ưh kơsŭk tep, na athei đe iŏk sơ̆p hla bơar đe chih răk hơ'mon tơdrong lu pơtao pơgơ̆r na đŏk 'bơ̆t anăp sư.

²Đe đŏk 'bôh đei chih boih Morđêkai đei roi boih kơ tơdrong Bikthana păng Têres, 'bar 'nu kuan gak 'măng jang pơtao chă đon wă pơrăm pơtao Asêrus.

³Pơtao jet, lăm tơdrong 'nâu Morđêkai đe hăm ư-ang păng pôk pơyom kơ sư ưh? Lu bơngai bơ̆jang kơ pơtao tơl, đe ưh kơ đei pơm kiơ kơ sư.

⁴Pơtao jet dơ̆ng. Bĕ bu tơ cham to? Kơplah noh Haman mơ̆t tơ cham 'nguaih kơ hnam pơtao wă apinh pơtao hrek atol Morđêkai tơ 'long gơ̆ng mă sư đei pơdơ̆ng boih wă hrek atol Morđêkai.

⁵Lu bơngai jang kơ pơtao tơl. To noh Haman oei dơ̆ng tơ cham, pơtao khan. Ăn kơ sư mơ̆t bĕ.

⁶Đơ̆ng noh Haman mơ̆t, na pơtao khan kơ sư. Athei pơm liơ kơ bơngai bu pơtao lăp đon. Haman tơchĕng kơdih lăm to. Bơngai bu dơ̆ng pơtao lăp đon pơyom hloh kơ inh?

⁷Haman khan kơ pơtao, bơngai mă pơtao wă pơyom,

⁸athei đe chĕp ba kơ sư ao mă pơtao hrŭk, dui ba aseh mă pơtao juăt kơ hao păng pơyơ̆l ăn môk pơtao.

⁹Athei 'bok kuan mă tih hloh, iŏk ao păng aseh pơtao, đơ̆ng noh pơhrŭk ăn ao pơtao kơ bơngai mă pơtao wă pơyom. Na pôk hơtŏk sư tơ kơpal aseh ba năm jơ̆p kơ trong tih lăm pơlei păng ôr 'bơ̆r re khan: 'Nâu boih mă tơdrong đe pơm kơ bơngai mă pơtao pôk pơyom.

¹⁰Pơtao khan kơ Haman, năm tĕnh tĕnh bĕ! Iŏk ao păng aseh thoi ih đei khan, na pơhrŭk ăn kơ Morđêkai, bơngai Juđa, mă oei ngôi 'bơ̆t 'măng jang hnam pơtao. Ih 'nĕ kơ hŭt minh tơdrong kiơ lăm dôm nơ̆r ih đei pơma noh.

¹¹Na Haman năm iŏk hloi ao pơhrŭk ăn kơ Morđêkai, đơ̆ng noh hao aseh ba sư năm jơ̆p rok trong tih lăm pơlei. Sư ôr 'bơ̆r re khan 'bơ̆t anăp sư: 'Nâu boih mă tơdrong pơm kơ bơngai mă pơtao pôk pơyom!

¹²Đơ̆ng noh Morđêkai wih hơlơ̆k tơ 'măng jang hnam pơtao. Mă-lei Haman hăt hot brŏk tơ hnam sư kơdih, kơlŭk gom kơ̆l sư ơh sơ'ngon.

¹³Haman roi ăn kơ akăn sư Sêrêt păng lu bôl buăl sư băt dôm tơdrong mă đei truh kơ sư. Lu bôl buăl sư gơh hơgei păng akăn sư Sêrêt khan kơ sư: Ih wă pơtơm huŏng boih 'bơ̆t anăp Morđêkai. Yua kơ sư bơngai Juđa, ih ưh kơ kĕ pơm kiơ kơ sư. Ih gô răm ngei 'bơ̆t anăp sư.

¹⁴Kơplah lu đe noh oei pơma dơnuh hăm sư đei lu linh bơ̆jang kơ pơtao truh, hăt hot chông Haman năm sŏng sa mă yă pơtao Esther đei hơmet lê̆ boih.