Read bahnar Le 10 Bible Online

Le 10 - bahnar bible

Le 10

¹Kră Yang khan kơ Môis, năm bĕ tơ Pharaôn yua kơ Inh pơm kơ sư păng lu bơngai bơ̆jang kơ sư đei jơhngơ̆m arăng, wă kơ Inh pơm tơ'bôh dôm tơdrong mơsêh Inh tơ lăm lu sư,

²wă kơ ih gô roi kơ kon sâu ih mơsêh tih-tin Inh pơm kơ kon pơlei Êyiptơ, dôm tơdrong mơsêh Inh pơm bơih lăm lu sư, wă kơ lu sư băt kơ Inh Kră Yang.

³Môis păng Arôn năm hloi tơ Pharaôn păng khan kơ sư: Kră Yang 'Bok Kei-Dei kon pơlei Hêbrơ, đei khan thoi âu: Ih ưh kơ chu drap kơkuh 'bơ̆t anăp Inh dĭng truh dang yơ? Achăng bĕ lê̆ kon pơlei Inh năm, wă kơ lu sư năm kơkuh kơ Inh.

⁴Tơdah ih ưh kơ chu ăn kon pơlei inh năm, lei dơning inh gô ăn lep truh tơ jơ̆p-jang lăm char ih;

⁵lep gô jruh 'bĕnh-'bang kơpal teh lăng teh mah ưh pă 'bôh sư gô kăp pơđĭ dôm tơmam kiơ mă oei đei đơ̆ng rŏng kơ 'mi prĕl preh; sư kư̆m kăp pơđĭ dôm lu 'long chăt tơ mir na ih,

⁶lep gô mơ̆t 'bĕnh lăm hnam ih, lăm hnam đĭch đam ih păng lăm hnam dơnŏ lu bơngai Êyiptơ: Lu đe yă, 'bok, kư̆m ưh tam lah 'bôh ôh đơ̆ng sơ̆ khơ̆ dang ei đei tơdrong truh thoi 'nâu. Na Môis lĕch wih đơ̆ng Pharaôn.

⁷Lu bơngai bơ̆jang kơ Pharaôn khan kơ sư. Truh dĭng dang yơ bơngai âu mă lê̆ hơ'năk hơđong kơ lu bơ̆n? Jah achăng lê̆ lu kon pơlei noh năm bĕ, wă kơ lu sư kơkuh kơ Kră Yang 'Bok Kei-Dei lu sư! Pơtao ưh tam băt hă dêh Êyiptơ đei tơdrong răm đĭ boih.

⁸Thoi noh đe krao dơ̆ng Môis păng Arôn năm tơ Pharaôn; na Pharaôn khan kơ bre sư: Năm kơkuh kơ Kră Yang 'Bok Kei-Dei lu iĕm bĕ; đe bu wă năm?

⁹Môis tơl khan: Lu nhôn năm, gô chông đĭ-đăng lu kon drŏ-nglo drŏ-kăn 'lơ̆p 'lŏ hơmuh hơmŏng păng lu kră, khŭl triu, rơmo, yua kơ lu nhôn, wă hơmet tơmam et sa tih kơkuh kơ Kră Yang.

¹⁰Pharaôn khan, apinh Kră Yang oei hơdai hăm lu iĕm! Mưh mah inh đei ăn kơ lu iĕm năm pơđĭ kon hơ'lơ̆p drŏ-kăn kơchăng bĕ, yua kơ lu iĕm đei chă đon kơnê̆ dêh!

¹¹Ưh kơ gơh ôh, dôm lu iĕm drŏ-nglo đĕch năm kơkuh kơ Kră Yang, kiơ̆ kơ lu iĕm apinh. Đơ̆ng noh lu sư puh hloi Môis păng Arôn lĕch đơ̆ng Pharaôn.

¹²Kră Yang khan kơ Môis yơ̆r ti ih tơklă tơ dêh Êyiptơ wă kơ lep năm jơ̆p kơ dêh 'noh, kăp đĭ hla 'nhĕt hla 'nhot păng dôm tơmam kiơ tơ kơpal teh mă đơ̆ng 'mi prĕl oei lon.

¹³Thoi noh Môis yơ̆r hloi 'long jra sư tơklă tơ dêh Êyiptơ, Kră Yang ăn kial đơ̆ng gah hơlĕch dơhlu tơ dêh Êyiptơ prăt năr prăt măng. Truh pơgê dơning kial đơ̆ng hơlĕch tơthu anhăk ba lep truh tơ 'noh hloi.

¹⁴Lep jruh jơ̆p-jang lăm dêh Êyiptơ, sư jur 'bĕnh-'bang tơ lăm dêh noh. Lơlap lơlang, ưh tam mă đei ôh lep đơ̆ng sơ̆ khơ̆ ning-mônh đei lơ thoi noh.

¹⁵Lep 'bĕnh-'bang jơ̆p-jang kơpal teh tơ lăm dêh Êyiptơ. Păng đei lăm dêh char jing găm ngăl, kăp sa đĭ lu hla 'nhĕt 'nhot sa tơ anih tơmăn glă păng plei 'long sa mă đơ̆ng 'mi prĕl oei lon; jơ̆p tơ lăm dêh Êyiptơ ưh pă đei hla 'nhĕt 'nhot hla 'long tơ mir, tơmăn glă gơh bluh dơ̆ng boih.

¹⁶Thoi noh Pharaôn hăt hot krao Môis păng Arôn na khan: Inh pơm yoch hăm Kră Yang 'Bok Kei-Dei lu iĕm păng hăm măr iĕm hai.

¹⁷Dang ei, apinh ih mơnat ăn kơ inh pă minh wơ̆t 'nâu; păng krao khan bĕ kơ Kră Yang 'Bok Kei-Dei lu iĕm, wă kơ sư iŏk lê̆ đơ̆ng inh tơdrong pơrăm krưp 'nâu.

¹⁸Môis lĕch hloi đơ̆ng hnam Pharaôn păng krao khan kơ Kră Yang.

¹⁹Kră Yang ăn kial đơ̆ng gah bơmơ̆t truh tih tơpă, dơhlu anhăk lep tơhuŏng lê̆ tơ đak dơsĭ 'brê; jơ̆p kơ anih lăm dêh Êyiptơ ưh pă đei minh pôm lep ayơ dơ̆ng.

²⁰Mă-lei Kră Yang pơm ăn kơ Pharaôn oei arăng kơ̆l, sư kư̆m ưh kơchăng lê̆ ăn kon pơlei Isơrael năm ôh.

²¹Kră Yang khan kơ Môis: Athei yơ̆r ti ih tơ plĕnh, wă kơ tơ jơ̆p-jang dêh Êyiptơ đei tơdrong măng mu hơ'bơ̆l gueo truh kơ lu sư chă hơbơ̆ pă bang,

²²Na Môis yơ̆r ti sư tơ plĕnh, đei măng mu măng klăm gueo dêh hloi lăm pêng năr tơ dêh Êyiptơ;

²³lăm pêng năr noh lu đe ưh kơ gơh 'bôh dih băl ưh kơ đei bu gơh chă rơrĭ tơ nai. Mă-lei lăm tơring kon pơlei Isơrael oei tơ noh đei hơdah jơ̆p-jang.

²⁴Pharaôn krao hloi Môis păng khan: Lu iĕm năm kơkuh bĕ kơ Kră Yang: Chông ba lu kon hơ'lơ̆p lu iĕm năm hơdai; oei pă khŭl kon triu, kon rơmo đĕch lê̆ tơ âu.

²⁵Mă-lei Môis tơl khan: Ih ăn bĕ kơ lu nhôn kon sem dơrong pơm tơmam soi sơmah pơyơ̆r 'buh ăn kơ Kră Yang 'Bok Kei-Dei lu nhôn.

²⁶Lu khŭl sem dơrong kư̆m gô kiơ̆ lu nhôn mơ̆n, ưh kơ đei wă lê̆ minh kơchôp jơ̆ng ayơ; yua kơ lu nhôn wă iŏk pơyơ̆r sem dơrong 'noh wă kơkuh kơ Kră Yang 'Bok Kei-Dei lu nhôn; lu nhôn băt rơih iŏk kiơ wă yua kơkuh kơ Kră Yang, mưh lu nhôn truh tơ noh.

²⁷Mă-lei Kră Yang pơm kơ Pharaôn arăng kơ̆l, na sư ưh kơ chu ăn ôh kon pơlei Isơrael năm.

²⁸Pharaôn khan kơ Môis lĕch wih bĕ đơ̆ng inh! Kơchăng bĕ! 'Nĕ pă năm tơ'bơ̆p inh dơ̆ng. Năr ayơ ih năm tơ'bơ̆p inh, năr 'noh inh gô pơlôch Ih!

²⁹Môis khan: Ih pơma trŏ boih; inh ưh pă wă tơ'bơ̆p ih dơ̆ng ôh.