Read bahnar Jop 2 Bible Online

Jop 2 - bahnar bible

Jop 2

¹Lăm minh năr nai đơ̆ng đei lu linh jang năm akŭm 'bơ̆t anăp Kră Yang, na Satan kư̆m năm mơ̆n 'bơ̆t anăp Kră Yang.

²Kră Yang jet Satan: “E đơ̆ng yơ?” Satan tơl Kră Yang, “inh chă lăng nơnăm juang jơ̆p-jang kơ teh đak.”

³Kră Yang khan kơ Satan: “E hăm 'bôh Jop bơngai mă hli yom kơ Inh, jơ̆p lăm teh đak ưh kơ đei bu thoi Jop minh 'nu bơngai 'lơ̆ng tơpăt, hli yom kơ Kră Yang 'Bok Kei-Dei păng weh ataih đơ̆ng tơdrong kơnê̆? Mă khan e apinh Inh wă kơ pơrăm sư tơdrong kơ đei, sư oei wei 'lơ̆ng tơpăt.”

⁴Satan tơl Kră Yang: “Akar 'mong akar. Minh 'nu bơngai kư̆m gơh jao đĭ mŭk tơmam sư đei wă tơplih iŏk tơdrong arih sư.

⁵Apinh Ih chro ti pơrăm truh tơ kơting sĕch Jop sĭt sư gô hiap Ih.”

⁶Kră Yang khan kơ Satan: “'Nâu e gơh pơm kơ Jop mă-lei e 'nĕ kơ pơlôch sư.”

⁷Thoi noh Satan weh đơ̆ng anăp Kră Yang, na sư pơm pơmat hloi Jop đei tơ'boch đuh đơ̆ng tơpang jơ̆ng truh tơ kơ̆l.

⁸Jop iŏk đơ̆ng kơcheh gŏ pơchah na hơkôih akâu jăn sư, sư hơ-oei lăm tơnuh.

⁹Akăn sư khan kơ sư: “Liơ ih oei wei kơjăp lăm tơdrong 'lơ̆ng? Hiap bĕ Kră Yang 'Bok Kei-Dei na lôch!”

¹⁰Mă-lei Jop khan kơ akăn sư: “Ih pơma thoi minh 'nu drŏ-kăn kơwao. Tơdrong pŭn hiôk đơ̆ng Kră Yang 'Bok Kei-Dei ăn, bơ̆n sơng iŏk; na tơdrong pơmat truh, ba wă ưh kơ iŏk hă?” Lăm đĭ dôm tơdrong noh, Jop ưh kơ đei pơma kơnê̆ 'bơm Kră Yang ôh.

¹¹Pêng 'nu buăl Jop kơtơ̆ng sư đei dôm tơdrong pơmat-tat noh lu sư pơđâu băl rim 'nu đơ̆ng tơring sư kơdih wă năm ngôi wang sơ'ngon păng wă pơlung Jop. Pêng 'nu noh anăn sư Êliphas đơ̆ng pơlei Têman, Bildat đơ̆ng char Sua păng Sôphar đơ̆ng tơring pơlei Naama.

¹²Đơ̆ng ataih, lu sư lăng 'bôh Jop, mă-lei lu sư ưh kơ kơnăl ôh. Lăp lu sư kơnăl kơ Jop bơih na nhơ̆m ôr, hek ao lu sư kơdih, chup 'mui teh săi tơ kơpal păng săi tơ kơ̆l kơdih.

¹³Lu sư hơ-oei tơ teh hăm Jop lăm tơpơh năr tơpơh măng; ưh kơ đei bu pơma minh nơ̆r, lu sư 'bôh Jop jĭ jăn pơmat-tat dêh.