Read bahnar Le 21 Bible Online

Le 21 - bahnar bible

Le 21

¹'Nâu tơdrong tơtă ih athei tơbăt ăn kơ kon pơlei pơla:

²Tơdah ih răt đĭch đam bơngai Hêbrơ, sư gô bơ̆jang lăm tơdrâu sơnăm truh sơnăm mă tơpơh gô achăng ăn kơ sư rơngei. Ưh kơ 'mong jên ôh.

³Dah sư mơ̆t minh 'nu lei gô achăng sư minh 'nu dah sư mơ̆t đei akăn, kư̆m achăng tơlĕch hloi hăm akăn sư.

⁴Tơdah tơ'ngla sư chă ăn kơ sư akăn păng dah akăn sư rơneh kon drŏ-nglo dah kon drŏ-kăn, lei sư lĕch rơngei minh drô̆ sư đĕch, kon păng akăn sư gô oei tơ tơ'ngla sư,

⁵mă-lei tơdah đĭch đam sư pơma hơdah; inh 'mêm kơ yŏng tơ'ngla păng kon akăn inh, inh ưh kơ 'maih rơngei ôh,

⁶lei yŏng tơ'ngla sư gô chông ba sư năm 'bơ̆t anăp 'bok sek tơlang đơ̆ng Kră Yang 'Bok Kei-Dei, na athei sư năm jê̆ tơ 'măng dah năm jê̆ jrăng 'măng, đơ̆ng noh tơ'ngla sư athei iŏk kơnho tôt đon sư; na sư gô bơ̆jang kơ tơ'ngla sư dĭng đĭ chăl arih.

⁷Tơdah bơngai bu tĕch kon drŏ-kăn sư pơm đĭch đe, kon drŏ-kăn 'noh ưh kơ gơh rơngei ôh thoi đĭch đam drŏ-nglo,

⁸tơdah tơ'ngla adrol hlôi iŏk đĭch đam pơm akăn, na đơ̆ng rŏng kơ 'noh ưh kơ wă dơ̆ng, lei gơh ăn kơ đe bu mă tĕch sư huai iŏk dơ̆ng, ưh kơ gơh tĕch ăn kơ bơngai tơmoi.

⁹Tơdah tơ'ngla sư wă rơ̆ng kơ kon tơdăm sư, lei athei bơtho tơ'bôh lăng sư nhen thoi kon drŏ-kăn sư kơdih.

¹⁰Tơdah tơ'ngla sư đei iŏk oei kơ bơngai drŏ-kăn nai na gah akăn sư blŭng-a sư ưh kơ gơh tơjur hơtŭch, lê̆ tơmam sa, hơbĕn ao păng tơdrong 'mêm băl klo kăn.

¹¹Na tơdah yŏng tơ'ngla sư ưh kơ pơm kiơ̆ pêng tơdrong 'nâu, lei adruh 'noh gơh rơngei ưh pă kăl kơ 'mong jên huai iŏk.

¹²Bơngai bu teh pơlôch bơngai, đe gô sek tơlang pơlôch sư.

¹³Mă tơdah bơngai 'noh ưh kơ pơrơ̆ng wă pơlôch. Mă-lei yua kơ 'Bok Kei-Dei pơjao bơngai lôch 'noh lăm tơpang ti sư, na Inh gô tơ'bôh ăn kơ sư minh anih wă kơdâu ôn.

¹⁴Tơdah bơngai bu pơrơ̆ng chă đon wă 'maih pơlôch đe. Mă đơ̆ng sư ôn tơ anih chơnang soi kơ Inh, kư̆m athei rôp păng pơlôch sư.

¹⁵Bơngai bu teh 'bă dah mĕ sư kơdih, đe gô sek tơlang pơlôch sư.

¹⁶Bơngai bu rôp tơtông bơngai păng tĕch, dah oei rôp bơwei lăm ti sư, đe gô sek pơlôch sư.

¹⁷Bơngai bu blei hiap 'bă dah mĕ sư kơdih, đe gô sek pơlôch sư,

¹⁸Tơdah đei 'bar 'nu bơngai tơtôn tơteh băl, bơngai âu teh bơngai to păng tơmo dah chok păng ti, ưh kơ mah truh kơ lôch mă-lei sư pă gơh iung,

¹⁹tơdah oei gơh iung chĕp 'long jra năm chă ngôi tơ 'nguaih bơngai mă teh noh đe gô mơnat ăn yoch sư. Mă-lei athei duh jên hơmet tơdrong jĭ kơplah dôm năr sư păn păng rong truh kơ sư klaih praih hiôk pran.

²⁰Tơdah yŏng tơ'ngla iŏk 'long teh đĭch đam sư drŏ-nglo dah drŏ-kăn păng lôch hloi đơ̆ng ti sư, đe kư̆m athei phak tơmal sư,

²¹mă-lei tơdah đĭch đam sư oei arih minh 'bar năr, tơ'ngla sư ưh kơ yoch, yua kơ sư noh tơmam yŏng tơ'ngla sư.

²²Tơdah đei tơtôn tơteh băl, hăm minh 'nu bơngai oei anăp, pơm kơ nge sư huŏng, mă-lei huay kơ đei jĭ răm nai, lei bơngai teh đe 'noh athei duh kiơ̆ kơ klo sư hơgăt păng ăn jên kư̆m kiơ̆ kơ 'bok sek tơlang.

²³Mă-lei tơdah đei tơdrong răm kiơ nai dơ̆ng, na ih gô iŏk răm tơdrong arih 'mong tơdrong arih.

²⁴Răm măt 'mong măt, răm hơnĕnh 'mong hơnĕnh, răm ti 'mong ti, răm jơ̆ng 'mong jơ̆ng.

²⁵Pơtŏk 'mong pơtŏk, pham kơdơ̆k 'mong pham kơdơ̆k, rơka 'mong rơka.

²⁶Tơdah bơngai bu teh 'bơm măt đĭch đam drŏ-nglo dah drŏ-kăn, pơm kơ sư măt tol, athei ăn kơ sư rơngei yua kơ măt sư tol,

²⁷tơdah bơngai bu pơm kơ đĭch đam drŏ-nglo dah drŏ-kăn sư hiong minh pôm hơnĕnh, athei ăn kơ sư rơngei, yua kơ hiong hơnĕnh.

²⁸Tơdah đei rơmo tơ̆m bơngai drŏ-nglo dah drŏ-kăn na lôch hloi, rơmo 'noh athei klơ̆m pơlôch hăm tơmo, mă-lei đe ưh kơ gơh sa 'nhĕm sư ôh, na tơ'ngla rơmo, noh gơh klaih.

²⁹Mă-lei dah rơmo noh juăt kơ gơlŭng tơ̆m đe păng đe roi boih kơ tơ'ngla sư, na tơ'ngla sư oei ưh kơ chĭt wei sư 'mơ̆i, na rơmo noh oei tơ̆m pơlôch minh 'nu bơngai drŏ-nglo dah drŏ-kăn, đe gô klơ̆m pơlôch rơmo noh păng tơmo păng kư̆m pơlôch tơ'ngla sư dơ̆ng mơ̆n.

³⁰Dah đe athei tơ'ngla rơmo 'noh duh, tơ'ngla sư khŏm duh kiơ̆ kơ đe hơgăt.

³¹Tơdah rơmo tơ̆m minh 'nu hơ'lơ̆p drŏ-nglo dah drŏ-kăn, lei đe kư̆m gô pơm kiơ̆ tơdrong juăt 'nâu,

³²tơdah rơmo tơ̆m 'bơm đĭch đam drŏ-nglo dah drŏ-kăn, tơ'ngla rơmo athei duh pêng-jĭt hlak sêikơla jên hu ăn kơ tơ'ngla sư; na rơmo 'noh gô klơ̆m pơlôch păng tơmo.

³³Tơdah bơngai bu pơih 'măng sơlŭng dah mă sir hơlŭng na ưh kơ klơ̆p hơmet, na dah rơmo aseh huŏng tơ lăm noh,

³⁴tơ'ngla sơlŭng gô duh jên ăn kơ tơ'ngla rơmo, mă-lei sem dơrong mă lôch 'noh ăn kơ tơ'ngla sơlŭng.

³⁵Dah rơmo bơngai âu tơ̆m rơmo bơngai nai na lôch hloi, 'bar 'nu bre sư athei tĕch rơmo mă oei arih 'noh, asong băl jên păng asong băl 'nhĕm rơmo mă lôch 'noh mơ̆n.

³⁶Mă-lei tơdah tơ'ngla rơmo băt kơ rơmo sư juăt kơ gơlŭng, dah tơ̆m păng ưh kơ bơngơ̆t wei-lăng, tơ'ngla sư athei iŏk rơmo duh 'mong rơmo arih, mă-lei rơmo lôch 'noh oei lê̆ kơ tơ'ngla sư.