Read bahnar Le 39 Bible Online

Le 39 - bahnar bible

Le 39

¹Bêsalêel iŏk brai jơk 'brê gôh, 'brê hơhĭm. Lu sư tanh che hơbĕn ao 'lơ̆ng 'măn kơ yua lăm tơdrong jang lăm anih rơgoh 'lơ̆ng, lu sư pơm hơbĕn ao rơgoh 'lơ̆ng ăn kơ Arôn kiơ̆ thoi Kră Yang pơkă boih kơ Môis.

²Bêsalêel sư pơm ao êphot hăm maih, che brai jơk, 'brê gôh 'brê hơhĭm, tanh hăm brai se.

³Đe tơtang lơ hlak maih dĭng hơtăng, đơ̆ng noh chrek jing brai, wă tanh hơdai hăm brai jơk, 'brê gôh, 'brê hơhĭm păng tanh hăm brai se, tanh hơlen bơse.

⁴Sư tanh 'bar hlak che pơm hơtăr 'băk tơ hơngiĕng, sĭt tơ êphot tơ tơnăp âu tơ'bưh tơnăp to.

⁵Tơlei tơ̆n đe tanh hăm brai se sĭt tơklep 'bơ̆t ao êphot, lu sư tanh lei-lăi thoi ao păng tơklep sư tơ ao, pơm sôr sư hăm maih, brai jơk, 'brê gôh, 'brê hơhĭm, tanh hăm brai se. Kiơ̆ thoi Kră Yang pơkă boih kơ Môis.

⁶Sư iŏk tơmo gĭt hling maih, chrek chhơ̆ thoi tơmam kơtĭt tơdra, chrek anăn lu kon drŏ-nglo Isơrael.

⁷Na sư tah tơmo gĭt noh lăm che hơtăr 'băk tơ hơngiĕng ao êphot, wă pơm tơmo gĭt 'blŏk hơdơ̆r kơ lu kon drŏ-nglo Isơrael, kiơ̆ trŏ thoi Kră Yang pơkă boih kơ Môis.

⁸Bêsalêel sư pơm bơnal 'băk tơ kơtơh tanh hơgei hlĭch dêh, thoi ao êphot, maih rang mơnhal brai jơk, 'brê gôh 'brê hơhĭm păng brai se.

⁹Bơnal 'băk tơ kơtơh, să iĕ tŏ ăi wơ̆l tor sư, lu sư pơm bơnal tor minh hơđa wơ̆l sư sap 'bar tăl.

¹⁰Lu sư pơklep đei puăn trong tơmo gĭt, trong mă mônh minh găr tơmo gôh rang Sardis, minh găr tơmo hlăng Topas, minh găr tơmo rang Carbucle.

¹¹Trong mă 'bar, minh găr tơmo jơk dreng Emoral, minh găr tơmo hlĕng hlŏng saphir, minh găr tơmo jơmŏng.a

¹²Trong mă pêng, minh găr tơmo trong wăn Jakin, minh găr tơmo trong Agate, minh găr tơmo hlăng Amathus.

¹³Trong mă puăn minh găr tơmo gĭt bêril, minh gar tơmo rang Ônik (onik), minh găr tơmo đei trong wăn jasper. Tơmo gĭt noh đei pơklep hrâu păng maih.

¹⁴Đĭ-đăng tơmo gĭt đei mơjĭt-'bar găr đĭ-đăng, kiơ̆ thoi dôm anăn lu kon drŏ-nglo Isơrael, đe chhơ̆ chrek sư nhen thoi tơmam kơtĭt rim găr tơmo đei chrek anăn kiơ̆ mơjĭt-'bar adrĕch Isơrael.

¹⁵Lu sư pơm rơbưn glang păng maih rơgoh, sĭt tơ bơnal 'băk tơ kơtơh.

¹⁶Lu sư kư̆m pơm 'bar tŏ gơwŏk păng maih, gơwŏk tơ 'bar pah jih bơnal 'băk tơ kơtơh.

¹⁷Lu sư tơguăt 'bar dăng rơbưn maih 'bơ̆t gơwang noh, tơ 'bar pah tơnăp bơnal kơtơh.

¹⁸Lu sư pơm 'bar dăng rơbưn păng maih rơgoh wă tơguăt tơ'bưh bơnal kơtơh hăm ao êphot.

¹⁹Lu sư pơm dơ̆ng 'bar tŏ gơwang maih sĭt tơ lăm kơ 'bar pah bơnal kơtơh tơ'bưh hăm ao êphot.

²⁰Lu sư pơm dơ̆ng 'bar tŏ gơwang maih dan 'bơ̆t ala 'bar tŏ tơlei hơtăr anăp êphot, tơ tơnăp tơ'bưh tơlei tơ̆n ao êphot.

²¹Sư yua tơlei brai jơk chô̆ lu khuen bơnal kơtơh hăm khuen êphot, wă kơ bơnal kơtơh kơjăp kơpal tơlei tơ̆n ao êphot đe tanh hăm brai se, wă kơ bơnal kơtơh huay kơ tơrĭ đơ̆ng ao êphot, kiơ̆ trŏ thoi Kră Yang đei pơkă ăn kơ Môis boih.

²²Lu sư pơm ao tai 'nguaih kơ êphot tanh hăm brai săk jơk ngăl.

²³Bŏk 'bơ̆t tŏk-bŏk ao tai wă trô̆ kơ̆l, hơko ao lem tăp dăr thoi đe reng, wă kơ sư huay kơ hiah tơbuch.

²⁴Lu sư sĭt plei gărnăt hăm brai jơk 'brê gôh, 'brê gơhĭm tăp dăr kơ tơdrơi ao hăm plei gărnăt hăm brai.

²⁵Lu sư pơm krĕng-nĕng hăm maih rơgoh, sĭt tơdrơi tơdrơi sơlam 'bar tŏ plei gărnăt.

²⁶Kư̆ kơ tơtil minh pôm plei gărnăt đei chô̆ minh pôm krĕng-nĕng maih păng pơrok tăp dăr kơ tơnăp ao, mă 'măn kơ lu 'bok soi hrŭk lăm năr bơ̆jang, kiơ̆ thoi nơ̆r Kră Yang pơkă boih kơ Môis.

²⁷Lu sư tanh ao tai păng brai 'bui se ăn kơ Arôn hăm lu kon drŏ-nglo sư;

²⁸môk, mu wăn kơ̆l, hơbĕn lăm, kư̆m tanh hăm che 'bui brai se ngăl;

²⁹tơlei tơ̆n tanh, sĭt păng, brai se jơk, 'brê gôh, 'brê hơhĭm, kiơ̆ thoi nơ̆r Kră Yang pơkă ăn boih kơ Môis.

³⁰Lu sư pơm plăk iĕ pơklep tơ mu rơgoh 'lơ̆ng hăm maih rơgoh. Lu sư chrek tơ noh thoi đe chrek pơm tơdra kơtĭt: Rơgoh 'Lơ̆ng Ăn Kơ Kră Yang.

³¹Lu sư chô̆ plăk ei hăm minh dăng tơlei kŭi jơk, wă chô̆ plăk 'bơ̆t anăp mu, kiơ̆ thoi Kră Yang đei tơtă boih kơ Môis.

³²Thoi noh tơdrong pơm Bơsŭn Anih Akŭm keh đang boih. Kon pơlei Isơrael pơm kiơ̆ thoi dôm nơ̆r Kră Yang pơkă hăm Môis.

³³Lu sư ba ăn kơ Môis bơsŭn, bơsŭn hăm đĭ-đăng tơmam yua lăm noh, hơdrơ̆ng, tơ̆r, hơbăt, jrăng păng lu bơlôh rơnuh sư;

³⁴tơmam klơ̆p bơbŭng, pơm păng akar triu tong đak 'brê, akar ka tih păng che pĕng;

³⁵hom tơdrong pơgơ̆p păng tơnung tung sư păng Tơnglơ̆p 'Mêm Mơnat;

³⁶gơ'bang păng đĭ-đăng tơmam yua kơ sư păng 'bĕng rơgoh;

³⁷jơ̆ng ŭnh kơđeng maih rơgoh hăm akâu ŭnh kơđeng, hơmet pơm keh đĭ boih, hăm lu tơmam yua lăm noh; păng đak rơmă pơlei ôliwơ yua wă tơ̆k ŭnh kơđeng;

³⁸chơnang soi maih, đak 'bâu phu wă yua pik, tơmam 'bâu phu, che pĕng 'măng mơ̆t tơ Bơsŭn;

³⁹chơnang soi păng grang hơdrao pơm păng kong, 'long ting tung păng đĭ-đăng tơmam yua lăm chơnang soi kơthŭng đak hăm jơ̆ng sư;

⁴⁰lu che pĕng kơdeng Bơsŭn Akŭm, jrăng hăm bơlôh rơnuh, che pĕng 'bơ̆t 'măng mơ̆t tơ kơdeng, tơlei kŭi, hơdrơ̆ng war. Hăm đĭ-đăng tơmam yua tơ lăm Bơsŭn Anih Akŭm,

⁴¹hơbĕn ao giĕng 'bok soi wă hrŭk jang lăm anih rơgoh 'lơ̆ng, hơbĕn ao kơ Arôn 'bok soi tơm, hăm ăn kơ lu kon drŏ-nglo sư 'măn kơ tơdrong jang 'bok soi.

⁴²Đĭ-đăng lu kon pơlei pơla Isơrael pơm keh tôm tơdrong jang noh kiơ̆ thoi nơ̆r Kră Yang pơkă boih kơ Môis.

⁴³Môis lăng lăng tôm tơdrong jang, 'bôh lu sư pơm kiơ̆ thoi nơ̆r Kră Yang khan pơkă boih, thoi noh na Môis bơnê sơkat ăn tơdrong pŭn hiôk kơ lu sư.