Read bahnar Jop 21 Bible Online

Jop 21 - bahnar bible

Jop 21

¹Jop tơl khan:

²Mơ̆ng mă nhen nơ̆r inh pơma; Noh tơdrong mă iĕm wă pơlung inh.

³Adrin ĕnh, gô inh pơma: Đang kơ inh pơma bơih, lu iĕm gơh che bơle.

⁴Inh hăm pơma jŏk kơ kon bơngai? Liơ inh ưh kơ gơh kơ blĕk hă?

⁵Lăng bĕ tơ inh, Na iĕm 'bôh hlĭch; iŏk tơpang ti đơ̆p 'bơ̆r.

⁶Layơ inh 'blŏk kơ tơdrong noh, inh hli tơrơ dêh, Akâu akar inh pơpơ̆ tơtơ̆ đĭ.

⁷Liơ lu bơngai kơnê̆ oei arih, Rai arih sot păng rai kĕ pran?

⁸Lu sư 'bôh adrĕch adrung lu sư hiôk hơđơ̆ng. Păng kon sâu lu sư oei kơjăp 'bơ̆t anăp lu sư.

⁹Lu sư oei lăm hnam hiôk-hian, ưh kơ đei hli kơ kiơ, Sơnguĕt Kră Yang 'Bok Kei-Dei ưh kơ đei teh tôn lu sư.

¹⁰Rơmo tơno kiơ̆ akăn gô đei ưh kơ đei layơ hiong đĕch. Rơmo yŏng lu sư tuh ưh kơ đei 'lih.

¹¹Lu sư ăn kơ lu hơ'lơ̆p sư năm lĕch bru bra thoi khŭl triu, kon hơiĕ lu sư pơplŏng suang.

¹²Hơri suang kiơ̆ jơwa hơgơ̆r iĕ păng brŏ tĭng-nĭng, Păng hiôk chơt kiơ̆ jơwa re 'lal.

¹³Lu bơngai pơm kơnê̆ đei chăl arih mơdrŏng hiôk. Truh tơ lôch năm tơ bơsat 'bônh đĕch.

¹⁴Lu sư pơma hăm Kră Yang 'Bok Kei-Dei khan: “Weh ataih kơ lu nhôn, lu nhôn ưh kơ wă băt trong gơlong Ih.

¹⁵Kră Yang Tih Hloh noh kiơ, mă lu nhôn athei kơkuh kơ Sư? Krao khan apinh Sư đei lơi yua kiơ kơ lu nhôn?”

¹⁶Tơdrong mơdrŏng lu sư hăm đei oei lăm tơpang ti lu sư ưh? Inh weh ataih đơ̆ng bơngai pơm kơnê̆ pơđâu.

¹⁷Hơdôm wơ̆t ŭnh kơđeng bơngai pơm kơnê̆ păt? Hơdôm wơ̆t tơdrong pơmat truh tuh tơ lu sư, Kră Yang 'Bok Kei-Dei hil phak lu sư?

¹⁸Lu sư thoi hơnong 'ba anăp kial hơbŭt thoi hơkam 'ba kial hơbŭt pơđông?

¹⁹Lu iĕm khan: “Kră Yang 'Bok Kei-Dei 'măn tơdrong pơm kơnê̆ sư ăn kơ kon hơ'lơ̆p sư.” Apinh Kră Yang 'Bok Kei-Dei tơwih tơdrong noh kơ lu sư kơdih, wă kơ lu sư băt;

²⁰Ăn kơ măt lu sư 'bôh tơdrong pơrăm truh tơ lu sư, Ăn kơ lu sư đei huch tơdrong hil mĭl Kră Yang Tih Hloh.

²¹Yua kơ lu sư ưh kơ tơtăm kiơ truh kơ hnam dơnŏ, Đơ̆ng rŏng kơ lu sư lôch.

²²Bu pơ̆n bơtho Kră Yang 'Bok Kei-Dei, Kơplah Sư sek tơlang mă lu linh jang?

²³Đei bơngai arih liĕm akâu hiôk-hian Đei jơhngơ̆m pran jăng truh kơ lôch

²⁴Akâu jăn bek lơluĭnh 'bĕnh kơ rơmă păng ngăl kơting oei 'lơ̆ng hơnơ̆ng.

²⁵Bơngai to lôch, đĭ lăm chăl arih ơh sơ'ngon pơmat-tat. Ưh tam đei mơn 'bơm tơdrong pŭn hiôk liơ.

²⁶Đĭ kơ 'bar tă 'bĭch hơdai lăm 'mui teh ngăl, Hrai sa 'bĕnh-'bang pơđĭ kơ 'bar.

²⁷'Nâu, inh băt hơđăl đon iĕm tơchĕng, Lu iĕm wă pơrăm inh.

²⁸Lu iĕm jet: “Hnam bơngai pơm tih 'lơ̆ng oei tơ yơ? Bơsŭn lu bơngai pơm kơnê̆ oei tơ yơ?”

²⁹Liơ lu iĕm ưh kơ jet lu bơngai tơmoi rok trong? Liơ lu iĕm ưh kơ wă lui nơ̆r lu sư khan?

³⁰Lăm năr đei tơdrong truh, lu bơngai kơnê̆ oei gơh hiôk. Oei gơh klaih lăm năr hil mĭl?

³¹Bơngai bu pơ̆n jô̆ bơngai kơnê̆ yoch 'bơ̆t tơm măt sư? Bơngai bu pơ̆n pơm 'mong kiơ̆ thoi tơdrong sư pơm bơih?

³²Dah đe năm 'bŭ bơngai pơm kơnê̆ truh tơ bơsat, Bơsat sư đei bơngai gak.

³³Anih teh bơsat lăm thŭng pơm kơ sư hơbôn hiôk. Rim bơngai tơdui băl kiơ̆ năm 'bŭ sư. Bơngai năm adrol năm đơ̆ng rŏng lơlap lơlang.

³⁴Na, liơ lu iĕm tơchĕng oei gơh pơlung inh mă ưh kơ yua thoi noh? Dôm nơ̆r pơma lu iĕm tă kơ hơlĕnh ngăl.