Read bahnar Jop 1 Bible Online

Jop 1 - bahnar bible

Jop 1

¹Tơ lăm dêh char Usa đei minh 'nu bơngai drŏ-nglo anăn sư Jop, sư đei đon 'lơ̆ng tơpăt, băt hli yom kơ Kră Yang 'Bok Kei-Dei păng weh ataih đơ̆ng tơdrong kơnê̆.

²Sư pơjing tơpơh 'nu kon drŏ-nglo păng pêng 'nu kon drŏ-kăn.

³Jop đei tơpơh-rơbâu tŏ triu, pêng-rơbâu tŏ aseh lăk-đa, pơđăm-hrĕng hơgrop rơmo choh, pơđăm-hrĕng tŏ aseh iĕ akăn păng đei đĭch đam lơ; sư mơdrŏng hloh kơ đĭ-đăng bơngai lăm dêh char gah Hơlĕch.

⁴Lu kon drŏ-nglo sư juăt kơ et sa, hơpong băl dăr tơ rim hnam lu sư; păng wơ̆n pêng 'nu mai oh drŏ-kăn sŏng sa hơdai lu sư.

⁵Đơ̆ng rŏng kơ dôm năr et sa đang bơih, Jop wơh krao lu kon sư brŏk wă pơm giĕng ôp 'nhao rơgoh. Sư iung đơ̆ng hrôih, wă pơyơ̆r tơmam soi 'buh tôm kơ lu kon sư; sư tơchĕng khan: “Băt lu kon inh pơm yoch păng băt lăm jơhngơ̆m lu sư blei hiap Kră Yang 'Bok Kei-Dei.” Jop juăt kơ pơm thoi noh.

⁶Lăm minh năr ei lu linh jang năm akŭm 'bơ̆t anăp Kră Yang păng Satanb kư̆m năm hăm lu sư mơ̆n.

⁷Kră Yang jet Satan: “E đơ̆ng yơ?” Satan tơl Kră Yang: “Inh chă nơnăm juang jơ̆p-jang kơ teh đak.”

⁸Kră Yang jet dơ̆ng Satan, “E hăm 'bôh Jop bơngai hli yom kơ Inh? Lăm teh đak ưh kơ đei bu thoi sư, đei đon 'lơ̆ng tơpăt, băt hli yom kơ Inh Kră Yang 'Bok Kei-Dei păng weh ataih đơ̆ng tơdrong kơnê̆.”

⁹Satan tơl Kră Yang: “Jop hli yom kơ Kră Yang 'Bok Kei-Dei ưh kơ đei yua kiơ hă?”

¹⁰“Yua kơ Ih war dur tăp dăr wei-lăng sư, hnam dơnŏ sư păng dôm tơmam sư đei. Ih tuh ăn pŭn kơ tơdrong jang sư păng ăn kơ sư tơmam rai lơ lăm teh.

¹¹Mă-lei dang ei dah Ih yơ̆r ti pơrăm dôm tơmam sư đei, lei sư gô hiap Ih hloi.”

¹²Kră Yang khan kơ Satan: “Âu dôm tơmam sư đei pơjao đĭ lăm tơpang ti e; mă-lei e 'nĕ hơtŭt 'bơm akâu sư.” Na Satan weh hloi đơ̆ng anăp Kră Yang.

¹³Lăm minh năr ei, kơplah lu kon drŏ-nglo păng kon drŏ-kăn Jop oei et sa lăm hnam 'nhŏng kơdră lu sư,

¹⁴minh 'nu bơngai jang năm roi ăn kơ Jop thoi âu: “Rơmo oei choh, aseh iĕ oei sa jê̆ kiơ̆ ei.

¹⁵Blư bla đei lu bơngai Sêba năm blah, tơgar rôp iŏk đĭ hloi rơmo, aseh iĕ păng koh pơlôch lu đĭch đam ih hăm đao; lăp minh 'nu inh đĕch hlôi tơ âu năm roi ăn kơ ih.”

¹⁶Bơngai âu oei pơma, na blư kơ minh 'nu bơngai nai truh roi: “Glaih đơ̆ng Kră Yang 'Bok Kei-Dei kơpal plĕnh taih, ŭnh sa đĭ lu triu păng lu bơngai wei triu ih, lăp minh 'nu inh đĕch klaih năm roi ăn kơ ih.”

¹⁷Bơngai âu oei pơma, na 'bôh minh 'nu bơngai nai dơ̆ng truh roi: “Lu bơngai Kalđê đei pêng khŭl, wang blah tơgar iŏk aseh lăk-đa păng koh pơlôch đĭ lu đĭch đam hăm đao; lăp minh 'nu inh đĕch klaih năm roi ăn kơ ih.”

¹⁸Bơngai âu oei pơma, na minh 'nu bơngai nai dơ̆ng truh năm roi: “Lu kon drŏ-nglo păng kon drŏ-kăn ih oei et sa tơ hnam 'nhŏng kơdră lu sư.”

¹⁹Na đei kial hơbŭt tih đơ̆ng char glă pơm kơ puăn pah mum hnam. Hnam păk glơ̆m kơtĭt lu kon ih lôch đĭ; lăp minh 'nu inh đĕch klaih, năm roi ăn kơ ih.

²⁰Jop gruih iung hloi, hek ao sư hơkôih kơ̆l 'ngôch, drap bon tơ teh kơkuh kơ Kră Yang.

²¹Păng khan: “Mĕ inh tơpŭ kơ inh sơ̆ akâu hoh, păng inh brŏk tơ teh kư̆m gô akâu hoh mơ̆n; Kră Yang asong ăn, Kră Yang pơdrâu iŏk dơ̆ng; trŏ bơnê kơ anăn Kră Yang!”

²²Lăm dôm tơdrong noh, Jop ưh kơ đei pơm yoch păng ưh kơ đei pơma kư̆ kă kơ Kră Yang 'Bok Kei-Dei.