Read bahnar Jop 10 Bible Online

Jop 10 - bahnar bible

Jop 10

¹Inh hăl dêh kơ tơdrong arih inh; Na inh gô tơtok ưh kơ hli; Inh gô roi pơma kơ tơdrong, jơhngơ̆m inh chhŭr nuih.

²Inh khan kơ Kră Yang 'Bok Kei-Dei, 'nĕ pă jô̆ inh bơngai yoch; Ăn kơ inh băt Ih jô̆ inh đei yoch kiơ.

³Ih hăm lăp wă pơjuă pơrăm inh, wă achăng lê̆ inh đơ̆ng ti Ih pơjing, Na hiôk iŏk tơdrong lu bơngai pơm kơnê̆ wă pơm hă?

⁴Ih đei măt thoi kon bơngai hă, lăng 'bôh thoi kon bơngai lăm teh đak?

⁵Ih arih lăp minh 'bar 'năr thoi kon bơngai mơ̆n Dah lăp minh 'bar sơnăm thoi kon bơngai.

⁶Dĭng Ih mah chơchă tơdrong yoch inh, păng chă pơpơih tơdrong glăi inh.

⁷Mă khan Ih băt kơ inh ưh kơ yoch ră, ưh kơ đei bu gơh dŏng pơklaih inh đơ̆ng ti Ih.

⁸Tơpang ti Ih bơih man pơjing inh, Mă-lei dang ei ti Ih wih pơrăm inh.

⁹'Blŏk bĕ kơ Ih man pơjing inh thoi đe man gŏ teh; Lei ih wă pơdrâu inh tơ 'mui teh dơ̆ng hă?

¹⁰Hăm trŏ Ih wă hling inh thoi đak toh tơ lăm klak mĕ inh. Na inh kơtuăl jing nge thoi 'bĕng tơpei đak toh 'nhŭ?

¹¹Ih pơhrŭk ăn kơ inh sĕch păng akar, na tanh inh hơbĭ hơdai hăm kơting păng huan.

¹²Ih ăn bơih kơ inh đei tơdrong arih Ih 'mêm kơ inh hăm tơdrong 'mêm kơjăp sĭt, Ih wei-lăng rong ba tơdrong arih inh;

¹³Mă khan lei ră, Ih ôn hlơp tơdrong 'nâu lăm jơhngơ̆m Ih, inh băt Ih wă pơm tơdrong 'nâu.

¹⁴Ih răp lăng inh hăm đei pơm yoch. Ih ưh kơ mơnat ăn tơdrong yoch inh.

¹⁵Tơdah inh pơm kơnê̆, răm-'băm tơpă kơ inh! Mă-lei tơdah inh pơm trŏ 'lơ̆ng, inh kư̆m ưh kơ pơ̆n ngơk kơ̆l, yua kơ inh 'bĕnh kơ mơlâu, tơchĕng kơ tơdrong pơmat-tat inh.

¹⁶Tơdah inh pơang, Ih gô druh prah inh thoi dăm-brang, Ih gô pơm mơsêh hlĭch chrơp wă pơrăm inh.

¹⁷Ih đei lơ tơdrong plơ̆ng wă pơm kơ inh, tơdrong Ih hil kơ inh rai dêh Thoi khŭl linh plơ̆ng tơplih băl blah inh.

¹⁸Liơ Ih ăn kơ inh lĕch đơ̆ng klak mĕ inh? 'Lơ̆ng hloh kơ inh lôch 'bơ̆t đe tam mă 'bôh inh

¹⁹Rŏ kơ inh jah lôch hloi huay kơ đei arih, lăp hlôi đơ̆ng mĕ inh jur hloi lăm bơsat,

²⁰Hăm trŏ inh arih tŏ sĕt năr đĕch? Weh bĕ đơ̆ng inh, wă kơ inh đei hiôk 'biơ̆.

²¹Adrol kơ inh năm ưh pă đei brŏk dơ̆ng, năm tơ anih măng mu găm, măng klăm hơ'bơ̆l.

²²Tơ anih măng mu găm, măng klăm tơdrong rŭng, anih noh ưh kơ hơdah, măng mu đĕch.