Read bahnar Jop 19 Bible Online

Jop 19 - bahnar bible

Jop 19

¹Jop tơl dơ̆ng:

²Lu iĕm wă pơma pơjĭ. Kơpu pơhĕch inh păng pơma pơjuă bơhlơ̆r inh dĭng dang yơ?

³Lu iĕm chă pơma pơjăm pơjuă mơjĭt wơ̆t kơ 'nâu bơih, lu iĕm pơm kơ inh pă đei hơkơch.

⁴Mă khan inh đei pơm yoch hĭ, tơdrong yoch inh noh lăp pơrăm kơdih akâu inh đĕch.

⁵Mă-lei tơdah lu iĕm tơchĕng khan lu iĕm hloh kơ inh Iŏk tơdrong pơmat-tat inh pơma tơhuăi inh,

⁶Iĕm athei băt 'nâu đơ̆ng Kră Yang 'Bok Kei-Dei pơmat pơrăm inh, păng dăng hơnhuăl Sư tăp kơ inh.

⁷Mă inh ôr krao, “Inh đei glăi răm bơih!” Kŭm ưh kơ đei bu tơl inh; inh krao dŏng, mă-lei ưh kơ đei bu sek dŏng tơpăt.

⁸Kră Yang war dur găn chĭt trong kuă ăn kơ inh năm truh. Pơm măng mu chĭt trong inh yak.

⁹Sư plôh lê̆ tơdrong đe pơư kơ inh păng plôh iŏk môk pơtao đơ̆ng kơ̆l inh.

¹⁰Sư teh tơpăk inh đơ̆ng puăn pah dĭng inh răm đĭ; Tơdrong inh chang hơmĕng Sư buch lê̆ đơ̆ng rơh thoi đe buch tơm 'long.

¹¹Tơdrong hil mĭl Sư khơ̆ng thoi ŭnh sa Sư lăng inh thoi bơngai ayăt.

¹²Lu linh Sư iung năm, blah sir hơbong kơ'nơp năm blah inh pơm anih năm wang tăp kơ bơsŭn inh.

¹³Sư pơm lê̆ kơ lu 'nhŏng oh inh weh ataih đơ̆ng inh, lu bơngai juăt kơ inh jing tơmoi nai.

¹⁴Buăl juăt tơm achăng lê̆ inh bơih, lu bơngai mă juăt dêh hăm inh kư̆m hiơt kơ inh.

¹⁵Lu buăl juăt păng lu drŏ-kăn awih awăn kơ inh lăng inh thoi bơngai nai. Inh thoi bơngai tơmoi nai lu sư ưh kơ băt kơ inh.

¹⁶Inh krao đĭch đam inh, mă-lei sư ưh kơ tơl nơ̆r inh. Mă khan inh pơih 'bơ̆r krao lung ră.

¹⁷Akăn inh lăng tơdrong arih inh jing krưp 'brơ̆, 'nhŏng oh inh lăng areh kơ inh.

¹⁸Truh kơ lu hơ'lơ̆p kư̆m pơjăm inh, tơwih rŏng mưh inh iung dang dơ̆ng.a

¹⁹Đĭ-đăng lu buăl inh juăt dêh 'brơ̆ kơ inh; Lu bơngai mă inh 'mêm kư̆m pơm plơ̆ kơ inh mơ̆n.

²⁰Inh hơkĕ oei pă akar sĕch klep kơting, inh klaih bơih ră oei pă lin lom hơnĕnh.

²¹Lu iĕm buăl juăt inh, apinh iĕm mơnat 'biơ̆ kơ inh, mơnat 'biơ̆ kơ inh bĕ, yua kơ ti Kră Yang 'Bok Kei-Dei teh inh bơih.

²²Liơ lu iĕm oei wă pơm kơnê̆ kơ inh thoi Kră Yang 'Bok Kei-Dei mơ̆n? Liơ iĕm jô̆ inh yoch ưh tam mă hrăp hă?

²³Ôi, rŏ kơ đe chih răk lu nơ̆r inh pơma! Rŏ kơ đe chih lăm sơnôm hla bơar akar!

²⁴Rŏ kơ đe chrek hăm 'long chih mam pơklep bơlơ̆k. Chhơ̆ tơ tơmo lat na oei đei ling-lang.

²⁵Mă-lei inh băt sĭt Tơ'ngla Dŏng Pơklaih inh oei arih, Sư gô iung dơ̆ng lăm năr tôch kơnh wă pơma dŏng inh kơpal teh.

²⁶Mă đơ̆ng rŏng kơ akar inh tơlŏng bơih, Inh hơpơi rŏ oei 'bôh Kră Yang 'Bok Kei-Dei, hăm akâu akar âu.

²⁷Inh gô 'bôh Sư păng măt inh kơdih, Măt inh gô 'bôh Sư, păng lăng Sư ưh pă hlĭch boih inh chang gô dĭng truh mă klơm klak inh hŏnh.

²⁸Kơplah lu iĕm chă đon khan: “Bơ̆n wă pơm kơnê̆ kơ sư liơ 'nâu?” Păng khan, tơm tơdrong pơmat 'nâu lĕch đơ̆ng sư đĕch.

²⁹Kơchăng bĕ hli kơ đao gưm yua kơ tơdrong hil kơ lu iĕm trŏ kơ phak hăm đao gưm Wă kơ lu iĕm băt năr sek tơlang wă jê̆ bơih.