Read bahnar Jop 14 Bible Online

Jop 14 - bahnar bible

Jop 14

¹Kon bơngai đơ̆ng bơngai drŏ-kăn rơneh, arih 'nao tŏ sĕt năr đĕch ră, mă-lei 'bĕnh kơ tơdrong pơmat-tat.

²Chăl arih kon bơngai thoi pơkao, pơgê tơlang kơsơ̆ jô kro, Sư hloh hlôi thoi ngôi, ưh kơ dơ̆ng.

³Mă khan thoi ei, măt Ih oei kiơ̆ lăng bơngai thoi noh, păng chông ba inh 'bơ̆t anăp Ih wă sek tơlang 'mơ̆i hă?

⁴Bu gơh pơm đơ̆ng bơngai pơm kơnê̆ 'mê̆-'mach mă jing 'lơ̆ng rơgoh? Ưh kơ đei bu!

⁵Khei 'năr kon bơngai arih Kră Yang đĭ hơgăt lê̆ bơih. Kră Yang băt đĭ kơsô̆ khei 'năr sư arih Kră Yang hơgăt lê̆ bơih năr tôch sư, lei sư ưh kơ gơh arih hloh kơ năr noh.

⁶Thoi noh apinh Kră Yang lê̆ pă lăng tơ sư, lê̆ sư hiôk 'biơ̆, Wă kơ sư chơt hiôk lăm năr sư oei arih thoi bơngai jang đei apah.

⁷Lu tơnơm 'long đe kăl bơih, kư̆m oei hơmĕng kơ wă bluh dơ̆ng, Tơnơm sư gô chăt bluh tơmơ̆ng dơ̆ng,

⁸Mă khan rơh sư rai kră lăm teh. Tơm sư lôch kro tơ lăm teh.

⁹Mưh đei hơyuh đak, sư gô chăt tơ'biĕng, păng bluh dơ̆ng thoi minh tơnơm 'long.

¹⁰Mă-lei kon bơngai dah lôch bơih, pă đei kiơ, kon bơngai kơtĕch jơhngơ̆m năm tơ yơ?

¹¹Thoi đak dơnâu hơyuh păr đông, thoi đak glung hrơ̆ păng hrĕng kro.

¹²Kon bơngai lôch bơih ưh pă arih dơ̆ng. Dĭng truh tơ plĕnh teh ưh pă đei kon bơngai kư̆m tam mă iung arih 'mơ̆i. Ưh kơ đei bu mă gơh râu tơiung sư đơ̆ng lôch.

¹³Hơpơi rŏ kơ Ih ôn inh tơ lăm bơsat klơ̆p ôn inh dĭng truh tơblĕk Ih ngach 'mơ̆i, Truh jơ 'năr đêl hơgăt kơ inh, apinh Ih 'blŏk kơ inh dơ̆ng!

¹⁴Bơngai lôch, hăm gơh iung arih dơ̆ng? Đĭ-đăng năr jang gleh glăn inh, inh răp gô tơ̆p mă inh gơh lĕch.

¹⁵Na Kră Yang gô krao, inh gô tơl; Ih gô 'blŏk mơnat mơ̆n kơ inh đơ̆ng ti Ih đei pơjing bơih.

¹⁶Ih gô jô̆ dôm kơnao jơ̆ng inh yak năm. Mă-lei ưh pă jô̆ đêl yoch inh pơm.

¹⁷Tơdrong yoch inh Ih pơklep pơsir lê̆ lăm kơdŭng, Ih đơ̆p lê̆ tơdrong yoch inh,

¹⁸Mă-lei thoi kông hơlih pơchah bru bra, păng thoi tơmo grŏl đơ̆ng anih sư tơ nai.

¹⁹Đak ro pơm kơ tơmo huach. Đak lơ̆p koch pơđĭ teh. Ih pơrăm lê̆ tơdrong hơmĕng kon bơngai thoi noh.

²⁰Jei Ih pă minh 'măng tôm bơih, na sư jăk hiong tơ nai. Ih tơplih muh măt sư păng puh tơweh sư.

²¹Dah lu kon tơdăm sư đe pơyom, sư kư̆m ưh kơ băt; Dah đe pơjăm lu sư, sư kư̆m ưh kơ 'bôh.

²²Sư hơtŏk băt băi kơ jĭ jăn kơdih akâu sư đĕch păng băt sơ'ngon pơmat kơdih akâu sư đĕch mơ̆n.