Read bahnar Jop 12 Bible Online

Jop 12 - bahnar bible

Jop 12

²Lu iĕm ngeh lu iĕm bơngai hơgei, Mưh lu iĕm lôch tơdrong hơgei gô hiong hơdai lu iĕm mơ̆n.

³Mă-lei inh kư̆m hơgei thoi lu iĕm. Inh ưh kơ lŭch kơ lu iĕm ôh; bu mă ưh kơ băt tơdrong iĕm pơma.

⁴Inh jing bơngai chă pơhiĕk kơ bôl buăl. Mă khan inh đơ̆ng bơngai juăt krao khan apinh Kră Yang 'Bok Kei-Dei păng đei Sư tơl tơwih nơ̆r inh; Inh bơngai 'lơ̆ng tơpăt tôm tơdrong đĭ jing bơngai đe hiĕk ăr.

⁵Bơngai oei hiôk 'lơ̆ng pơjăm bơngai đei gleh truh. Bơngai bu tơpling jơ̆ng gô pơ̆k hloi.

⁶Bơsŭn lu bơngai tơgar jing mơdrŏng, Lu bơngai che bơle kơ Kră Yang 'Bok Kei-Dei oei hiôk hơđơ̆ng lăm ti lu sư Kră Yang 'Bok Kei-Dei ăn đei mŭk tơmam rơkah rơkai.

⁷Mă-lei apinh sem bri, lu sư gô bơtho pơhrăm kơ iĕm. Apinh lu sem păr, lu sư gô roi ăn kơ iĕm;

⁸Dah ih pơma dơnuh hăm teh, teh gô bơtho tơ'bôh kơ iĕm. Hăm lu ka đak dơsĭ, lu sư gô roi pơdah ăn kơ iĕm băt.

⁹Lăm lu sem brem 'nâu, sem brem ayơ mă khan ưh kơ băt kơ đơ̆ng ti Kră Yang 'Bok Kei-Dei pơm ngăl dôm tơmam 'noh?

¹⁰Sư chĕp lăm ti tơdrong arih lu sem brem noh păng kial dui jơhngơ̆m kơ kon bơngai.

¹¹Hăm trŏ kơ đon băt hơlen nơ̆r pơma, thoi hơpiĕt băt liah tơmam sa 'lơ̆ng kơnê̆?

¹²Bơngai kră jơnei đei tơdrong hơgei, bơngai arih sot đei tơdrong hlôh wao.

¹³Kră Yang 'Bok Kei-Dei gơh hơgei păng Mơsêh Mơyang gơh băt păng hlôh wao.

¹⁴Sư pơrăm, ưh pă đei bu man pơdơ̆ng ming. Sư phak ưh pă đei bu gơh tơlĕch.

¹⁵Sư bơ̆ găn lê̆ đak, đak glung hrơ̆ hrĕng hloi; Sư ăn 'mi đak lơ̆p kơ teh hloi,

¹⁶Tơdrong pran kơtang păng hơgei lăm Sư. Lăm Sư ngăl lu bơngai wơ̆l jrok păng lu bơngai mă pơm kơ đe wơ̆l jrok,

¹⁷Sư rôp anhăk phak lu bơngai pơthơr pơm tơdrong kơnê̆. Pơm ăn kơ lu 'bok sek tơlang jing kơtul kơwao.

¹⁸Sư yaih glang đêl lu pơtao chô̆. Păng tơ̆n kơpen tơ kơiĕng lu sư.

¹⁹Sư chông ba lu 'bok soi tơ nai, blơ̆ lê̆ lu bơngai pơm 'bok soi pơgơ̆r đunh.

²⁰Sư ăn 'bơ̆r bơngai mă đe gơnang kơmlo, păng iŏk lê̆ tơdrong hơgei đơ̆ng lu kră.

²¹Sư tuh tơdrong chhŭr nuih kơpal lu bơngai tih mơng. Yaih tơlei tơ̆n đơ̆ng lu bơngai pran.

²²Sư tơ'bôh ăn kơ dôm tơdrong hlơp pơm lăm măng mu. Pơm ăn kơ tơdrong pơm lăm măng mu jing hơdah đe 'bôh bang.

²³Sư ăn kơ adrĕch adrung bơngai rai mơdrŏng, đơ̆ng noh pơlôch pơrăm lu sư, pơih ăn kơ lu teh đak rai să păng ăn kơ lu sư tơklah tơklang.a

²⁴Sư iŏk lê̆ tơdrong hơgei đơ̆ng lu yŏng kơdră lăm tơring. Pơm kơ lu sư nơnăm wơ̆l kư̆ kă chă trong ưh kơ đei thoi lăm char glă.

²⁵Lu sư nơnăm chă jơjơ̆ lăm măng mu, ưh kơ đei hơdah, păng Kră Yang pơm kơ lu sư yak mơngưt mơngat thoi bơngai suai.