Read bahnar Le 11 Bible Online

Le 11 - bahnar bible

Le 11

¹Kră Yang khan kơ Môis: Inh gô ăn tơdrong truh dơ̆ng kơ Pharaôn păng dêh Êyiptơ; đơ̆ng noh sư gô achăng lê̆ lu iĕm năm. Mưh sư ăn kơ lu iĕm năm, sư kư̆m gô pơpuh lu iĕm lĕch đĭ đơ̆ng anih 'nâu.

²Na athei roi bĕ kơ kon pơlei păng pơkă khan wă kơ rim 'nu lu sư mă drŏ-nglo dah drŏ-kăn athei apinh lu bơngai jih 'ma sư dôm tơmam gĭt păng hu, dah maih.

³Kră Yang pơm ăn kon pơlei pơla đei tơdrong mơnat 'bơ̆t anăp lu bơngai Êyiptơ; Môis kư̆m minh 'nu bơngai đe băt ư-ang lăm dêh Êyiptơ, 'bơ̆t anăp lu bơngai bơ̆jang kơ Pharaôn păng 'bơ̆t anăp lu kon pơlei noh.

⁴Môis khan: Kră Yang đei khan thoi âu; kơplah tŏk-bŏk măng kơnh inh gô năm jơ̆p tơ lăm dêh Êyiptơ.

⁵Na đĭ-đăng kon kơdră drŏ-nglo lăm dêh Êyiptơ gô lôch, iŏk đơ̆ng kon drŏ-nglo Pharaôn mă oei 'bơ̆t tang-dŏ pơtao, truh tơ đĭ-đăng kon đĭch, đam drŏ-kăn lu sư mă ala hloh păng đĭ lu kon sem dơrong sư su blŭng-a kư̆m lôch.

⁶Lăm jơ̆p dêh Êyiptơ gô đei ôr krao nhơ̆m hmoi, đơ̆ng sơ̆ khơ̆ dang ei ưh tam mă đei păng kư̆m ưh kơ wă layơ gô đei thoi âu dơ̆ng.

⁷Mă-lei, lăm đĭ-đăng kon pơlei Isơrael hiôk-hian mă đơ̆ng kon kŏ kư̆m gô ưh kơ kuăl, mă kon bơngai, mă sem dơrong; wă kơ lu iĕm băt kơ Kră Yang ăn kơ kon pơlei Isơrael hăm bơngai Êyiptơ phara.

⁸Đĭ-đăng lu đĭch đam ih gô năm truh tơ inh, kơkuh 'bơ̆t anăp inh khan: Năm bĕ, ih hăm đĭ-đăng kon pơlei kiơ̆ ih! Đơ̆ng noh inh gô năm. Môis lĕch hloi đơ̆ng Pharaôn lăm jơhngơ̆m sư ơh blĕk dêh tơpă.

⁹Kră Yang khan kơ Môis: Pharaôn ưh wă chu ôh, wă lê̆ kơ Inh pơm tơdrong mơsêh hlĭch pơthim lơ lăm dêh Êyiptơ.

¹⁰Môis păng Arôn pơm tơdrong mơsêh 'nâu 'bơ̆t anăp Pharaôn; mă-lei yua kơ Kră Yang pơm kơ Pharaôn arăng kơ̆l, na sư ưh achăng lê̆ kon pơlei Isơrael năm lĕch đơ̆ng dêh sư.