Read bahnar Est 9 Bible Online

Est 9 - bahnar bible

Est 9

¹Lăm khei mơjĭt-'bar, đe anăn khei Adar, năr mơjĭt-pêng lăm khei âu, kơplah wă jê̆ jơ 'năr nơ̆r pơtao pơkă wă pơsĭt boih, 'bơ̆t năr lu bơngai ayăt kơ adrĕch Juđa khan wă jei lu sư ră, mă-lei tơplih tơdrong lu sư wă noh jing jei lu bơngai Juđa pơgơ̆r plơ̆ lu sư dơ̆ng,

²lu bơngai Juđa akŭm băl tơ rim pơlei lu sư lăm jơ̆p-jang rim tơring dêh char pơtao Asêrus pơgơ̆r wă pơlôch lu bơngai mă wă pơrăm lu sư; ưh kơ đei bơngai bu kĕ găn lu sư, yua kơ đĭ-đăng lu bơngai adrĕch adrung nai hli dêh kơ adrĕch Juđa.

³Đĭ-đăng lu kră pơgơ̆r, lu kuan tih, lu kră wei-lăng tơring păng lu kuan tih jang kơ pơtao, kư̆m wang tơgŭm lu bơngai Juđa, yua kơ lu sư hli kơ Morđêkai.

⁴Yua kơ Morđêkai pơm tih lăm hnam pơtao, đe ư-ang anăn sư jơ̆p-jang kơ dêh char; yua kơ Morđêkai pơgơ̆r rai đunh rai pran.

⁵Thoi noh lu bơngai Juđa yua đao gưm koh pơlôch đĭ-đăng lu bơngai ayăt kơ lu sư, bơngai bu hil areh kơ lu sư, lu sư pơm kơ đe noh mơ̆ng kiơ̆ kơ lu sư wă.

⁶Lăm pơlei tih Susa lu bơngai Juđa pơlôch pơđăm-hrĕng 'nu lu bơngai drŏ-nglo.

⁷Lu sư kư̆m pơlôch Parsandatha, Dalphôn, Apatha,

⁸Pơratha, Adalia, Aridatha.

⁹Parmasta, Arisai, Aridai păng Waisatha.

¹⁰Wă khan mơjĭt 'nu kon drŏ-nglo Haman, sâu drŏ-nglo Hamadatha bơngai mă ayăt pơm kơnê̆ kơ adrĕch Juđa. Mă-lei lu sư ưh kơ blah iŏk mŭk tơmam ôh.

¹¹Lăm năr noh đe roi kơ pơtao băt hơdôm 'nu bơngai lôch lăm pơlei Susa.

¹²Pơtao roi kơ yă pơtao Esther khan: Lu bơngai Juđa đei pơlôch boih pơđăm-hrĕng 'nu bơngai lăm pơlei tih Susa păng kư̆m pơlôch mơjĭt 'nu kon drŏ-nglo Haman hai. Lei bĭ lu tơring nai lăm dêh char inh pơgơ̆r rŏ lu sư pơlôch lơ hloh kơ noh tơpă. Bĭ dang ei ih wă apinh tơdrong kiơ dơ̆ng? Inh gô ăn kơ ih, lei ih khan wăi wă apinh tơdrong kiơ plơ̆ng dơ̆ng inh gô ăn tơdrong noh.

¹³Yă pơtao Esther tơl: Tơdah ih lăp đon năr dơning kư̆m thoi năr 'nâu, ăn kơ lu bơngai Juđa iŏk hrek atol mơjĭt 'nu kon drŏ-nglo Haman noh tơ 'long gơ̆ng kơjung to.

¹⁴Pơtao ăn kơ đe pơm kiơ̆ thoi noh, chih hla bơar roi tơbăt lăm pơlei Susa, na đe atol akâu mơjĭt 'nu kon drŏ-nglo Haman.

¹⁵Lu bơngai Juđa mă oei lăm pơlei Susa akŭm băl dơ̆ng lăm năr mơjĭt-puăn khei Adar, na pơlôch pêng-hrĕng 'nu bơngai drŏ-nglo lăm pơlei Susa; mă-lei lu sư ưh kơ blah iŏk tơmam dah mŭk măk ôh.

¹⁶Lu bơngai Juđa nai mă oei lăm dêh char pơtao pơgơ̆r, kư̆m akŭm băl mơ̆n wă pơklaih tơdrong arih kơdih akâu, blah lu bơngai ayăt kơ lu sư, pơlôch tơpơh-jĭt pơđăm-rơbâu 'nu bơngai areh kơ lu sư, mă-lei lu sư ưh kơ blah iŏk mŭk tơmam ôh.

¹⁷Lu sư pơm tơdrong noh lăm năr mơjĭt-pêng khei Adar, năr mơjĭt-puăn lăm khei noh mơ̆n lu sư pơdơh, pơih minh năr pơm năr sŏng sa chơt hiôk.

¹⁸Mă-lei lu bơngai oei lăm pơlei Susa akŭm tơblah ayăt sư năr mơjĭt-pêng păng năr mơjĭt-puăn na năr mơjĭt-pơđăm pơdơh, pơm năr sŏng sa chơt hiôk.

¹⁹Yua kơ noh lu bơngai Juđa oei lăm pơlei iĕ, iŏk năr mơjĭt-puăn khei Adar pơih minh năr pơm sŏng sa tih chơt hiôk 'blŏk hơdơ̆r pơm năr giĕng pơdơh, lăm năr noh lu sư gơih băl tơmam lăng jơ̆ng ti tơduă lu sư.

²⁰Morđêkai chih răk dôm tơdrong noh, đơ̆ng noh gơih kơthơ ăn rim 'nu bơngai Juđa oei tơ lăm jơ̆p-jang char pơtao Asêrus pơgơ̆r, mă jê̆ mă ataih.

²¹Sư tơtă wă kơ lu sư răk 'blŏk lăm rim sơnăm 'bơ̆t năr mơjĭt-puăn păng mơjĭt-pơđăm khei Adar,

²²yua kơ lăm năr păng khei ei lu bơngai Juđa klaih rơngei đơ̆ng lu bơngai ayăt kơ lu sư păng lu sư gơh đei rơnŭk rơnua. Tơdrong ơh sơ'ngon tơplih boih jing tơdrong chơt hiôk, tơdrong pơmat-tat tơplih boih jing năr sŏng sa chơt hiôk. Sư pơkă kơ lu sư pơm năr noh jing năr giĕng sŏng sa chơt hiôk tơăn băl tơmam lăng jơ̆ng ti păng tơgŭm bơngai dơnuh hin.

²³Thoi noh na rim sơnăm lu bơngai Juđa kư̆ kơ pơm thoi lu sư đei pơm boih lăm sơnăm tơm hmơm noh, lu sư pơm kiơ̆ tơdrong Morđêkai đei chih kơ lu sư.

²⁴Yua kơ Haman kon drŏ-nglo Hamadatha bơngai Agak, bơngai mă ayăt đĭ-đăng kơ adrĕch Juđa, sư chă đon wă pơrăm păng pơlôch pơgoh adrĕch Juđa. Lu sư đei rơih iŏk boih pur wă khan năr hơgăt lê̆ năr wă pơlôch pơrăm pơgoh adrĕch Juđa.

²⁵Mă-lei kơplah yă Esther năm 'bơ̆t anăp pơtao wă roi tơdrong noh, na pơtao tơjur nơ̆r chih thoi âu: Tơdrong kơnê̆ Haman chă đon wă pơrăm adrĕch Juđa noh thoi tuh plơ̆ tơ kơ̆l sư kơdih, đơ̆ng noh đe hrek atol sư păng lu kon drŏ-nglo sư tơ kơpal 'long gơ̆ng.

²⁶Yua kơ noh đe krao năr noh Purim kiơ̆ kơ chư pur. Yua kơ đĭ-đăng tơdrong đei chih boih lăm hla bơar kơthơ păng tơdrong lu sư đei 'bôh tơpă păng dôm tơdrong đei truh tơ lu sư boih,

²⁷thoi noh na bơngai Juđa iŏk răk năr kơ lu sư kơdih păng răk kơ lu kon sâu sư păng ăn kơ lu bơngai mơ̆t khŭl sư, wă kơ rim sơnăm wei răk 'bar năr âu kiơ̆ kơ hla bơar đei chih boih, ưh kơ gơh bu hiơt.

²⁸Wă kơ đe 'blŏk hơdơ̆r kơ năr noh lăm đĭ jơhnơr, đĭ-đăng adrĕch adrung păng jơ̆p kơ dêh char, rim pơlei, wă kơ năr Purim âu ưh kơ đei bu hiơt lăm adrĕch Juđa păng kư̆m ưh kơ tơhiong lê̆ ôh lăm kon sâu se lu sư.

²⁹Yă pơtao Esther kon Abihai păng Morđêkai bơngai Juđa chih gơih dơ̆ng kơthơ mă 'bar athei wei răk rim kơ năr Purim.

³⁰Morđêkai gơih ăn hla bơar lu kơthơ âu kơ đĭ-đăng adrĕch Juđa, oei lăm minh-hrĕng 'bar-jĭt tơpơh tŏ char lăm dêh char pơtao Asêrus pơgơ̆r; bre sư chih hăm nơ̆r rơngơp hăm tơdrong tơpă,

³¹Wă kơ lu sư iŏk năr Purim noh pơm năr 'blŏk hơdơ̆r kiơ̆ thoi Morđêkai bơngai Juđa păng yă pơtao Esther bơtho pơkă boih kơ lu bơngai Juđa, thoi lu sư păng kon sâu sư kư̆m đei pơm kơdih, gah tơdrong ơ̆t kơ sŏng sa păng nhơ̆m hmoi.

³²Tơdrong yă Esther pơkă kơ jơ̆p dêh char kơ năr Purim pơsĭt lê̆ nơ̆r tơtă adrol păng tơdrong noh kư̆m đei chih răk lăm sơ̆p hla bơar.