Read bahnar Le 23 Bible Online

Le 23 - bahnar bible

Le 23

¹Ih 'nĕ kơ chă roi hơlĕnh, kư̆m 'nĕ kơ pôm đon kiơ̆ lu bơngai kơnê̆ wă roi hơlĕnh.

²Ih 'nĕ kơ grê kiơ̆ lu bơngai tơpôl lơ wă pơm tơdrong kơnê̆ ôh, tơdah ih wă dơ̆ng pơm kơdranh roi tơdrong kiơ, ih 'nĕ kơ druh kiơ̆ bơngai tơpôl wă 'bơ̆ lê̆ tơdrong tơpăt.

³Ih kư̆m ưh kơ gơh mơ̆t bơngai dơnuh tơdah wă sek tơlang kơ sư.

⁴Tơdah ih tơ'bơ̆p rơmo dah aseh lu bơngai ayăt kơ ih wơ̆l jrok ih athei puh brŏk ăn kơ tơ'ngla sư.

⁵Tơdah ih 'bôh aseh iĕ, tơ'ngla sư mă bơngai areh kơ ih chơ trăp na ưh kơ kĕ, ih 'nĕ kơ pơglăn đĕch, athei tŭn dŏng sư.

⁶Lăm tơdrong sek tơlang 'bơm bơngai dơnuh, ih 'nĕ kơ 'bơ̆ đŏng tơdrong tơpăt.

⁷Ih 'nĕ kơ chu kiơ̆ dôm lu nơ̆r hơlĕnh pơdăr; 'nĕ kơ pơlôch bơngai ưh kơ pơm yoch păng bơngai 'lơ̆ng tơpăt, yua kơ inh ưh kơ đei achăng bơngai kơnê̆ ôh.

⁸Ih 'nĕ kơ iŏk sa pơgâm mŭk tơmam đe, yua kơ iŏk sa pơgâm pơm bơbôl kơ măt bơngai hlôh wao păng bơ̆ đŏng tơdrong bơngai tơpăt.

⁹Ih 'nĕ kơ pơjuă pơđep lu bơngai tơmoi, yua kơ lu iĕm đêl tơmoi tơ dêh Êyiptơ, lu iĕm băt lăm jơhngơ̆m iĕm bơngai tơmoi thoi yơ boih.

¹⁰Lăm tơdrâu sơnăm ih athei rei pơtăm lăm mir ih păng kĕch yuă iŏk,

¹¹mă-lei truh tơ sơnăm mă tơpơh ih ưh kơ choh pơtăm athei lê̆ teh pơdơh. Wă kơ lu bơngai dơnuh hin lăm kon pơlei pơla ih gơh yua iŏk plei đơ̆ng teh 'noh, oei đei đăi dôm yơ, lê̆ kơ sem bri sa kư̆m athei pơm thoi noh gah pơgar hơmu hăm pơgar 'long ôliwơ.

¹²Lăm rim giĕng ih athei bơ̆jang lăm tơdrâu năr, sơmă truh kơ năr mă tơpơh athei pơdơh, wă kơ rơmo păng aseh iĕ ih gơh pơdơh mơ̆n; hăm kon đĭch đam drŏ-kăn păng bơngai tơmoi gơh pơdơh jơhngơ̆m rơhơi.

¹³Ih athei wei răk đĭ dôm nơ̆r inh pơkă kơ ih, 'nĕ kơ chă pơư anăn lu yang nai; 'nĕ kơ tơ'blŏk tơdrong noh đơ̆ng 'bơ̆r ih.

¹⁴Lăm rim sơnăm pêng wơ̆t pơm giĕng et sa kơkuh kơ Inh.

¹⁵Ih athei pơm giĕng et sa 'Bĕng ưh kơ đei 'Buih Pông, athei sa 'bĕng noh lăm tơpơh năr trŏ kơ lăm khei mônh thoi nơ̆r Inh đei pơma pơkă; Yua kơ lăm khei 'noh lu iĕm lĕch đơ̆ng char Êyiptơ ưh kơ đei bu năm 'bơ̆t anăp Inh hăm ti hoh đĕch.

¹⁶Ih athei wei năr 'blŏk hơdơ̆r kơ bơyan phĕ kĕch yuă wă khan bơyan plei 'long blŭng-a đơ̆ng ih bơ̆jang păng dôm adrĕch ih rei boih tơ chŭn mir; păng 'blŏk hơdơ̆r kơ bơyan phĕ kĕch yuă wă hlôi, kơplah lu iĕm đei phĕ kĕch yuă plei đơ̆ng chŭn mir,

¹⁷Pêng wơ̆t lăm minh sơnăm athei đĭ-đăng bơngai drŏ-nglo năm 'bơ̆t anăp Kră Yang, 'Bok Kei-Dei iĕm.

¹⁸Ih 'nĕ pơyơ̆r Pham tơmam soi 'buh hrâu, hăm tơpŭng đei 'buih pông Rơmă wă pơyơ̆r pơyom kơ Inh 'nĕ 'măn truh kơ pơgê.

¹⁹Dôm lu plei bơyan blŭng-a đơ̆ng teh, athei năm ba tơ hnam Kră Yang 'Bok Kei-Dei iĕm, iĕm 'nĕ kơ pai hơbĭ bơbe triu kon lăm đak toh mĕ sư.

²⁰'Nâu Inh wơh minh 'nu linh jang 'lơ̆ng năm adrol adrol kơ iĕm, wă wei-lăng kơplah iĕm yak năm rok trong mơ̆t tơ anih mă Inh đei hơmet boih.

²¹'Bơ̆t anăp sư, ih athei kơchăng păng mơ̆ng kiơ̆ nơ̆r sư 'nĕ kơ sơngah pơjah plơ̆; kơnh sư ưh kơ mơnat ăn tơdrong yoch ih, yua kơ anăn Inh oei lăm sư.

²²Mă-lei tơdah iĕm mơ̆ng kiơ̆ nơ̆r sư păng pơm kiơ̆ dôm nơ̆r Inh bơtho khan, na Inh gô ayăt kơ lu bơngai ayăt kơ iĕm.

²³Linh jang Inh gô năm adrol adrol kơ iĕm, chông ba iĕm mơ̆t tơ char lu bơngai Amôrit, bơngai Hêtit, bơngai Pêrisit, bơngai Kanaan, bơngai Hêwit păng bơngai Jêbus, na inh gô pơrăm lu sư.

²⁴Ih 'nĕ drap kơkuh păng soi sơmah kơ lu yang lu sư, 'nĕ kơ pơm rok kiơ̆ tơdrong jang lu sư, mă-lei athei pơrăm đĭ dôm lu rup yang păng juă pơhĕch dôm lu gơ̆ng rup yang sư.

²⁵Iĕm athei kơkuh kơ Kră Yang 'Bok Kei-Dei iĕm; sư Kră Yang gô tơgŭm iĕm tơmam sŏng sa, ăn kơ iĕm liĕm akâu păng huay kơ đei jĭ jăn.

²⁶Lăm char iĕm gô ưh kơ đei drŏ-kăn hơwŏng păng ưh kơ đei nge rơngăt, Inh gô ăn kơ iĕm arih sot,

²⁷inh gô ăn tơdrong hli krưp Inh năm adrol, pơm kơ lu teh đak hơwơ̆l hơwang, pơm kơ lu ayăt kơ iĕm kơdâu đĭ mưh iĕm năm truh tơ yơ pơm kơ đe hli tơrơ.

²⁸Inh gô ăn ong hơgơ̆r năm adrol blah puh lu bơngai Hêwit, bơngai Kanaan, bơngai Hêtit, weh đơ̆ng anăp iĕm.

²⁹Inh gô ưh kơ puh lê̆ lu sư weh đĭ hloi lăm minh sơnăm ôh, kơnh hli kơ dêh char noh jing bri juơ păng dôm lu sem bri rai chek lar rai lơ gô pơrăm iĕm;

³⁰mă-lei inh gô puh lu sư 'net 'net weh đơ̆ng iĕm, dĭng layơ lu iĕm mă lơ păng gơh wei-lăng dêh noh boih,

³¹Inh gô chĕng hơdral iĕm iŏk đơ̆ng đak dơsĭ 'brê truh tơ đak dơsĭ Philistin, a đơ̆ng char glă truh tơ đak glung tih;b yua kơ inh gô pơjao adrĕch adrung 'noh lăm tơpang ti ih păng ih gô puh lu sư weh đơ̆ng anăp iĕm.

³²Ih 'nĕ kơ pơgơ̆p hăm lu sư, dah hăm yang lu sư.

³³'Nĕ ăn lu sư oei lăm char iĕm ôh, hli kơ lu sư pơhlŭ iĕm pơm yoch hăm Inh na kơkuh kơ yang lu sư; tơdrong noh gô pơm hơđong đăk kơ iĕm.