Read bahnar Le 36 Bible Online

Le 36 - bahnar bible

Le 36

¹Bêsalel, Ôhôliap hăm đĭ-đăng bơngai mă Kră Yang ăn boih tơdrong tơchĕng đei đon hlôh wao gơh hơgei kơ pơm tôm tơdrong jang lăm anih rơgoh 'lơ̆ng, lu sư bơ̆jang dôm tơdrong kiơ̆ thoi Kră Yang đei pơkă khan boih:

²Môis krao Bêsalel, Ôhôliap păng lu bơngai gơh hơgei jang đei tơdrong tơchĕng mă Kră Yang ăn boih kơ lu sư mă đei jơhngơ̆m mơn pơdrŭt lu sư pơtơm năm bơ̆jang.

³Lu sư iŏk đơ̆ng Môis dôm tơmam pơyơ̆r đơ̆ng kon pơlei pơla Isơrael ba ăn wă yua pơm Bơsŭn Anih Akŭm rơgoh 'lơ̆ng. Rim pơgê đei bơngai năm ba tơ Môis tơmam pơyơ̆r kiơ̆ thoi tơdrong kăl yua.

⁴Thoi noh lu bơngai hơgei gơh pơm tôm tơdrong jang lăm anih noh, lu sư pơdơh 'bơ̆t anih lu sư oei jang.

⁵Na lu sư năm khan kơ Môis, lu kon pơlei pơla ăn tơmam lơ dêh rơkah rơkai lơ hloh kơ tơdrong jang wă yua, kiơ̆ thoi Kră Yang pơkă athei pơm.

⁶Thoi noh Môis pơkă athei, lu sư tơroi băl jơ̆p lăm anih lu sư oei lê̆ pă ăn pơyơ̆r dơ̆ng tơmam kơ pơm Bơsŭn Anih Akŭm, thoi noh đe khă pă ăn kon pơlei pơla năm ba tơmam pơyơ̆r dơ̆ng.

⁷Yua kơ tơmam đei noh tôm mah boih păng kư̆m rơkah mơ̆n kơ dôm tơdrong jang.

⁸Đĭ-đăng lu bơngai hơgei gơh jang pơm Bơsŭn Anih Akŭm iŏk mơjĭt blah che 'bui tanh păng brai se, brai jơk, 'brê gôh, 'brê hơhĭm, đei rup chêrubim, 'lơ̆ng dêh.

⁹Rim blah che 'bui kơjung sư 'bar-jĭt tơhngam hơgăt, wơ̆l sư să puăn hơgăt, rim blah să iĕ lei-lăi.

¹⁰Sư sĭt pơtrơp pơđăm blah pơm minh, kư̆m sĭt pơtrơp mơ̆n pơđăm blah nai pơm minh.

¹¹Sư iŏk brai jơk sĭt pơm gơwŏk 'bơ̆t tơdrơi che pơtrơp mă minh, sư kư̆m sĭt pơm lei-lăi mơ̆n 'bơ̆t tơdrơi che pơtrơp mă 'bar.

¹²Lu sư sĭt pơđăm-jĭt kiơ̆ kơ trong jih tơdrơi che mă minh păng sư sĭt pơđăm-jĭt tơ tơdrơi jih kơ che mă 'bar, tơnăp sư tơ'bưh băl.

¹³Sư kư̆m pơm pơđăm-jĭt tŏ gơwŏk păng maih, wă kơ gơwŏk pơtrơp che 'nâu hăm che noh tơ'bưh jing minh.

¹⁴Đang kơ noh lu sư iŏk che sŏk bơbe sĭt pơtrơp mơjĭt-mônh blah wă klơ̆p tơ kơpal pơm bơbŭng Bơsŭn Anih Akŭm.

¹⁵Che kơjung lăm rim minh blah che noh pêng-jĭt hơgăt, să puăn hơgăt, mơjĭt-mônh blah che noh să iĕ lei-lăi băl.a

¹⁶Sư pơtrơp lăm pơđăm blah noh pơm minh, hăm tơdrâu blah che nai kư̆m pơm minh;

¹⁷Sĭt pơđăm-jĭt gơwŏk ter jih che tuch-luch kơ che mă minh, hăm pơđăm-jĭt tŏ gơwŏk 'bơ̆t jih che să mă 'bar.

¹⁸Sư pơm pơđăm-jĭt tŏ gơwŏk păng kong, gơwŏk tơ'bưh đĭ-đăng che bơbŭng noh jing minh.

¹⁹Lu sư kư̆m pơm 'bar blah che hăm akar triu tơno tong đak 'brê păng hăm akar ka tih.

²⁰Sư yua tơ̆r 'long keo (sitim) pơm 'long dơ̆ng tơnăr Bơsŭn Anih Akŭm noh.

²¹Lăm rim hlak tơ̆r mơjĭt hơgăt kơjung, minh hơgăt minh puăt wơ̆l sư.b

²²Rim hlak tơ̆r athei kao tŏk-bŏk đei 'bar pah wă kơ pơkăp hơdai tơ rơnuh sư pơm thoi noh kơ đĭ-đăng tơ̆r lăm Bơsŭn anih akŭm.

²³Thoi âu lu sư yua tơ̆r lăm Bơsŭn: 'Bar-jĭt hlak tơ̆r tơ gah gơal.

²⁴Lu sư pơm puăn-jĭt tŏ bơlôh rơnuh păng hu, kơ 'bar-jĭt hlak tơ̆r, 'bar tŏ bơlôh rơnuh kơ minh hlak tơ̆r 'măn 'bar pah wă pơkăp sư păng 'bar tŏ bơlôh rơnuh kơ tơ̆r nai 'măn 'bar pah wă kơ pơkăp sư.

²⁵Sư pơm 'bar-jĭt hlak tơ̆r tơ gah yă-nơ̆m kơ hnam,

²⁶păng puăn-jĭt bơlôh rơnuh pơm păng hu 'bar tŏ bơlôh rơnuh pơm pơkăp kơ minh hlak tơ̆r păng 'bar tŏ bơlôh rơnuh tơ minh hlak nai.

²⁷Gah rŏng kơ Bơsŭn til bơmơ̆t sư pơm tơdrâu hlak tơ̆r.

²⁸Păng 'bar pah mum gah rŏng sư pơm hăm 'bar hlak tơ̆r.

²⁹'Bar pah mum 'bar hlak tơ̆r pơkăp dih băl khĕp đơ̆ng ala truh tơ kơpal đei khuen gơwŏk băl, 'bar pah mum pơm lei-lăi mơ̆n.

³⁰Đei tơhngam hlak tơ̆r hăm mơjĭt-tơdrâu tŏ bơlôh rơnuh pơm păng hu, ala kơ rim hlak tơ̆r noh đei 'bar tŏ bơlôh rơnuh.

³¹Lu sư kư̆m pơm pơđăm tŏ 'long hơbăt, hăm 'long keo wă pơ̆ng pơkăp tơ tơ̆r tơ gah âu kơ Bơsŭn.

³²Pơđăm tŏ 'long hơbăt nai tơ gah to păng pơđăm tŏ 'long hơbăt nai dơ̆ng tơ gah rŏng, wă khan tơ gah bơmơ̆t.

³³Lu sư kư̆m pơm 'long hơbăt tŏk-bŏk găn đĭ tơ̆r đơ̆ng kơ̆l pah âu truh tơ kơ̆l pah to,

³⁴păng lom păng maih rim lu tơ̆r noh, sư pơm khuen hăm maih, wă sôr 'long hơbăt, rim lu 'long hơbăt lom păng maih ngăl.

³⁵Sư pơm minh blah che hăm brai jơk, 'brê gôh, 'brê hơhĭm păng che 'bui tanh brai se, tanh rup chêrubim 'lơ̆ng dêh.

³⁶Sư pơm puăn tŏ jrăng 'long keo lom hăm maih păng pơm gơwŏk hăm maih bŏk hling puăn tŏ bơlôh rơnuh păng wă pơkăp jrăng.

³⁷Sư pơm 'bơ̆t 'măng wă mơ̆t tơ Bơsŭn Anih Akŭm minh blah che brai jơk, 'brê gôh păng 'brê hơhĭm, che tanh rup 'brông hơdah.

³⁸Păng sư pơm pơđăm tŏ jrăng lom kơ̆l păng maih păng pơđăm tŏ bơlôh rơnuh pơm păng kong lu gơwŏk sư păng maih.