Read bahnar Le 12 Bible Online

Le 12 - bahnar bible

Le 12

¹Tơ dêh Êyiptơ, Kră Yang khan kơ Môis păng Arôn:

²Khei 'nâu wă pơm khei blŭng-a kơ lu iĕm; wă khan khei mônh lăm sơnăm.

³Athei roi ăn kơ đĭ-đăng kơ lu bơngai Isơrael thoi âu: Truh năr mơjĭt khei 'nâu, rim 'nu bơngai drŏ-nglo lăm hnam dơnŏ athei rôp minh pôm triu kon. Rim hnam dơnŏ minh pôm kon triu kon.

⁴Tơdah hnam ayơ mă bơngai tŏ sĕt sa ưh kơ đĭ minh pôm triu kon, athei rôp minh pôm hơdai hăm hnam dơnŏ lăm bôl buăl rông 'bôt iĕm, kiơ̆ kơ̆l bơngai; păng athei jô̆ hơdôm tŏ triu kon kiơ̆ kơ bơngai kĕ sa pơđĭ.

⁵Lu iĕm athei rôp lăm khŭl kon triu dah kon bơbe tơno mă 'lơ̆ng ưh kơ đei rơka rơkĕch kiơ. Tôm minh sơnăm.

⁶Đơ̆ng noh lu iĕm rong lê̆ truh năr mơjĭt-puăn khei 'nâu; na đĭ-đăng lu bơngai Isơrael athei rôp ba 'bet pơlôch til kơsơ̆ măng.

⁷Lu sư gô iŏk pham pik 'bar pah jrăng dơ̆ng 'măng păng 'long găn kơpal lăm hnam ayơ mă sa 'nhĕm triu kon 'noh.

⁸Măng 'noh lu sư gô sa 'nhĕm kon triu 'buh phang hăm 'bĕng ưh kơ đei 'buih păng hla 'nhot tăng.

⁹Lu iĕm lê̆ kơ sa 'nhĕm oei adrih dah pai hăm đak, mă-lei iĕm athei 'buh kơpal ŭnh ngăl mă kơ̆l, jơ̆ng păng klak sư.

¹⁰Lu iĕm 'nĕ sa 'măn truh tơ pơgê dơning; mă-lei tơdah oei đei rơkah athei 'buh pơđĭ lê̆:

¹¹Lei iĕm sa 'nhĕm noh thoi âu: Gơhret tơlei tơ̆n mă kơjăp, jơ̆ng 'bot chơkhŏ, ti chĕp 'long jra, sa hăt hot; 'noh wă khan năr giĕng Kră Yang Năm Brih.

¹²Lăm măng noh inh gô năm tơ jơ̆p-jang dêh Êyiptơ, pơrăm rim kon kơdră drŏ-nglo đơ̆ng kon bơngai truh tơ kon sem dơrong; păng Inh gô sek phak lu rup yang lăm dêh Êyiptơ; Inh boih Kră Yang.

¹³Pham pik wă kơnăl tơ hnam lu iĕm oei, tơdah Inh 'bôh pham 'noh, lei gô năm yoh, ưh kơ đei tơdrong jĭ apoh truh pơrăm lu iĕm. Kơplah Inh pơrăm dêh Êyiptơ.

¹⁴Lu iĕm athei chih răk năr âu wă kơ iĕm 'blŏk ling-lang; truh tơ rim jơhnơr athei wei pơm giĕng ăn kơ Kră Yang, wă khan minh tơdrong giĕng pơjing tơtă ling-lang.

¹⁵Lăm tơpơh năr athei sa 'bĕng ưh kơ đei 'buih pông Lăm năr blŭng-a, athei iŏk hŭt lê̆ 'buih đơ̆ng lăm hnam lu iĕm; tơdah bơngai bu sa 'bĕng đei păng 'buih pông đơ̆ng năr blŭng-a mă truh tơ năr tơpơh, lei đe gô puh tơweh bơngai 'noh đơ̆ng lu bơngai Isơrael.

¹⁶Năr blŭng-a, lu iĕm athei đei năr akŭm 'lơ̆ng rơgoh păng truh năr tơpơh lu iĕm gô akŭm lei-lăi mơ̆n. Lăm năr noh ưh gơh jang tơdrong kiơ, lăp gơh pai hơmet tơmam sa ăn kơ rim 'nu sa đĕch.

¹⁷Wă kơ lu iĕm athei wei pơm giĕng sa 'bĕng ưh kơ đei 'buih pông, yua kơ năr âu mơ̆n Inh chông lu iĕm lĕch đơ̆ng dêh Êyiptơ; yua kơ thoi noh na lu iĕm athei wei răk năr 'nâu truh rim jơhnơr thoi minh tơdrong tơtă ling-lang hlŏng hloi.

¹⁸Năr mơjĭt-puăn lăm khei mônh, tơtil kơsơ̆, lu iĕm gô sa 'bĕng ưh kơ đei 'buih pông truh tơ năr 'bar-jĭt mônh khei 'noh.

¹⁹Lăm tơpơh năr 'nĕ ăn đei 'buih pông tơ hnam lu iĕm; yua kơ bơngai bu, bơngai dêh iĕm, tơdah bơngai tơmoi bu sa 'bĕng đei 'buih pông gô puh tơweh sư đơ̆ng bơngai Isơrael.

²⁰'Nĕ sa 'bĕng đei 'buih pông; jơ̆p kơ anih lu iĕm oei athei sa 'bĕng ưh kơ đei 'buih pông ngăl.

²¹Đơ̆ng noh, Môis krao akŭm lu kră bơngai Isơrael na khan kơ lu sư. “Năm bĕ rôp minh pôm triu kon đơ̆ng lăm khŭl kiơ̆ kơ hnam dơnŏ lu iĕm păng pơlôch sư pơm giĕng Năm Brih.

²²Na athei iŏk minh hơchô̆ hla bơngăl, djrŭ lăm pham đe mong lăm kơthao, na pik tơ jrăng 'bar pah 'măng hnam păng jrăng găn kơpơ̆ng, na lăm lu iĕm 'nĕ ăn bơngai bu lĕch tơ 'nguaih kơ 'măng hnam truh tơ pơgê dơning.

²³Kơplah Kră Yang gô năm wă pơlôch bơngai Êyiptơ; mưh sư 'bôh pham tơ jrăng găn kơpơ̆ng 'măng păng 'bar pah jrăng dơ̆ng 'măng, Kră Yang gô năm yoh hloi; ưh kơ ăn linh jang mơ̆t pơlôch lăm hnam lu iĕm.

²⁴Iĕm athei bơwei tơdrong giĕng 'nâu thoi lĕ tơdrong juăt tơtă ling-lang ăn kơ lu iĕm păng kon sâu lu iĕm.

²⁵Layơ lu iĕm mơ̆t boih lăm dêh mă Kră Yang ăn kơ lu iĕm, thoi nơ̆r Kră Yang đei pơkă, lei iĕm athei bơwei tơdrong giĕng 'nâu.

²⁶Mưh kon sâu lu iĕm apinh khan: Tơdrong giĕng 'nâu wă khan kiơ?

²⁷Iĕm athei tơl khan: ‘'Noh wă khan tơdrong pơm giĕng Năm Brih đơ̆ng Kră Yang, kơplah Kră Yang pơrăm lu bơngai Êyiptơ na Kră Yang năm brih rim hnam kon pơlei Isơrael păng pơklaih hnam lu bơ̆n tơpă.’ ” Lăp kon pơlei kơtơ̆ng na kŭp kơ̆l drap kơkuh.

²⁸Kon pơlei Isơrael pơm kiơ̆ thoi nơ̆r Kră Yang tơtă boih kơ Môis păng Arôn.

²⁹Kơplah tŏk-bŏk măng Kră Yang pơlôch đĭ lu kon kơdră drŏ-nglo dêh Êyiptơ, iŏk đơ̆ng kon kơdră pơtao Pharaôn oei 'bơ̆t tang-dŏ truh tơ kon kơdră đe rôp pơm bơnă kon pơlei hmă păng đĭ-đăng lu kon sem dơrong tuh blŭng-a.

³⁰Pharaôn iung kơplah oei măng, hăm lu bơngai jang kơ sư păng đĭ-đăng bơngai Êyiptơ, đei nơ̆r nhơ̆m hmoi rơông rơang lăm dêh Êyiptơ, yua ưh kơ đei minh pôm hnam ayơ mă ưh kơ đei bơngai lôch.

³¹Lĕch đơ̆ng Êyiptơ lăm măng noh mơ̆n, Pharaôn krao hloi Môis păng Arôn na khan: Iung bĕ, măr iĕm păng kon pơlei Isơrael jah weh đơ̆ng kon pơlei inh, năm kơkuh kơ Kră Yang, kiơ̆ thoi lu iĕm apinh.

³²Na chông puh ba rơmo păng triu kư̆m năm, thoi lu iĕm đei khan na năm bĕ; păng krao khan kơ inh đei pŭn hiôk mơ̆n.

³³Bơngai Êyiptơ pơpuh kon pơlei Isơrael lĕch đơ̆ng dêh sư mă tĕnh tĕnh, yua kơ lu sư khan: Lu nhôn gô lôch đĭ. Tơdah lu iĕm ưh kơ năm.

³⁴Na đĭ-đăng kon pơlei Isơrael chĕp ba hloi tơpŭng pơm 'bĕng hlôi jrâu boih mă ưh tam đei păng 'buih pông păng chĕp pơđĭ dôm kơthŭng jrâu tơpŭng tah lăm ao 'mi tôi tơ hơngiĕng kơdih lu sư.

³⁵Lu kon pơlei Isơrael pơm kiơ̆ lei-lăi thoi nơ̆r Môis tơtă. Lu sư apinh dôm tơmam gĭt, hu dah maih truh kơ ao tai đơ̆ng lu bơngai Êyiptơ.

³⁶Kră Yang pơm ăn kơ kon pơlei Isơrael đei tơdrong mơnat 'bơ̆t anăp lu bơngai Êyiptơ, na ăn kơ lu sư. Kiơ̆ thoi lu sư apinh. Thoi noh kon pơlei Isơrael tơgar iŏk đĭ-đăng tơmam đơ̆ng bơngai Êyiptơ.

³⁷Kon pơlei Isơrael năm đơ̆ng pơlei Ramse truh tơ pơlei Sukôt, ưh kơ đei jô̆ lu bơngai drŏ-kăn păng lu hơ'lơ̆p, đĭ-đăng đei tơdrâu-hrĕng rơbâu 'nu bơngai drŏ-nglo.

³⁸Kŭm đei lơ adrĕch adrung nai năm hơdai, hăm lu sư kư̆m đei chông ba lơ kon triu, rơmo păng sem dơrong.

³⁹Lu sư pơm 'bĕng ưh kơ đei 'buih pông tơpŭng mă lu sư chĕp ba đơ̆ng dêh Êyiptơ. Tơpŭng ưh kơ đei hrâu 'buih pông ôh yua kơ đe puh lu sư hăt hot dêh lĕch đơ̆ng dêh Êyiptơ, ưh kơ gơh hiơ̆ păng kư̆m ưh kơ đei hơmet hiă lê̆ tơmam sa kơdih.

⁴⁰Kon pơlei Isơrael oei tơ lăm dêh Êyiptơ đunh đei puăn-hrĕng pêng-jĭt sơnăm.

⁴¹Lăp tôm puăn-hrĕng pêng-jĭt sơnăm boih, lăm năr noh boih, lu linh Kră Yang lĕch đơ̆ng dêh Êyiptơ.

⁴²Măng noh Kră Yang dui pơklaih kon pơlei Isơrael lĕch đơ̆ng dêh Êyiptơ; yua kơ thoi noh rim jơhnơr, đĭ-đăng kon pơlei Isơrael athei răk 'blŏk lăm măng noh, wă kơkuh pơyom kơ Kră Yang.

⁴³Kră Yang khan kơ Môis păng Arôn: 'Nâu boih tơdrong juăt gah giĕng Năm Brih: Bơngai tơmoi ưh kơ gơh sa giĕng noh ôh.

⁴⁴Na gah lu bơngai đĭch, iĕm 'nao răt păng jên păng athei kăt tơdra akar kơ sư, na lu sư gơh sa.

⁴⁵Lu bơngai tơmoi păng bơngai bơ̆jang apah kư̆m ưh kơ gơh sa giĕng 'noh ôh.

⁴⁶Giĕng noh 'nhĕm gơh sa lăm hnam đĕch; ih 'nĕ chĕp 'nhĕm lĕch tơ 'nguaih păng kư̆m 'nĕ pơm tơgơ̆ minh pôm kơting ayơ.

⁴⁷Ăn đĭ-đăng Isơrael athei akŭm bơwei 'blŏk giĕng Năm Brih.

⁴⁸Tơdah đei minh 'nu bơngai tơmoi ayơ oei hơdai lăm hnam iĕm, mă 'maih pơm 'blŏk hơdơ̆r giĕng Năm Brih Kră Yang, lei lu bơngai drŏ-nglo lu sư athei kăt tơdra akar; đơ̆ng noh na lu sư gơh năm pơm giĕng Năm Brih 'nâu păng gơh jô̆ thoi bơngai tơpŭ lăm char Isơrael. Mă-lei bơngai bu ưh kơ chu kăt tơdra akar, lei ưh kơ gơh sa ôh.

⁴⁹Kŭm đei lei-lăi minh tơdrong juăt ăn lu bơngai tơpŭ lăm dêh iĕm hăm bơngai tơmoi ayơ truh oei hơdai hăm lu iĕm.

⁵⁰Đĭ-đăng kon pơlei Isơrael lu sư pơm kiơ̆ thoi noh; kiơ̆ thoi Kră Yang tơtă ăn kơ Môis păng Arôn boih.

⁵¹Kŭm lăm năr 'noh Kră Yang chông tơlĕch pơklaih kon pơlei Isơrael, kiơ̆ kơ khŭl linh, lĕch đơ̆ng dêh Êyiptơ.