Read bahnar Le 5 Bible Online

Le 5 - bahnar bible

Le 5

¹Đơ̆ng rŏng kơ noh, Môis păng Arôn năm apinh Pharaôn khan thoi âu: Kră Yang 'Bok Kei-Dei kon pơlei Isơrael đei khan: Ăn bĕ kon pơlei Inh năm, wă kơ lu sư năm kơkuh kơ Inh tơ char glă.

²Mă-lei Pharaôn tơl: Kră Yang noh bu? Mah athei inh chu kơ nơ̆r Sư, ăn kon pơlei Isơrael năm? Inh ưh kơ băt Kră Yang ôh; kư̆m ưh kơ ăn kon pơlei năm mơ̆n.

³Môis păng Arôn khan: Kră Yang 'Bok Kei-Dei kon pơlei Hêbrơ đei tơ'bôh kơ lu nhôn. Na dang ei apinh ih ăn kơ lu nhôn lĕch năm tơ char glă, ataih dang pêng năr kơ trong, wă pơyơ̆r tơmam soi ăn kơ Kră Yang 'Bok Kei-Dei lu nhôn, dah ưh kơnh hli kơ Kră Yang pơm kơ nhôn lôch hơbuh dah lôch kơ đao,

⁴Mă-lei pơtao dêh Êyiptơ khan kơ lu sư: Ơ Môis păng Arôn, liơ mă măr iĕm pơtơm kon pơlei achăng hŭt lê̆ tơdrong jang lu sư thoi noh? Iĕm jah năm jang tơdrong jang iĕm kơdih đĕch!

⁵Pharaôn khan: Kon pơlei lăm dêh char dang ei kơdrâ̆m lơ dêh, na măr iĕm pơgăn pơm kơ lu sư pơdơh kơ jang hă!

⁶Lăm năr noh, Pharaôn tơtă nơ̆r, kơ lu bơngai Êyiptơ mă wei-lăng tơdrong jang păng lu bơngai Isơrael mă tơrô̆ bơngai jang thoi âu:

⁷Lu iĕm 'nĕ pă asong kon pơlei hơnong 'ba pơm gŏch thoi lĕ adrol ki dơ̆ng hŏ; lê̆ lu sư năm chă kơdih.

⁸Mă-lei lu iĕm athei hơgăt pơm mă tôm dôm kơsô̆ thoi so, 'nĕ kơ tơjur hơtŭch kơ so; yua kơ lu sư alah dêh, lu sư chă đon krao ôr khan: Bĕ bơ̆n! Năm pơyơ̆r kơkuh kơ Kră Yang 'Bok Kei-Dei bơ̆n.

⁹Lu iĕm tơpŭ ăn tơdrong jang trăp kơ lu sư wă kơ lu sư jang hrat na ưh pă 'blŏk nơ̆r pơma hơlĕnh dơ̆ng.

¹⁰Lu bơngai wei-lăng păng lu bơngai tơrô̆ tơdrong jang sư lĕch năm pơma hăm kon pơlei pơla khan: Pharaôn đei khan: Inh ưh pă ăn kơ lu iĕm hơnong 'ba dơ̆ng,

¹¹lu iĕm năm chă kơdih hơnong đei tơ yơ iĕm năm tơ noh; mă-lei ưh kơ gơh tơjur hơtuch lê̆ tơdrong jang lu iĕm ôh.

¹²Đơ̆ng noh, kon pơlei năm chă hơnong jơ̆p-jang kơ dêh Êyiptơ, lu sư wă dônh akŭm tơm 'ba tơplih kơ hơnong 'ba.

¹³Lu bơngai wei-lăng gơnhĕk khan: Jang mă keh tơdrong jang lu iĕm, tôm thoi hơgăt, năr ayơ keh tôm năr 'noh, kư̆m thoi kơplah mă oei đei asong iĕm hơnong 'ba.

¹⁴Lu bơngai Isơrael mă jang lăm khŭl wei-lăng tơrô̆ kon pơlei Isơrael, đe teh lu sư păng hil khan: Liơ năr brei păng năr 'nâu, lu iĕm ưh kơ jang keh mă đêl hơgăt kơ iĕm man gŏch dôm thoi lĕ adrol ki?

¹⁵Lu bơngai Isơrael bơ̆jang tơrô̆ lăng lăm kon pơlei Isơrael, lu sư năm ôr krao tơ Pharaôn: Liơ pơtao pơm kơ lu đĭch đam ih thoi noh?

¹⁶Đe ưh pă asong lu nhôn hơnong 'ba, na hrăn athei lu nhôn: Iĕm pơm gŏch bĕ! Lu nhôn 'nâu đĭch đam ih; đe teh tôn, ưh kơ brĕ đơ̆ng kon pơlei pơla ih 'mơ̆i.

¹⁷Mă-lei pơtao tơl: Lu iĕm bơngai răm alah, lu bơngai alah! Na hrăn apinh. Ăn kơ lu nhôn năm kơkuh kơ Kră Yang!

¹⁸Na dang ei kư̆ kơ năm jang bĕ, đe ưh kơ đei asong hơnong 'ba ôh, mă-lei lu iĕm pơjao gŏch mă tôm 'long đêl hơgăt.

¹⁹Lei na, lu bơngai Isơrael bơ̆jang tơrô̆ lăm kon pơlei Isơrael, lu sư hơwơ̆l hơwang, yua kơ đe khan kơ lu sư: Lu iĕm ưh kơ gơh tơjur hơtŭch 'long gŏch hơgăt ăn kơ iĕm jang năr ayơ athei keh tôm năr 'noh.

²⁰Lăp lu sư lĕch đơ̆ng Pharaôn na lu sư tơ'bơ̆p Môis păng Arôn oei gô 'bơ̆t noh,

²¹na khan; “măr iĕm pơm kiơ kơ lu nhôn. Apinh Kră Yang lăng păng phak măr iĕm. Yua kơ kiơ măr iĕm ăn kơ Pharaôn păng linh bơ̆jang kơ sư hil areh kơ lu nhôn, thoi ăn đao gưm lăm ti lu sư wă kơ pơlôch lu nhôn.”

²²Môis wih dơ̆ng tơ Kră Yang păng khan: “Bơnê kơkuh kơ Ih, ơ Kră Yang yua kơ kiơ Ih ăn đe pơm kơnê̆ kơ kon pơlei 'nâu? Yua kơ kiơ Ih wơh inh năm lĕ?

²³Đơ̆ng năr inh năm tơ'bơ̆p Pharaôn wă yua anăn Ih na pơma, sư rai pơm kơnê̆ kơ kon pơlei âu, mă-lei Ih ưh kơ wă dŏng pơklaih kon pơlei Ih.”