Read bahnar Le 7 Bible Online

Le 7 - bahnar bible

Le 7

¹Kră Yang pơma hăm Môis khan: Lăng, Inh pôk ih nhen thoi Kră Yang 'Bok Kei-Dei kơ Pharaôn, na Arôn 'nhŏng ih gô thoi bơngai khan lê̆ adrol ăn kơ ih.

²Ih athei pơma dôm nơ̆r Inh đei tơtă kơ ih, na Arôn, 'nhŏng ih sư gô năm apinh Pharaôn, wă kơ sư achăng lê̆ kon pơlei Isơrael lĕch đơ̆ng dêh sư.

³Inh gô pơm ăn kơ Pharaôn jơhngơ̆m arăng ưh kơ chu păng Inh pơthim lơ tơdra mơsêh hlĭch chrơp Inh tơ lăm dêh Êyiptơ.

⁴Mă-lei Pharaôn ưh kơ 'maih mơ̆ng ih ôh; Inh gô yơ̆r ti dan kơpal teh Êyiptơ, yua lơ tơdrong phak tih, wă iŏk tơlĕch lu khŭl linh Inh, lu kon drŏ-nglo Isơrael đơ̆ng char Êyiptơ.

⁵Layơ mă Inh pơm kơ dêh Êyiptơ păng dui iŏk kon pơlei Isơrael lĕch đơ̆ng lăm kon pơlei Êyiptơ, lei lu sư gô băt kơ Inh boih Kră Yang.

⁶Môis păng Arôn pơm kiơ̆ lei-lăi thoi nơ̆r Kră Yang đei tơtă kơ bre sư.

⁷Kơplah, bre sư năm apinh Pharaôn, noh Môis đei tơhngam-jĭt sơnăm păng Arôn tơhngam-jĭt pêng sơnăm.

⁸Kră Yang khan kơ Môis păng Arôn:

⁹Tơdah Pharaôn athei măr iĕm pơm tơdrong mơsêh iĕm; ih athei khan kơ Arôn: 'Nhŏng ih athei iŏk 'long jra, klơ̆m 'bơ̆t anăp Pharaôn, 'long jra 'noh gô jing minh dăng 'bih.

¹⁰Na, Môis păng Arôn năm 'bơ̆t anăp Pharaôn păng pơm kiơ̆ thoi nơ̆r Kră Yang tơtă boih. Arôn klơ̆m 'long jra sư 'bơ̆t anăp măt Pharaôn păng lu đam sư, 'long jra noh jing minh dăng 'bih.

¹¹Na Pharaôn krao hloi lu 'bok hơgei păng 'bok pơjâu; lu bơngai gơh pơm tơwir lăm char Êyiptơ kư̆m pơm lei-lăi thoi lu sư gơh tơwir.

¹²Rim 'nu lu sư klơ̆m 'long jra tă kơ jing 'bih ngăl; mă-lei 'long jra Arôn luăn lê̆ đĭ 'long jra lu sư.

¹³Thoi noh ră mă-lei jơhngơ̆m Pharaôn oei ưh kơ chu, ưh kơ mơ̆ng Môis păng Arôn, lei-lăi thoi nơ̆r Kră Yang khan lê̆ adrol.

¹⁴Kră Yang khan kơ Môis: Pharaôn arăng kơ̆l ưh kơ chu ăn kon pơlei năm.

¹⁵Pơgê dơning Pharaôn sư gô lĕch ngôi tơ đak krong, ih athei năm 'bơ̆t anăp sư tơ cheng đak krong păng chĕp ba 'long jra mă jing 'bih noh.

¹⁶Ih athei tơbăt kơ sư: Kră Yang 'Bok Kei-Dei kon pơlei Hêbrơ, wơh inh năm tơ ih, khan thoi âu: Athei achăng ăn kon pơlei Inh năm, wă kơ lu sư kơkuh kơ Inh tơ tơmăn glă; na truh dang ei ih ưh kơ 'maih mơ̆ng Inh hơya tŏ sĕt.

¹⁷Kră Yang khan: Đơ̆ng tơdrong 'nâu, ih gô băt Inh boih Kră Yang: Na iŏk 'long jra Inh teh tơ đak krong Nil, đak krong gô jing pham.

¹⁸Ka lăm đak krong Nil gô lôch păng đak krong gô 'bâu ôm, bơngai Êyiptơ ưh kơ pơ̆n nhă đak noh.

¹⁹Đơ̆ng noh, Kră Yang khan kơ Môis, athei Arôn, iŏk 'long jra ih bĕ, yơ̆r ti ih tơ kơpal đak glung tih, tơ đak krong iĕ, đak dơnâu jơ̆p kơ anih đei đak lăm dêh Êyiptơ wă kơ đak jing pham ngăl; jơ̆p-jang lăm get mong đak sư pơm hăm 'long, hăm tơmo, kư̆m gô đei pham đĭ-đăng.

²⁰Na, Môis păng Arôn pơm kiơ̆ thoi nơ̆r Kră Yang tơtă ăn kơ bre sư. 'Bơ̆t anăp Pharaôn păng đam sư; Arôn hiŏng 'long jra tơ kơpal na teh đak krong Nil na đak krong Nil jing pham hloi.

²¹Ka lăm đak krong Nil lôch đĭ-đăng, đak krong jing 'bâu ôm, lu bơngai Êyiptơ ưh kơ gơh nhă; đei pham tơ jơ̆p-jang kơ đak lăm dêh Êyiptơ hloi.

²²Kơplah noh lu 'bok pơjâu tơwir bơngai Êyiptơ kư̆m gơh pơm tơwir lei-lăi thoi noh, na jơhngơ̆m Pharaôn, oei arăng ưh kơ chu, ưh kơ mơ̆ng Môis păng Arôn tŏ sĕt, trŏ thoi nơ̆r Kră Yang đei khan.

²³Pharaôn wih brŏk tơ hnam sư jơhngơ̆m sư ưh kơ đei hiơ̆k tơchĕng kiơ kơ tơdrong noh.

²⁴Đĭ-đăng lu bơngai Êyiptơ ưh kơ gơh nhă đak krong Nil noh, na lu sư sir 'bơ̆t cheng đak krong wă kơ đei đak gơh nhă.

²⁵Đơ̆ng rŏng kơ noh dang tơpơh năr.