Read bahnar Le 28 Bible Online

Le 28 - bahnar bible

Le 28

¹Lăm lu bơngai Isơrael ih athei rơih iŏk Arôn, 'nhŏng ih hăm lu kon drŏ-nglo sư, Nađap, Abihu, Êlêasar; păng Ithamar; pơjao ăn tơdrong jang pơm 'bok soi bơ̆jang kơ Inh.

²Ih athei pơhrŭk ăn kơ Arôn 'nhŏng ih ao rơgoh 'lơ̆ng, wă kơ pơyom ư-ang.

³Ih athei lu bơngai gơh tanh sĭt hơgei, bơngai mă Inh ăn kơ lu sư gơh hơgei kơ pơm, wă kơ lu sư sĭt ăn kơ Arôn ao, wă kơ sư hrŭk năr đe pôk sư jing 'bok soi, wă kơ sư bơ̆jang kơ Inh.

⁴'Nâu đei lăm ao wă pơm kơ sư: Minh blah bơnal 'băk tơ kơtơh, minh blah êphot, minh blah ao tai, môk păng tơlei tơ̆n, lu sư gô pơm ao rơgoh tơ̆n ăn kơ Arôn, 'nhŏng ih, hăm dôm lu kon drŏ-nglo sư, wă kơ lu sư noh pơm 'bok soi bơ̆jang kơ Inh.

⁵Lu sư gô yua che brai rang hlơ-hlĕch, brai jơk, brai 'brê gôh, 'brê hơhĭm păng che 'bui tanh hăm brai se.

⁶Lu sư gô pơm ao êphot păng brai rang, brai jơk, brai 'brê gôh, 'brê hơhĭm păng che 'bui tanh hăm brai se.

⁷'Bar pah êphot pơm 'bar dăng tơlei 'băk, wă 'băk tơ 'bar pah hơngiĕng. Sĭt pơklep băl, wă kơ sư kơjăp.

⁸Tơlei tơ̆n đe tanh hơbĭ hăm ao êphot wă tơ̆n, đe kư̆m gô pơm păng brai rang iĕ, brai jơk, brai 'brê gôh, 'brê hơhĭm păng che 'bui tanh hăm brai se.

⁹Ih athei iŏk 'bar tŏ tơmo gĭt păng chrek chhơ̆ tơ noh anăn lu kon drŏ-nglo Isơrael.

¹⁰Tơdrâu 'nu anăn lu sư chrek tơ tơmo 'nâu păng tơdrâu 'nu anăn lu sư tơ tơmo to, kiơ̆ kơ năr rơneh kơ lu sư.

¹¹Athei chrek anăn lu kon drŏ-nglo Isơrael tơ 'bar hlak tơmo rang 'noh nhen thoi bơngai chrek tơ tơmam tơdra kơtĭt păng hling maih tơter jih tơmo noh.

¹²Klaih kơ noh tah 'bar tŏ tơmo gĭt tơ tơlei 'băk tơ hơngiĕng wă pơm 'blŏk hơdơ̆r kơ kon drŏ-nglo Isơrael; Arôn gô 'băk anăn lu sư tơ 'bar pah hơngiĕng sư wă kơ 'blŏk 'bơ̆t anăp Kră Yang.

¹³Ih kư̆m athei pơm gơwŏk păng maih.

¹⁴Pơm 'bar dăng rơbưn glang iĕ păng maih rơgoh, thoi tơlei maih 'noh tơmơ̆t lăm kơ gơwŏk.

¹⁵Bơnal iĕ 'băk tơ kơpal kơtơh gah tơdrong sek tơlang, ih kư̆m athei pơm kơ bơnal, nhen thoi êphot. Wă păng brai maih brai jơk, 'brê hơhĭm 'brê gôh păng che 'bui tanh hăm brai se.

¹⁶Bơnal 'băk tơ kơtơh să iĕ tŏ ăi păng sĭt 'bar tăl: Gah tor minh hơđa, gah wơ̆l minh hơđa mơ̆n.

¹⁷Ih tơmơ̆t puăn trong tơmo rang tơ lăm bơnal 'băk tơ kơtơh; trong mă minh tơmo gôh rang Sardis tơmo hlăng Topas, tơmo rang Carbucle.

¹⁸Trong mă 'bar tơmo gĭt Emeral, tơmo gĭt saphir, tơmo jơmŏng.

¹⁹Trong mă pêng tơmo gĭt Jakin, tơmo gĭt Agate, tơmo gĭt amethit.

²⁰Trong mă puăn tơmo gĭt Beril, tơmo gĭt Onit, tơmo gĭt jasper.

²¹Gô đei đĭ-đăng mơjĭt-'bar găr, kiơ̆ kơ lu anăn kon drŏ-nglo Isơrael; tơ kơpal rim kơ găr tơmo rang 'noh đe chrek anăn minh 'nu lăm mơjĭt-'bar adrĕch adrung lu kon drŏ-nglo Isơrael, nhen thoi đe pơm tơmam tơdra kơtĭt 'noh.

²²Ih athei pơm rơbưn glang păng maih rơgoh, thoi tơlei kŭi tơ bơnal 'băk tơ kơtơh;

²³ih athei pơm 'bar tŏ gơwŏk păng maih chô̆ tơ 'bar pah mum gah bơnal 'băk tơ kơtơh,

²⁴ih athei chô̆ 'bar dăng rơbưn maih tah tơmơ̆t tơ 'bar pah gơwŏk tơ 'bar pah kơ̆l 'băk bơnal tơ kơtơh,

²⁵păng 'bar pah kơ̆l rơbưn chô̆ tơmơ̆t tơ lăm gơwŏk maih, na pơkăp tơklep tơ kơpal 'bar pah tơlei 'băk tơ hơngiĕng êphot gah anăp kơtơh.

²⁶Ih athei pơm 'bar tŏ gơwŏk maih dơ̆ng, tơmơ̆t tơ 'bar pah mum kơ bơnal 'băk tơ kơtơh, tơ gah lăm ao êphot.

²⁷Na athei pơm 'bar tŏ gơwŏk maih, pơkăp, pơklep tơmơ̆t tơ 'bar pah tơ tơlei 'băk tơ hơngiĕng ao êphot, tơ gah anăp, tơ kơpal tơlei tơ̆n ao êphot tanh hăm brai se.

²⁸Yua tơlei brai jơk chô̆ bơnal 'băk tơ kơtơh gơwŏk hăm êphot, tah lăm khuen maih wă kơ bơnal 'băk tơ kơtơh păng êphot huay kơ tơpleh.

²⁹Kơplah Arôn mơ̆t tơ anih rơgoh, sư 'băk ba lu anăn kon drŏ-nglo Isơrael, mă anăn đei chrek tơ tơmo tah lăm bơnal 'băk tơ kơtơh gah tơdrong sek tơlang, wă kơ 'blŏk hơdơ̆r ling-lang 'bơ̆t anăp Kră Yang.

³⁰Ih dan lăm bơnal 'băk tơ kơtơh gah tơdrong sek tơlang, Urim hăm Thumim,a wă kơ kơplah Arôn truh 'bơ̆t anăp Kră Yang na dôm tơmam noh gô jê̆ lăm jơhngơ̆m Arôn kơdih, thoi noh Arôn gô yua Urim păng Thumim wă kơ băt sek tơlang lu kon drŏ-nglo Isơrael kiơ̆ thoi Kră Yang wă.*

³¹Ih kư̆m athei sĭt ao tai hrŭk 'nguaih êphot hăm che jơk ngăl.

³²Tơ tŏk-bŏk ao đei minh tŏ bơlôh tơmơ̆t kơ̆l; tăp dăr bơlôh đei lem, wă kơ huay kơ tơhleh.

³³Tơdrơi ao gah ala athei tanh plei gărnăt, jơk, 'brê hơhĭm, 'brê gôh atol hơdai krĕng-nĕng maih tăp dăr kiơ̆ kơ tơnăp,

³⁴wă khan minh tŏ krĕng-nĕng maih na minh pôm plei gărnăt, minh găr krĕng-nĕng păng minh pôm plei gărnăt tơ tăp dăr tơnăp ao.

³⁵Arôn pơm 'bok soi tơm, gô hrŭk ao 'noh păng kơplah sư mơ̆t lăm anih rơgoh 'bơ̆t anăp Kră Yang păng kơplah sư lĕch đơ̆ng anih noh na đe gô kơtơ̆ng krĕng-nĕng re păng băt noh Arôn huay kơ lôch.

³⁶Ih athei pơm minh tŏ plăk maih rơgoh, ih athei chrek nhen thoi đe chrek pơm tơmam tơdra kơtĭt: Pơyơ̆r kơ Kră Yang.

³⁷Klaih kơ noh iŏk minh dăng tơlei brai kŭi jơk sĭt pơklep 'bơ̆t anăp môk.

³⁸Plăk 'noh gô sĭt dan tơ kơpal klĕng Arôn; Arôn pŭ tơdrong yoch lu bơngai Isơrael pơm yoch kơplah lu sư pơyơ̆r tơmam soi 'lơ̆ng rơgoh; plăk 'noh gô pơklep tơ kơpal klĕng Arôn ling-lang wă Kră Yang lăp đon iŏk lu sư.

³⁹Ih athei tanh minh blah ao tai lăm hăm che 'bui brai se, athei pơm minh pôm môk păng che 'bui păng brai se tanh minh dăng tơlei tơ̆n.

⁴⁰Ih kư̆m athei pơm kơ lu kon drŏ-nglo Arôn ao tai, tơlei tơ̆n păng môk, wă kơ pơyom ư-ang 'lơ̆ng rŏ.

⁴¹Đơ̆ng noh, athei iŏk hơbĕn ao 'noh pơhrŭk ăn kơ Arôn, 'nhŏng ih hăm lu kon drŏ-nglo sư; ih athei ăn đak 'bâu phu, kơ lu sư pơm rơgoh, wă kơ pôk lu sư jing 'bok soi gơh jang ăn kơ Inh.

⁴²Ih athei pơm ăn kơ sư hơbĕn iĕ lăm păng che 'bui brai se wă kơ pĕng tơdrong hang-hông sư, hơbĕn noh đơ̆ng kơiĕng truh tơ blu.

⁴³Arôn hăm kon drŏ-nglo sư gô tah hơbĕn 'noh lăm kơplah lu sư mơ̆t tơ Bơsŭn Anih Akŭm dah năm jê̆ chơnang soi wă jang lăm anih rơgoh, kơnh hli kơ lu sư lôch yua kơ hang-hông, tơdrong noh jing tơdrong juăt kơ Arôn păng adrĕch adrung sư pơm ling-lang.