Read bahnar Le 16 Bible Online

Le 16 - bahnar bible

Le 16

¹Lăm năr mơjĭt-pơđăm khei 'bar, đơ̆ng rŏng kơ lĕch đơ̆ng dêh Êyiptơ, lu bơngai Isơrael lĕch đơ̆ng anih Êlim năm truh tơ tơmăn glă Sin oei tŏk-bŏk Êlim păng Sinai.

²Lu bơngai Isơrael hil jŏk kơ Môis păng Arôn tơ tơmăn glă,

³Lu bơngai Isơrael khan kơ bre sư: Ô! Kơtrơ̆m lu nhôn jah lôch lăm tơpang ti Kră Yang tơ dêh Êyiptơ đĕch, kơplah oei jê̆ gŏ 'nhĕm păng sŏng sa phĭ! Mă-lei măr iĕm chông ba lu nhôn năm tơ tơmăn glă 'nâu wă kơ lu nhôn lôch đĭ kơ pơngot.

⁴Kră Yang khan kơ Môis: Inh gô ăn 'bĕng đơ̆ng plĕnh jur thoi 'mi kơ lu iĕm. Kon pơlei gô năm rim năr dônh, dônh tôm mah sa kơ năr 'noh, Inh wă pơlong lăng lu sư hăm đei pơm kiơ̆ thoi Inh athei dah ưh.

⁵Truh năr mă tơdrâu, kon pơlei gô dônh lơ hloh 'bar wơ̆t kơ lu sư juăt kơ dônh rim năr.

⁶Thoi noh Môis păng Arôn khan kơ đĭ-đăng kon pơlei Isơrael: Gơsơ̆ kơnh lu iĕm gô băt kơ Kră Yang dui ba lu iĕm lĕch đơ̆ng dêh Êyiptơ,

⁷Na pơgê dơning lu iĕm gô 'bôh tơdrong ư-ang tih Kră Yang, yua kơ Sư kơtơ̆ng boih nơ̆r lu iĕm hil jŏk kơ Sư, lu nhôn âu bu na mă lu iĕm mah hil jŏk kơ lu nhôn?

⁸Môis khan dơ̆ng: Lu iĕm gô 'bôh Kră Yang ăn 'nhĕm sa kơsơ̆ 'nâu, 'bĕng sa pơgê dơning, yua kơ Kră Yang kơtơ̆ng boih nơ̆r lu iĕm hil jŏk kơ Sư. Lu nhôn âu bu? Dôm nơ̆r lu iĕm hil jŏk ưh kơ trŏ kơ hil jŏk kơ lu nhôn ôh, mă tơpă noh iĕm hil jŏk kơ Kră Yang.

⁹Môis khan kơ Arôn: Khan bĕ kơ đĭ-đăng kon pơlei Isơrael: Năm jê̆ 'bơ̆t anăp Kră Yang, yua kơ Sư kơtơ̆ng boih nơ̆r lu iĕm jŏk hil.

¹⁰Kơplah Arôn oei pơma hăm kon pơlei Isơrael, lu sư lăng tơ gah tơmăn glă, 'bôh tơdrong ư-ang rang hơdah tih Kră Yang tơ hơmơ̆l.

¹¹Kră Yang khan kơ Môis:

¹²Inh kơtơ̆ng boih nơ̆r kon pơlei Isơrael hil jŏk. Na ih athei khan kơ lu sư: Gơsơ̆ kơnh lu iĕm gô sa 'nhĕm hrăp; pơgê dơning lu iĕm gô sa 'bĕng phĭ rơkah; na lu iĕm gô băt Inh boih Kră Yang 'Bok Kei-Dei lu iĕm.

¹³Lăp truh kơsơ̆, đei sem wăt jruh kôp 'bĕnh jơ̆p kơ anih; truh pơgê dơning đei tŭk gom jơ̆p kơ anih lu sư pơdơh.

¹⁴Wă tŭk đak ngom noh hach boih, kơpal teh tơ tơmăn glă 'bôh đei kiơ iĕ, hmŏng thoi prĕl.

¹⁵Lăp kon pơlei Isơrael 'bôh tơmam noh, lu sư apinh dih băl: Kiơ 'noh? Yua kơ lu sư ưh kơ băt ôh tơmam 'noh yă kiơ. Môis khan kơ lu kon pơlei: “'Noh 'bĕng mă Kră Yang ăn kơ lu iĕm sa.

¹⁶'Nâu tơdrong Kră Yang tơtă: ‘Rim 'nu lu iĕm athei dônh 'bĕng noh tôm kơ mah sa năr noh, minh ômera kơ rim 'nu, kiơ̆ kơ mah sa rim 'nu bơngai lăm bơsŭn iĕm dôm yơ.

¹⁷Kon pơlei Isơrael pơm hloi thoi noh; phŏ bơngai dônh lơ, mơ'nah bơngai dônh tŏ sĕt,

¹⁸Lu sư kŏng hăm ômer, bu dônh lơ kư̆m ưh kơ rơkah, bu dônh tŏ sĕt kư̆m huay ưh kơmah, rim 'nu bơngai dônh lăp kơ sa mah.

¹⁹Môis khan kơ lu sư: 'Nĕ kơ 'măn lê̆ truh pơgê.

²⁰Mă-lei mơ'nah lu sư ưh kơ mơ̆ng ôh nơ̆r Môis; đei bơngai 'măn truh tơtil pơgê; na đei hrai păng 'bâu ôm. Na Môis hil kơ lu sư.

²¹Na rim pơgê rim 'nu bơngai dônh lăp mah kơ sư sa; lăp truh 'năr tŏ boih na tơmam noh hach đĭ.

²²Truh năr tơdrâu, kon pơlei dônh tơmam sa pơhloh lê̆ 'bar; rim bơngai 'bar ômer. Lu bơngai kră pơgơ̆r năm roi kơ Môis.

²³Sư tơl khan: 'Noh nơ̆r Kră Yang tơtă boih: Dơning jing năr pơdơh, năr Sa'bat 'lơ̆ng rơgoh ăn kơ Kră Yang, phang bĕ tơmam kiơ lu iĕm wă phang, pai bĕ tơmam kiơ lu iĕm wă pai; oei wă 'măn lê̆ truh tơ pơgê dơning.

²⁴Thoi noh kon pơlei 'măn lê̆ hloi truh tơ pơgê dơning, rok thoi Môis đei tơtă; tơmam 'noh ưh kơ đei ôm ôh păng kư̆m ưh kơ đei hrai sa.

²⁵Môis khan: Năr 'nâu sa bĕ tơmam 'noh, yua kơ năr 'nâu năr Sa'bat Kră Yang; năr 'nâu lu iĕm chă ưh kơ đei ôh tơmam noh tơ kơpal teh.

²⁶Lu iĕm dônh lăm tơdrâu năr; mă-lei năr mă tơpơh năr Sa'bat, ưh pă đei 'bĕng noh ôh.

²⁷Năr tơpơh đei lu bơngai lăm kon pơlei lĕch wă chă dônh 'bĕng noh, mă-lei lu sư chă ưh kơ 'bôh ôh.

²⁸Kră Yang khan kơ Môis: Lu iĕm ưh kơ chu yom wei răk nơ̆r tơtă păng khôi juăt Inh dĭng truh dang yơ dơ̆ng?

²⁹Athei tơchĕng lăng, Kră Yang ăn boih kơ lu iĕm năr Sa'bat; na lei, truh năr tơdrâu Kră Yang ăn kơ lu iĕm 'bĕng sa mah kơ 'bar năr. Wă kơ rim 'nu bơngai athei oei kơtă anih kơdih, ưh kơ gơh bơngai bu lĕch tơ 'nguaih ôh lăm năr tơpơh.

³⁰Thoi noh, năr tơpơh kon pơlei pơdơh.

³¹Adrĕch adrung Isơrael krao anăn tơmam sa 'nâu mana;b sư thoi găr hla ngo, kok, sa 'ngam thoi 'bĕng pơm hăm đak sut.

³²Môis khan: 'Nâu nơ̆r Kră Yang tơtă: Athei tah mong lê̆ minh ômer mana, wă kơ đĭ-đăng bơngai rim jơhnơr 'bôh 'bĕng Inh 'me lu iĕm tơ lăm char glă, kơplah Inh chông tơlĕch lu iĕm đơ̆ng dêh Êyiptơ.

³³Môis khan kơ Arôn: Athei iŏk minh pôm gĕl tah mong minh ômer mana, pơdơ̆ng lê̆ 'bơ̆t anăp Kră Yang, wă wei răk truh tơ jơhnơr đơ̆ng rŏng.

³⁴Kiơ̆ thoi Kră Yang tơtă kơ Môis, Arôn pơdơ̆ng get 'noh 'bơ̆t anăp hom tơdrong pơgơ̆p.

³⁵Kon pơlei Isơrael sa mana lăm puăn-jĭt sơnăm, tơ̆p truh tơ lu sư mơ̆t oei tơ dêh Kanaan.

³⁶Na, ômer jơ̆ minh lăm mơjĭt êpha.c