Read bahnar Le 6 Bible Online

Le 6 - bahnar bible

Le 6

¹Kră Yang pơma hăm Môis khan: Dang ei ih gô 'bôh dôm tơdrong Inh wă pơm kơ Pharaôn; yua đơ̆ng ti mơsêh mơyang Inh athei pơtao 'noh sư gô achăng kon pơlei păng puh tơlĕch hloi kon pơlei Isơrael đơ̆ng dêh sư.

²Kră Yang 'Bok Kei-Dei pơma dơ̆ng hăm Môis khan: Inh boih Kră Yang iĕm.

³Inh pơdah tơ'bôh ăn kơ Abraham kơ Isăk păng Jakôp, Inh boih Kră Yang 'Bok Kei-Dei mơsêh mơyang;a mă-lei Anăn Inh Kră Yang,b Inh ưh tam đei layơ tơbăt kơ lu sư.

⁴Inh kư̆m pơsĭt tơdrong pơgơ̆p hăm lu sư, wă ăn kơ lu sư dêh Kanaan, mă dêh lu sư wă oei tơ noh thoi lĕ lu bơngai tơmoi.

⁵Inh kư̆m đei kơtơ̆ng nơ̆r krao ôr pơmat-tat đơ̆ng kon pơlei Isơrael đơ̆ng bơngai Êyiptơ rôp pơgŏ pơm đĭch păng Inh 'blŏk kơ tơdrong Inh pơgơ̆p.

⁶Na ih khan bĕ hăm kon pơlei Isơrael: Inh boih Kră Yang, Inh gô ăn kơ lu iĕm rơngei đơ̆ng tơdrong jang gleh pơmat Inh gô dŏng pơklaih iĕm đơ̆ng pơm đĭch đam Inh gô chro tơpang ti mơsêh mơyang Inh, wă phak bơngai Êyiptơ mă trăp.

⁷Inh gô iŏk lu iĕm pơm kon pơlei Inh păng Inh gô pơm Kră Yang 'Bok Kei-Dei lu iĕm; lu iĕm gô băt kơ Inh jing Kră Yang 'Bok Kei-Dei lu iĕm, pơklaih rơngei lu iĕm đơ̆ng pơm đĭch đam kơ lu bơngai Êyiptơ.

⁸Inh gô chông ba lu iĕm mơ̆t lăm dêh mă Inh pơkă wă ăn kơ Abraham, kơ Isăk păng Jakôp inh gô ăn kơ lu iĕm dêh 'noh wă kơ jang sa, Inh boih Kră Yang.

⁹Môis pơma khan kơ kon pơlei Isơrael thoi noh; mă-lei lu sư ưh kơ wă mơ̆ng Môis ôh yua kơ lu sư ơh sơ'ngon kơtơ̆ng đĭch đam pơmat-tat dêh tơpă.

¹⁰Kră Yang khan kơ Môis:

¹¹Năm mơ̆t tơ'bơ̆p roi bĕ kơ Pharaôn, pơtao dêh Êyiptơ, wă kơ sư ăn kon pơlei Isơrael lĕch đơ̆ng dêh sư.

¹²Mă-lei Môis tơl Kră Yang: Inh âu minh 'nu bơngai 'bơ̆r pơma sa ưh kơ hlôh wao; kon pơlei Isơrael ưh kơ wă mơ̆ng nơ̆r inh pơma kơ Pharaôn sư dai ưh kơ wă mơ̆ng nơ̆r inh ôh?

¹³Kră Yang pơma khan kơ Môis păng Arôn. Inh pơjao ăn kơ măr iĕm năm truh tơ kon pơlei Isơrael păng Pharaôn, pơtao dêh Êyiptơ, wă chông anhăk kon pơlei Isơrael lĕch đơ̆ng dêh Êyiptơ.

¹⁴'Nâu lu bơngai kơdră lăm adrĕch adrung kon pơlei Isơrael: Lu kon drŏ-nglo Rubên, kon drŏ-nglo kơdră Isơrael, Hanok, Palu, Hêsrôn păng Karmi. 'Noh boih lu adrĕch adrung Rubên.

¹⁵Lu kon drŏ-nglo Simêôn, Jêmuel, Jamin, Ôhat, Jakin, Sôhar păng Sul kon mă akăn đơ̆ng Kanaan. 'Noh boih lu adrĕch adrung Simêôn.

¹⁶'Nâu anăn lu kon drŏ-nglo Lêwi, kiơ̆ lăm adrĕch lu sư: Gersôn, Kôhat păng Mêrari. Lêwi arih sot đei minh-hrĕng pêng-jĭt tơpơh sơnăm.

¹⁷Lu kon drŏ-nglo Gersôn kiơ̆ kơ adrĕch lu sư kơdih Lipni păng Simei. Kiơ̆ kơ adrĕch lu sư.

¹⁸Lu kon drŏ-nglo Kôhat. Amram, Ishar, Hêbrôn păng Usiêl. Kôhat arih sot đei minh-hrĕng pêng-jĭt pêng sơnăm.

¹⁹Lu kon drŏ-nglo Mêrari: Mali păng Musi. 'Noh boih lu adrĕch Lêwi, kiơ̆ lu adrĕch adrung lu sư.

²⁰Na, Amram iŏk akăn anăn Jôkêbêt, duch sư kơdih, pơm akăn; duch ei tơpŭ kơ sư Arôn păng Môis. Amram arih sot đei minh-hrĕng pêng-jĭt tơpơh sơnăm.

²¹Lu kon drŏ-nglo Ishar: Kôrê, Nêphek păng Sikri.

²²Lu kon drŏ-nglo Usiêl: Misael, Êlsaphan păng Sihri.

²³Arôn oei kơ Êlisêba, kon drŏ-kăn Aminađap, oh Nahasôn; duch ei tơpŭ kơ sư Nađap, Abihu, Êlêasar păng Ithamar.

²⁴Lu kon drŏ-nglo Kôrê: Assir, Êlkana păng Abiasap 'noh boih lu adrĕch Kôrê.

²⁵Êlêasar, kon drŏ-nglo Arôn, oei kơ kon adruh Phutiel; duch ei tơpŭ kơ sư Phinêhas. 'Noh boih lu kơdră lăm khŭl adrĕch bơngai Lêwi, kiơ̆ adrĕch adrung lu sư.

²⁶'Nâu boih adrĕch, Arôn păng Môis, wă khan bơngai mă Kră Yang bơtho khan: Athei chông anhăk kon pơlei Isơrael lĕch đơ̆ng dêh Êyiptơ.

²⁷Môis păng Arôn bre sư năm tơ'bơ̆p Pharaôn, pơtao dêh Êyiptơ, wă chông anhăk kon pơlei Isơrael lĕch đơ̆ng dêh Êyiptơ.

²⁸Lăm năr mă Kră Yang pơma hăm Môis tơ dêh Êyiptơ,

²⁹Kră Yang khan kơ Môis: Inh boih Kră Yang, năm khan bĕ kơ Pharaôn pơtao dêh Êyiptơ, đĭ-đăng dôm nơ̆r Inh gô pơma hăm ih.

³⁰Mă-lei Môis tơl Kră Yang khan: Inh âu bơngai 'bơ̆r ưh kơ hon đon ưh kơ hơgei: Liơ Pharaôn 'maih mơ̆ng inh?