Read bahnar Jop 22 Bible Online

Jop 22 - bahnar bible

Jop 22

¹Êliphas, bơngai Thêman tơl nơ̆r:

²Kon bơngai hăm đei yua kiơ kơ Kră Yang 'Bok Kei-Dei ưh? Bơngai hơgei lăp pơyua ăn kơ sư kơdih đĕch.

³Kră Yang Tih Hloh hăm đei hiôk chơt kiơ tơdah ih arih 'lơ̆ng tơpăt? Hăm đei yua kiơ kơ Sư dah trong ih yak 'lơ̆ng tôm tơdrong?

⁴Hăm trŏ yua kơ ih hli yom kơ Sư, na Sư chrih bơtho ih. Păng sek tơlang ih?

⁵Hăm trŏ yua kơ ih yoch tih dêh? Tơdrong yoch kơnê̆ ih pơm lơ dêh hă?

⁶Yua kơ ih pơgŏ ra đơ̆ng 'nhŏng oh ih tơmam pơkơ̆ng tơdrong kơ đei. Plôh iŏk hơbĕn ao lê̆ sư akâu hoh,

⁷Ih ưh kơ ăn đak nhă kơ bơngai lap, Ưh kơ ăn kơ bơngai pơngot tơmam sa.

⁸Lu bơngai pran gơh kĕ ih ăn sư đei teh; Bơngai đei đe pơyom ih ăn oei tơ 'noh.

⁹Ih pơpuh bơngai adro brŏk tơpang ti hoh. Lu bơngai mơti ih pơjuă lê̆ anih sư gơnang.

¹⁰Kơlih thoi noh, kap đăk tăp dăr kơ ih, Tơdrong hli krưp kơnê̆ gô pơm kơ ih;

¹¹Tơdrong hơdah pơm kơ ih măng mu ưh kơ 'bôh, Păng đak lơ̆p tơmôch ih.

¹²Ưh kơ trŏ Kră Yang 'Bok Kei-Dei oei tơ kơpal, tơ lu tăl plĕnh ti hă? Lăng bĕ tơ sơnglŏng kơjung hloh pă băt dang yơ!

¹³Na ih khan: “Kră Yang 'Bok Kei-Dei băt kiơ đăi? Liơ Kră Yang sek tơlang gơh 'bôh lăm măng mu hơ'bơ̆l 'noh?

¹⁴Hơmơ̆l găm gom jum dăr kơ Sư na Sư ưh kơ 'bôh; Păng Sư yak rok rŏng kơpal plĕnh.”

¹⁵Ih oei wă yak rok kiơ̆ trong so, Trong mă lu bơngai kơnê̆ juăt kơ rok hă?

¹⁶Đe rôp ba pơlôch lu sư adrol kơ năr pơkă, tơm tơdrong arih lu sư đe tơhiong hoch ro kiơ̆ đak glung;

¹⁷Lu sư khan kơ Kră Yang 'Bok Kei-Dei khan: “Ih athei weh ataih đơ̆ng lu nhôn bĕ; Kră Yang Tih Hloh gơh pơm kiơ kơ lu nhôn?”

¹⁸Mă-lei ră Kră Yang đei ăn kơ hnam lu sư 'bĕnh kơ tơmam 'lơ̆ng: Tơdrong lu bơngai kơnê̆ wă pơm weh ataih đơ̆ng inh!

¹⁹Lu bơngai 'lơ̆ng tơpăt chơt hiôk 'bôh tơdrong phak lu bơngai pơm kơnê̆. Na bơngai ưh kơ đei yoch gô che bơle kơ lu sư,

²⁰“Bơngai ayăt kơ lu bơ̆n sĭt gô lôch pơđĭ. Păng tơmam kiơ mă lu sư 'măn lê̆ ŭnh gô sa pơgoh.”

²¹Athei pơgơ̆p hiôk rơnŭk hăm Kră Yang 'Bok Kei-Dei. Athei arih hiôk-hian Đơ̆ng noh ih gô đei pŭn hiôk.

²²Athei sơng iŏk bĕ nơ̆r đơ̆ng 'bơ̆r Kră Yang bơtho, păng athei wei răk nơ̆r Sư lăm jơhngơ̆m ih.

²³Tơdah ih wih dơ̆ng tơ Kră Yang Tih Hloh, lei ih gô gơh đei hơmet ming dơ̆ng. Tơdah ih hŭt lê̆ tơdrong kơnê̆ ataih đơ̆ng anih bơsŭn ih.

²⁴Tơdah ih hŭt lê̆ maih tơ teh, păng klơ̆m maih ôphir tơ tơmo hơga lăm thong đak hrơ̆,

²⁵Tơdah ih gĭt kơ Kră Yang Tih Hloh thoi maih. Thoi hu mă ih gĭt.

²⁶Kơplah 'noh, ih gô đei tơdrong hiôk rơnŭk lăm Kră Yang Tih Hloh, ih gô hiôk ngơk muh măt tơ Kră Yang 'Bok Kei-Dei.

²⁷Ih gô krao apinh Sư, Sư gô mơ̆ng nơ̆r ih, Păng ih gô pơkeh tơdrong ih pơkă.

²⁸Tơdrong kiơ ih wă pơm sĭt gô jing; Tơdrong hơdah gô pơchrang lu trong ih.

²⁹Yua kơ Kră Yang 'Bok Kei-Dei gô tơjur lê̆ lu bơngai pơang na dŏng pơklaih bơngai iŏk đon ala.

³⁰Sư dŏng pơklaih lu bơngai ưh kơ yoch; Păng ih gô đei dŏng pơklaih tơdah ti ih 'lơ̆ng rơgoh.