Read bahnar Le 2 Bible Online

Le 2 - bahnar bible

Le 2

¹Đei minh 'nu lăm adrĕch adrung Lêwi rôp bơngai adruh Lêwi pơm akăn.

²Drŏ-kăn ei anăp, na tơpŭ kơ minh 'nu kon drŏ-nglo; 'bôh kon drŏ-nglo 'lơ̆ng dêh tơpă, na ôn lê̆ lăm pêng khei.

³Mă sư 'maih ôn đunh hloh kơ noh ră mă-lei ưh kơ gơh boih, na duch ei iŏk minh pôm bai hre, pik chai hơngo, na tơ'bĭch kon nge lăm noh, năm ming ôn sư 'bơ̆t 'nhĕt trang tơter jih lăm đak krong.

⁴Mŏ bơngai nge ei sư dơ̆ng tơmang đơ̆ng ataih wă kơ băt đei thoi yơ.

⁵Na truh kon adruh pơtao Pharaôn năm jur hum tơ đak krong, dôm lu đam sư dăr ngôi kiơ̆ jih đak krong ei; kon adruh pơtao 'bôh bai hre noh tơ lăm 'nhĕt trang na sư krao lu đam sư ei pôk iŏk hơtŏk kơ sư.

⁶Kon adruh pơtao pơih bai 'bôh kon nge drŏ-nglo oei nhơ̆m, sư 'brơ̆k mơnat khan: Âu boih minh 'nu kon lu bơngai Hêbrơ.

⁷Mŏ bơngai nge ei năm roi khan hloi hăm kon adruh pơtao: Ih hăm wă kơ inh năm krao minh 'nu bơngai đơ̆ng lăm bơngai Hêbrơ tơmŏm nge âu dah ưh?

⁸Kon adruh pơtao sư drơ̆ng: “Lei jah năm wăi.” Na mŏ bơngai nge ei năm krao mĕ bơngai nge noh.

⁹Kon adruh pơtao khan kơ sư: “Iŏk bĕ nge âu tơ hnam wei rong tơmŏm sư ăn kơ inh; inh gô apah ih jên wei rong.” Sư pôk kơ'mĭn iŏk nge ei na tơmŏm hloi.

¹⁰Truh wơ̆ 'lŏ wao boih, mĕ sư chông ba sư năm ăn kơ kon adruh pơtao, kon adruh pơtao iŏk pơm kon, sư krao anăn noh Môisa yua kơ sư khan: Đêl inh iŏk pơklaih sư đơ̆ng đak.

¹¹Lăm minh năr, Môis 'lŏ hlôh băt tôm tơdrong boih. Sư năm ngôi tơ lu 'nhŏng oh sư, sư 'bôh tơdrong jang lu 'nhŏng oh sư pơmat-tat; na 'bôh minh 'nu bơngai Êyiptơ tôn teh bơngai Hêbrơ lăm lu 'nhŏng oh sư kơdih,

¹²sư chă lăng jum dăr ưh kơ đei 'bôh bơngai bu, na sư pơlôch bơngai Êyiptơ klaih kơ noh sư 'bŭ ôn lê̆ lăm chuơh.

¹³Truh năr đơ̆ng rŏng, Môis năm tơ noh dơ̆ng, sư 'bôh 'bar 'nu bơngai Hêbrơ tơteh băl, sư khan hăm bơngai mă pơm yoch ei thoi âu: Liơ mă măr iĕm tơteh băl tơduă buăl kơdih?

¹⁴Mă-lei bơngai noh tơl khan: Bơngai bu pôk ih pơm pơtao, pơm tih sek tơlang kơ lu nhôn? Hăm trŏ ih wă pơlôch nhôn thoi lĕ ih pơlôch bơngai Êyiptơ 'noh hă? Môis hli, na khan: Trŏ tơpă, Tơdrong 'nâu rŏ lăng đe băt boih.

¹⁵Pharaôn kơtơ̆ng tơdrong 'noh, sư chă wă pơlôch Môis; Mă-lei Môis klĕnh kơ Pharaôn năm oei tơ dêh Mađian păng tơ noh sư hơ-oei jê̆ đak sơlŭng.

¹⁶Kơplah noh, đei tơpơh 'nu kon adruh 'bok soi dêh Mađian; năm tơ đak sơlŭng noh sŏ đak tuh tơ bơng wă ăn khŭl kon triu 'bă sư nhă.

¹⁷Mă-lei đei lu bơngai wei triu nai truh sư pơpuh lê̆ lu adruh ei tơ nai; Môis gruih iung, sư năm dŏng lu adruh 'noh păng pơnhă ăn hloi khŭl triu ei.

¹⁸Lăp lu kon adruh sư wih tơ hnam Jêthrô 'bă lu sư, jet lu sư: Liơ mă năr 'nâu lu iĕm wih tơ hnam hrôih dêh?

¹⁹Lu sư tơl: Đei minh 'nu bơngai Êyiptơ sư dŏng lu nhôn đơ̆ng lu khŭl bơngai wei triu păng sư kư̆m sŏ đak tơgŭm nhôn pơnhă ăn kơ khŭl triu hloi.

²⁰'Bă lu sư dơ̆ng: Bơngai noh dang ei sư tơ yơ? Liơ mă lu iĕm achăng lê̆ sư? Krao pơtơm sư sŏng sa hăm bơ̆n.

²¹Môis chu oei hơdai hăm lu sư, 'bă lu sư ăn hloi kon adruh sư oei kơ Môis. Anăn sư Sêpôra,

²²Sêpôra tơpŭ kơ minh 'nu kon drŏ-nglo Môis krao anăn sư Gersôm,b yua kơ đei pơma khan: Inh oei tơ lăm char tơmoi.

²³Đunh 'biơ̆ đơ̆ng noh, Pơtao dêh Êyiptơ lôch; Kon pơlei Isơrael ôr krao yua kơ tơdrong pơm đĭch bơ̆jang gleh pơmat-tat: Nơ̆r krao ôr pơmat-tat truh tơ Kră Yang 'Bok Kei-Dei.

²⁴Kră Yang 'Bok Kei-Dei kơtơ̆ng tơdrong ơh sơ'ngon pơmat-tat lu sư, 'blŏk hơdơ̆r tơdrong pơgơ̆p hăm Abraham, Isăk păng Jakôp.

²⁵Kră Yang 'Bok Kei-Dei 'bôh mơnat kơ kon pơlei Isơrael, băt kơ tơdrong truh kơ lu sư pơmat-tat.