Read bahnar Est 7 Bible Online

Est 7 - bahnar bible

Est 7

¹Thoi noh pơtao păng Haman truh sŏng sa hơdai hăm yă pơtao Esther.

²Lăm năr mă 'bar kơplah lu sư oei et sik hơmu pơtao khan dơ̆ng kơ Esther. Ih wă apinh tơdrong kiơ, ơ yă pơtao Esther? Inh gô ăn kơ ih tơdrong noh, mă khan ih apinh minh puăt dêh char inh pơgơ̆r inh kư̆m ăn mơ̆n.

³Yă pơtao Esther tơl sư; tơdah inh đei tơdrong mơnat 'bơ̆t anăp ih păng tơdah ih lăp đon apinh ih ăn kơ inh arih păng ăn kơ adrĕch adrung inh arih, noh tơdrong inh wă apinh?

⁴Yua kơ inh păng adrĕch adrung inh đe đĭ tĕch boih wă pơlôch pơrăm păng wă tơhiong lê̆. Tơdah đe tĕch nhôn wă pơm đĭch đĕch mă drŏ-nglo mă drŏ-kăn, lei rŏ inh kư̆m ngăn mơ̆n, yua kơ tơdrong pơmat-tat lu nhôn ưh kơ dang pơm rŭng răng pơhiơ̆k pơtao.

⁵Pơtao Asêrus khan kơ yă pơtao Esther. Bơngai ei bu, sư oei tơ yơ, mă pơ̆n pơm tơdrong ei.

⁶Esther tơl: Minh 'nu bơngai ayăt kơnê̆ noh jơ̆ Haman! Kơplah noh Haman hli dêh 'bơ̆t anăp pơtao păng yă pơtao Esther.

⁷Pơtao blĕk iung weh hloi đơ̆ng gơ'bang sŏng sa; đơ̆ng noh năm mơ̆t lăm anih pơgar pơkao 'bơ̆t cham pơtao. Mă-lei Haman apinh hơdrĭ iung đơ̆ng yă pơtao Esther ăn kơ sư gơh oei arih, yua kơ sư 'bôh boih tơdrong pơtao tơchĕng wă pơm kơ sư.

⁸Kơplah pơtao hơlơ̆k wih đơ̆ng pơgar pơtao, wơ̆t tơ anih lu sư oei et sa na 'bôh Haman oei drap 'bơ̆t tang-dŏ kơjung yă Esther oei ngôi. Pơtao hil khan, lăm hnam pơtao 'bơ̆t anăp inh sư kư̆m pơ̆n pơm kơnê̆ kơ yă pơtao dơ̆ng hă? Kơplah nơ̆r pơtao pơma 'nao wă tôch, đe thar gom hloi muh măt Haman.

⁹Kơplah noh Harbôna minh 'nu lăm lu linh krĕo wei pơtao khan: To đei boih 'long gơ̆ng mă Haman đei pơdơ̆ng lê̆ boih wă atol Morđêkai, Morđêkai bơngai mă dŏng pơrih pơtao, 'long gơ̆ng noh kơjung pơđăm-jĭt hơgăt, pơtao khan, hrek atol bĕ sư tơ kơpal noh.

¹⁰Thoi noh na đe hrek atol Haman tơ 'long gơ̆ng mă sư đei pơdơ̆ng wă hrek atol Morđêkai. Đơ̆ng noh tơdrong pơtao blĕk ưh pă đei boih.