Read bahnar Le 29 Bible Online

Le 29 - bahnar bible

Le 29

¹'Nâu boih tơdrong ih gô pơm, wă kơ sư pơm 'bok soi jang kơ Inh. Ih athei rôp minh pôm rơmo dăm păng 'bar tŏ triu tơno ưh kơ đei rơka.

²Yua tơpŭng ưh kơ đei 'buih pông hrâu păng rơmă ôliwơ păng 'bĕng klang ưh kơ đei 'buih pông; dah pung hăm rơmă ôliwơ. Ih athei pơm 'bĕng noh hăm tơpŭng 'ba mi.

³Ih tah dôm 'bĕng 'noh lăm bai, đơ̆ng noh chĕp ba pơyơ̆r hơdai hloi hăm rơmo dăm păng 'bar tŏ triu tơno noh.

⁴Thoi noh, ih athei chông Arôn hăm lu kon drŏ-nglo sư năm 'bơ̆t anăp 'măng Bơsŭn Anih Akŭm, ih iŏk đak tuh hum lu sư,

⁵Klaih kơ noh, ih athei iŏk hơbĕn ao pơhrŭk ăn kơ Arôn ao tai, ao tai êphot, ao êphot păng bơnal 'băk tơ kơtơh na iŏk tơlei tơ̆n êphot tanh hăm brai se tơ̆n ăn kơ sư.

⁶Ih pơyơ̆l ăn môk tơ kơ̆l sư na pơklep plăk 'lơ̆ng rơgoh tơ môk,

⁷hăm iŏk đak pơgang 'bâu phu hling tơ kơpal kơ̆l sư.

⁸Na ih athei chông lu kon drŏ-nglo Arôn năm jê̆ pơhrŭk ăn kơ lu sư ao tai,

⁹klaih kơ 'noh iŏk tơlei tơ̆n, tơ̆n ăn kơ lu sư păng pơyơ̆l ăn kơ lu kon drŏ-nglo sư môk, na tơdrong jang jing 'bok soi kiơ̆ tơdrong juăt oei ling-lang. Noh boih tơdrong jang mă ih gô pôk ăn kơ Arôn hăm lu kon drŏ-nglo jing 'bok soi.

¹⁰Klaih kơ noh, ih athei dui ba rơmo dăm tơ 'măng Bơsŭn Anih Akŭm, Arôn hăm lu kon drŏ-nglo sư dan ti tơ kơpal rơmo dăm noh.

¹¹Ih athei pơlôch rơmo dăm noh 'bơ̆t anăp Kră Yang; 'bơ̆t 'măng Bơsŭn Anih Akŭm.

¹²Ih iŏk pham rơmo dăm, djrŭ hơnglâu ti ih, pik tơ lu ake chơnang soi.

¹³Ih athei iŏk đĭ-đăng dôm lu rơmă klak, mơ'nhao lom klơm, 'bar tŏ boh-lăn păng rơmă boh-lăn na anhăk năm 'buh tơ kơpal chơnang soi.

¹⁴Mă-lei akar, sĕch păng ĭch rơmo dăm noh athei chĕp 'buh tơ 'nguaih anih pơlei 'noh boih jing tơmam soi huai tơdrong yoch.

¹⁵Ih kư̆m athei rôp minh pôm triu tơno, na Arôn păng lu kon drŏ-nglo sư dan ti lu sư kơpal kơ̆l triu tơno noh;

¹⁶klaih kơ noh ih pơlôch triu tơno noh, iŏk pham sư tơtraih tăp dăr kơ chơnang soi 'noh.

¹⁷Đơ̆ng noh, kăt kơnăt triu tơno noh, ôp rơgoh, klak klơm păng jơ̆ng sư, na 'măn hơdai hăm lu kơnăt kăt boih păng kơ̆l sư;

¹⁸Na 'buh pơđĭ triu tơno noh tơ kơpal chơnang soi; 'noh jing tơmam soi 'buh, đei 'bâu phu pơyơ̆r kơ Kră Yang, wă khan tơmam soi 'buh păng ŭnh pơyơ̆r ăn kơ Kră Yang.

¹⁹Ih athei rôp kon triu tơno mă 'bar na Arôn hăm lu kon drŏ-nglo sư gô dan ti tơ kơpal kơ̆l triu tơno;

²⁰klaih kơ noh pơlôch triu tơno 'noh iŏk pham pik tơ hla đon gah 'ma Arôn păng lu kon drŏ-nglo sư, tơ hơnglâu yŏng tơpang ti 'ma lu sư păng hơnglâu yŏng jơ̆ng; gah 'ma lu sư; pham oei rơkah noh săi tăp dăr chơnang soi.

²¹Ih athei iŏk pham đơ̆ng kơpal chơnang soi păng rơmă pơgang 'bâu phu na tơtraih tơ kơpal akâu jăn păng hơbĕn ao Arôn, hăm tơ kơpal akâu păng hơbĕn ao lu kon drŏ-nglo sư, thoi noh Arôn hăm hơbĕn ao sư, lu kon drŏ-nglo sư hăm hơbĕn ao lu sư gô jing rơgoh 'lơ̆ng.

²²Yua kơ kon triu tơno noh pơm yang pơchĕp ăn tơdrong jang, thoi noh ih athei iŏk rơmă; kiĕng, rơmă klak, mơ'nhao lom klơm, 'bar tŏ boh-lăn păng blu gah 'ma,

²³Păng iŏk minh pôm 'bĕng, minh pôm 'bĕng hrâu hăm rơmă ôliwơ păng minh pôm 'bĕng klang đơ̆ng lăm bai 'bĕng ưh kơ đei 'buih pông 'măn lê̆ 'bơ̆t anăp Kră Yang;

²⁴na dan dôm tơmam 'noh tơ lăm tơpang ti Arôn păng tơ lăm, tơpang ti lu kon drŏ-nglo sư, na tơpơng 'ma 'ngiĕo, noh jing tơmam soi tơpơng 'ma 'ngiĕo 'bơ̆t anăp Kră Yang.

²⁵Klaih kơ noh ih athei iŏk đơ̆ng tơpang ti lu sư, athei ba soh tơ kơpal chơnang soi, tơ kơpal tơmam soi sơmah 'buh, wă kơ 'bâu phu 'bơ̆t anăp Kră Yang, 'noh jing tơmam soi yua soh lăm ŭnh ăn kơ Kră Yang.

²⁶Kŭm athei iŏk kơtơh triu tơno pơm yang pơchĕp ăn kơ Arôn, na tơpơng 'ma 'ngiĕo 'bơ̆t anăp Kră Yang, noh mă gah ih.

²⁷Thoi noh ih athei iŏk 'nhĕm kơtơh păng blu kon triu tơno yua pơm tơmam soi tơpơng 'ma 'ngiĕo, pơm pơchĕp ăn jing 'bok soi kơ 'bok Arôn, hăm dôm lu kon drŏ-nglo sư, wă khan 'nhĕm kơtơh pơyơ̆r 'ma 'ngiĕo boih păng blu yua kơ noh jing tơmam soi pơyơ̆r.

²⁸Tơmam soi 'nâu, đơ̆ng bơngai Isơrael pơyơ̆r ăn kơ Arôn hăm lu kon drŏ-nglo sư sa 'nâu tơmam soi pơyơ̆r đơ̆ng lu bơngai Isơrael pơyơ̆r 'blŏk bơnê hiôk-hian, ăn kơ Kră Yang.

²⁹Hơbĕn ao rơgoh 'lơ̆ng Arôn gô 'măn lê̆ kơ lu kon drŏ-nglo sư đơ̆ng rŏng dơ̆ng, wă kơ lu sư hrŭk ao noh, 'bơ̆t năr đe hling đak rơmă 'bâu phu păng pơchĕp pôk ăn tơdrong jang pơm 'bok soi.

³⁰Bơngai bu lăm kon drŏ-nglo sư pơm 'bok soi tơplih kơ sư, athei hrŭk ao noh lăm tơpơh năr. Mưh sư mơ̆t lăm Bơsŭn Anih Akŭm wă bơ̆jang lăm anih rơgoh 'lơ̆ng.

³¹Klaih kơ 'noh ih athei rôp triu tơno wă pơm tơmam soi pơchĕp pôk tơdrong jang păng pai 'nhĕm 'noh lăm anih rơgoh.

³²'Bok Arôn păng lu kon drŏ-nglo sư gô sa 'nhĕm triu tơno 'noh, hăm 'bĕng đơ̆ng lăm bai 'bơ̆t 'măng Bơsŭn Anih Akŭm.

³³Lu sư gô sa lu tơmam soi noh, tơmam pơklaih đơ̆ng tơdrong yoch, păng lu sư đei pôk jing 'bok soi păng 'măn lê̆ lu sư rơgoh; mă-lei lu bơngai nai ưh kơ gơh sa ôh, yua kơ dôm tơmam 'noh tơmam rơgoh.

³⁴Tơdah 'nhĕm hăm 'bĕng đêl soi sơmah oei rơkah na truh tơ năr dơning, ih athei 'buh hŭt pơđĭ tơ lăm ŭnh, 'nĕ kơ sa, yua kơ tơmam 'noh 'măn lê̆ kơ rơgoh 'lơ̆ng boih.

³⁵'Nâu kiơ̆ kơ tơdrong Inh pơkă, ih athei pơm thoi noh kơ Arôn hăm lu kon drŏ-nglo sư păng ih athei pơm dôm tơdrong noh kơ lu sư lăm tơpơh năr.

³⁶Rim năr ih athei pơyơ̆r minh pôm rơmo dăm pơm tơmam soi tang tơdrong yoch; păng pơm ăn kơ chơnang soi rơgoh, hăm tơdrong sơmah huai đơ̆ng yoch, păng tuh đak 'bâu phu, wă kơ chơnang soi jing 'lơ̆ng rơgoh.

³⁷Lăm tơpơh năr ih athei soi sơmah huai đơ̆ng yoch păng pơm kơ chơnang soi rơgoh wă kơ chơnang soi jing rơgoh 'lơ̆ng hloh, tơdah tơmam kiơ hơtŭt 'bơm kơ chơnang soi kư̆m jing rơgoh 'lơ̆ng.

³⁸'Nâu dôm tơmam ih athei pơyơ̆r tơ chơnang soi; 'bar tŏ kon triu 'nao minh sơnăm, pơm rim năr ling-lang thoi noh.

³⁹Rim pơgê ih athei pơyơ̆r minh pôm, minh pôm ih athei pơyơ̆r til kơsơ̆ kơmăng.

⁴⁰Hăm kon triu mă minh, ih athei pơyơ̆r 'bar lich,a êpha tơpŭng 'ba mi hĕch pơjrâu hăm minh lăm puăn hin,b đak ôliwơ păng iŏk minh lăm puăn hin đak hơmu, jing tơmam pơyơ̆r huch.c

⁴¹Gah kon triu mă 'bar ih athei pơyơ̆r til kơsơ̆ măng hăm tơmam soi tơpŭng păng tơmam soi huch thoi lĕ til pơgê 'noh tơmam soi 'buh 'bâu phu pơyơ̆r kơ Kră Yang.

⁴²'Noh jing tơmam soi 'buh na lu iĕm athei pơyơ̆r ling-lang, lăm rim jơhnơr tơ 'măng Bơsŭn Anih Akŭm 'bơ̆t anăp Kră Yang, tơ noh Inh gô jur pơma dơnuh hăm ih,

⁴³Tơ noh Inh kư̆m wă gô tơ'bơ̆p lu kon pơlei Isơrael: 'Bơ̆t anih 'noh hăm tơdrong ư-ang Inh wă pơm kơ anih noh jing rơgoh 'lơ̆ng.

⁴⁴Inh gô pơm ăn kơ Bơsŭn Anih Akŭm hăm chơnang soi jing rơgoh; hăm ih kư̆m gô pơm kơ Arôn hăm lu kon drŏ-nglo sư jing rơgoh mơ̆n, wă kơ lu sư bơ̆jang pơm 'bok soi kơ Inh.

⁴⁵Inh gô oei hơdai hăm lu kon pơlei Isơrael, pơm Kră Yang 'Bok Kei-Dei lu sư.

⁴⁶Na lu sư gô băt kơ Inh jơ̆ Kră Yang 'Bok Kei-Dei lu sư, tơ'ngla chông ba lu sư lĕch đơ̆ng dêh Êyiptơ na wă kơ Inh oei hăm lu sư, Inh jơ̆ Kră Yang 'Bok Kei-Dei lu sư.