Read bahnar Jop 13 Bible Online

Jop 13 - bahnar bible

Jop 13

¹'Nâu măt inh 'bôh bơih dôm tơdrong 'noh, Đon inh kơtơ̆ng păng hlôh mơ̆n.

²Inh kư̆m dai băt; Inh ưh kơ lŭch kơ iĕm ôh.

³Mă-lei inh wă pơma hăm Kră Yang Tih Hloh. Inh hơpơi wă roi dŏng kơdih akâu hăm Kră Yang 'Bok Kei-Dei.

⁴Bĕ iĕm, lu iĕm pik bah hăm nơ̆r hơlĕnh. Đĭ-đăng tă kơ 'bok thây pơgang ưh kơ lĕch kiơ.

⁵Lei na iĕm ngăn ĕnh kơ pơma! Wă tơ'bôh kơ đe iĕm hơgei.

⁶Apinh iĕm mơ̆ng nơ̆r inh pơma dŏng kơdih, wă kơ iĕm băt inh pơma trŏ. Athei mơ̆ng bĕ mă nhen nơ̆r đơ̆ng 'bơ̆r inh pơma dŏng kơdih.

⁷Hăm trŏ đơ̆ng Kră Yang 'Bok Kei-Dei, Na iĕm pơ̆n pơma hơlĕnh? Hăm trŏ yua kơ Sư iĕm pơma pơdăr hă?

⁸Iĕm hăm wă pơdê Sư? Iĕm wă pơma dŏng Kră Yang 'Bok Kei-Dei ah?

⁹Lu iĕm hăm đei apah bơnê tơdah Sư lăng lăm jơhngơ̆m iĕm? Iĕm tơchĕng gơh hơlĕnh kơ Sư thoi hơlĕnh kơ kon bơngai hă?

¹⁰Sư gô hil phak iĕm tơpă. Tơdah iĕm oei pơdê Sư, mă khan hlơp lăm jơhngơ̆m.

¹¹Lu iĕm ưh kơ hli tơdrong mơsêh krưp Sư hă? Tơdrong mơsêh krưp đơ̆ng Sư ưh kơ wă pơm kơ lu iĕm hli hă?

¹²Tơdrong pơđơ̆k iĕm thoi 'mui tơnuh đĕch. Nơ̆r iĕm dŏng kơdih 'bônh tơgơ̆ thoi teh lơ̆n.

¹³Ngăn bĕ, lê̆ inh pơma. Mă khan đei tơdrong thoi yơ inh pŭ.

¹⁴Liơ inh lê̆ akâu inh kơdih lăm tơdrong hli krưp, păng chĕp tơdrong arih inh lăm ti?

¹⁵Mă Kră Yang pơlôch inh, inh kư̆m oei gơnang kơ sư; Mă-lei inh oei dŏng tơdrong arih inh 'bơ̆t anăp Sư.

¹⁶Đơ̆ng tơdrong 'noh bơih wă dŏng pơklaih inh. Yua kơ lu bơngai ưh kơ lui ưh kơ pơ̆n năm 'bơ̆t anăp Sư.

¹⁷Iĕm athei mơ̆ng mă nhen dôm nơ̆r inh pơma, Apinh iĕm pơgling đon mơ̆ng nơ̆r inh roi tơblang.

¹⁸Inh đei hơmet bơih nơ̆r inh wă pơma dŏng, Inh băt tơpă gô jei inh.

¹⁹Hăm đei bu wă pơjah hăm inh khan jei sư. Dah lei inh gô pơmơ̆ng ngăn gô lôch.

²⁰Apinh Kră Yang ăn kơ inh 'bar tơdrong đĕch wă kơ inh huay kơdâu ôn đơ̆ng Ih.

²¹Apinh Ih dui bĕ ti Ih ataih đơ̆ng inh, apinh Ih 'nĕ pă pơm kơ inh hli tơrơ kơ Ih dơ̆ng.

²²Ih Krao inh bĕ, inh gô tơl tơwih, dah mă ăn inh pơma, na Ih gô tơl nơ̆r inh.

²³Inh đei pơm yoch kơnê̆ dôm yơ bơih? Apinh Ih tơbăt ăn kơ inh pơm glăi pơm yoch noh.

²⁴Yua kơ kiơ Ih ôn muh măt đơ̆ng inh, Lăng inh thoi bơngai ayăt?

²⁵Ih hăm wă pơm tơhli inh thoi hla mă kial pơđông bơih, păng druh rôp hơnong 'ba kro ưh?

²⁶Yua kơ Ih phak bơih inh pŭ pơmat, păng ăn kơ inh pŭ dôm tơdrong yoch mă inh pơm kơplah oei tơdăm sơ̆.

²⁷Ih hơnuh bơih jơ̆ng inh kiơ̆ wei dôm trong mă inh yak năm păng 'moi kiơ̆ đêl jơ̆ng inh yak.

²⁸Na lăm inh thoi akâu bơngai ôm răm, thoi ao mua reh hiah hiot bơih.