Read bahnar Le 25 Bible Online

Le 25 - bahnar bible

Le 25

¹Kră Yang khan kơ Môis:

²Athei khan kơ bơngai Isơrael pơyơ̆r tơmam ăn kơ Inh; ih athei iŏk tơmam đơ̆ng bơngai bu đei jơhngơ̆m hiôk pơyơ̆r ăn kơ Inh noh.

³'Nâu tơmam pơyơ̆r ih gô iŏk đơ̆ng lu sư; hu, maih kong,

⁴Brai jơk 'brê hơhĭm, 'brê gôh, che 'bui brai se, che sŏk bơbe, akar triu tơno tong đak 'brê,

⁵akar ka tih, 'long Keo,

⁶đak rơmă plei ôliwơ tơ̆k ŭnh jrĕnh, tơmam wă pơm đak 'bâu phu wă pik wă pơm pơgang 'bâu phu,

⁷Tơmo rang gĭt nai wă pơklep tơ êphot păng che atol tơ kơtơh.

⁸Lu sư gô pơm ăn kơ Inh minh anih kơkuh rơgoh păng Inh gô oei tŏk-bŏk lu sư.

⁹Athei pơm Bơsŭn Anih Akŭm hăm tơmam yua lei-lăi thoi Inh gô tơ'bôh ăn kơ ih.

¹⁰Thoi noh ih athei lu sư pơm minh pôm hom hăm 'long Keo, tor sư 'bar hơgăt minh puăt, wơ̆l minh hơgăt minh puăt păng kơjung sư kư̆m minh hơgăt minh puăt.

¹¹Iŏk maih rơgoh lom pơklep lăm păng đaih păng pơm gơnăp sư tăp dăr păng maih.

¹²Ih kư̆m athei hling puăn tŏ khuen maih 'măn lê̆ tơ puăn pah jơ̆ng mum hom; 'bar tŏ jơ̆ng mum gah âu, 'bar tŏ jơ̆ng mum gah to,

¹³kư̆m pơm 'bar tŏ 'long tơnung hăm 'long Keo, lom hăm maih;

¹⁴na sôr tơmơ̆t tơ lăm bơlôh khuen 'bar pah jơ̆ng mum hom, wă kơ tung hom.

¹⁵'Long tơnung noh lê̆ hloi lăm bơlôh khuen, 'nĕ pă plôh.

¹⁶Ih athei tah lăm hom tơdrong pơgơ̆p khôi juăt nơ̆r mă tơtă Inh gô ăn kơ ih.

¹⁷Ih kư̆m athei pơm minh hlak tơnglơ̆p tơdrong 'mêm mơnat păng maih rơgoh, tor 'bar hơgăt minh puăt, wơ̆l minh hơgăt minh puăt.

¹⁸Kŭm pơm kơtă hloi 'bar tŏ rup chêrubim hăm maih, dan 'bar pah kơ̆l tơnglơ̆p tơdrong 'mêm mơnat,

¹⁹dan hloh tơ 'nguaih, minh pôm rup jih gah âu păng minh pôm rup jih gah to. Ih athei pơm rup chêrubim dan sư tơ 'bar pah jih.

²⁰'Bar tŏ chêrubim gô bơyar pơnăr, klơ̆p kơpal tơnglơ̆p tơdrong 'mêm mơnat, tơwih măt tơklă băl lăng tơpăt tơ tơnglơ̆p tơdrong 'mêm mơnat.

²¹Ih athei dan tơnglơ̆p tơdrong 'mêm mơnat tơ kơpal hom, lăm hom ih tah khôi juăt nơ̆r tơtă Inh gô ăn kơ ih.

²²Inh gô tơ'bơ̆p ih tơ noh, tơ kơpal tơnglơ̆p tơdrong 'mêm mơnat sơlam 'bar tŏ rup chêrubim, tơ kơpal hom tơdrong pơgơ̆p noh Inh gô bơtho tơ'bôh kơ ih dôm tơdrong tơtă kơ lu bơngai Isơrael.

²³Ih athei pơm minh pôm gơ'bang păng 'long keo; tor sư 'bar hơgăt, wơ̆l sư minh hơgăt păng kơjung minh hơgăt minh puăt,

²⁴ih lom păng maih rơgoh păng pơm minh trong gơnăp tăp dăr hăm maih;

²⁵ih pơm 'long găn tăp dăr gơ'bang dang tŏ pah, na pơm gơnăp hăm maih minh trong tăp dăr.

²⁶Đơ̆ng noh ih tah puăn tŏ khuen maih tơ puăn pah mum jơ̆ng gơ'bang.

²⁷Gơwang khuen noh jê̆ 'long găn sư, wă sôr 'long tơnung tung gơ'bang.

²⁸Ih athei pơm 'long tơnung hăm 'long keo, lom păng maih, đe gô yua wă tung gơ'bang noh.

²⁹Ih kư̆m athei iŏk maih rơgoh pơm pơnhan chhĕr, pơnhan, klĭnh păng kơchŏk wă yua tuh tơmam pơyơ̆r huch sa.

³⁰Tơ kơpal gơ'bang ih gô 'măn 'bĕng tơpŭng athei đei ling-lang 'bơ̆t anăp Inh.

³¹Ih athei pơm jơ̆ng ŭnh kơđeng hăm maih rơgoh, jơ̆ng, akâu, 'long pơdơ̆ng, plei hăm pơkao kơđeng pơm đĭ păng maih hơjơ̆m pơiel.

³²'Bar pah akâu ŭnh kơđeng đei tơdrâu tŏ dơng tơ'bla, pêng tŏ dơng tơ'bla gah âu, pêng tŏ dơng tơ'bla gah to.

³³Lăm tơdrâu tŏ dơng tơ'bla sư chăt đơ̆ng jơ̆ng kơđeng rim kơ dơng tơ'bla đei pêng tŏ plei kơchŏk pơm thoi pơkao amandê,a minh pôm rơnôp păng pơkao.

³⁴Kơpal akâu jơ̆ng kơđeng, kư̆m dai đei puăn tŏ plei kơchŏk pơm thoi pơkao amandê đei minh pôm rơnôp păng pơkao sư.

³⁵Lăm tơdrâu tŏ dơng tơ'bla đơ̆ng akâu jơ̆ng ŭnh kơđeng, kư̆ kơ rim 'bar tŏ dơng tơ'bla, tơ ala đei minh pôm rơnôp.

³⁶Rơnôp păng dơng tơ'bla, tơ'bưh hơbĭ pơm hăm maih đe tơtang blat.

³⁷Ih kư̆m athei pơm tơpơh tŏ brai kơđeng đe wă tơ̆k ŭnh kơđeng na pơchrang hơdah tơ anăp.

³⁸Chơkep kăt rơnok brai ŭnh kơđeng păng pơnhan chhĕr dan rơnok sư kư̆m pơm păng maih rơgoh.

³⁹Đe gô yua minh talângb maih rơgoh pơm jơ̆ng ŭnh kơđeng păng tơmam wă yua hơmet sư.

⁴⁰Thoi noh ih athei lăng, kư̆ kơ pơm rok hơbŏ thoi đei tơ'bôh kơ ih boih tơ kơpal kông.