Read bahnar Jop 24 Bible Online

Jop 24 - bahnar bible

Jop 24

¹Liơ Kră Yang Tih Hloh ưh kơ pơkă jơ 'năr wă sek tơlang? Liơ lu bơngai băt kơ Kră Yang ưh kơ 'bôh năr sek tơlang noh?

²Lu bơngai toh rĭ hơdral Plah tơgar iŏk triu rơmo puh wei rong iŏk;

³Tơgar iŏk aseh iĕ lu bơngai mơti 'bă, Rôp pơkơ̆ng iŏk rơmo lu yă adro po.

⁴Lu sư pơpuh lu bơngai dơnuh hin weh đơ̆ng trong tih. Lu bơngai pơmat-tat lăm teh đak chă ôn kơ'nơp.

⁵To, lu bơngai dơnuh hơwŏl hơwônh chă nhen thoi aseh iĕ tơ tơmăn glă; chă tơmam sa ăn kơ lu kon sư. Thoi aseh iĕ chă sa tơ lăm bri brah.

⁶Lu sư chă dônh sa, hơnong 'ba tơ lăm mir chŭn, Dônh mok plei hơmu lăm pơgar lu bơngai pơm kơnê̆.

⁷Kơmăng lu sư 'bĭch akâu hoh, ưh kơ đei hơbĕn ao, ưh kơ đei khăn su lăm măng tơngiĕt tơngiot.

⁸'Mi têh lu sư hơiuh tơngiĕt tơ kông ưh kơ đei anih wă yong, sư pơpring akâu cheng hơgơp tơmo.

⁹Lu bơngai pơm kơnê̆ tơgar iŏk kon mơti kơ 'bă oei mŏm; Rôp pơkơ̆ng kon hơ'lơ̆p lu bơngai dơnuh hin;

¹⁰Bơngai dơnuh răm năm akâu hoh ưh kơ đei ao, Tôi hơchô̆ 'ba, na klak pơngot.

¹¹Lu sư hmĕt đak rơmă lăm mir ôliwơ, Lu sư pơjuă plei hơmu tơ lăm kơthŭng, mă hơlŏng oei rơhing.

¹²Đơ̆ng lăm pơlei đei nơ̆r bơngai wă lôch ôr tơngưih Lu bơngai rơka ôr hơpơi krao dŏng. Mă-lei Kră Yang 'Bok Kei-Dei ưh kơ jô̆ noh tơdrong yoch lu bơngai pơm kơnê̆.

¹³Đei bơngai blah tơdrong hơdah. Ưh kơ băt trong tơdrong hơdah, kư̆m ưh kơ yak năm lăm trong hơdah mơ̆n.

¹⁴'Nao 'brưch bơngai pơlôch đe iung, pơlôch lu bơngai dơnuh hin păng hoh răm; Tơ kơmăng lu sư thoi lĕ bơngai tơtông.

¹⁵Măt lu bơngai ngôi pơyô kư̆ kă chang gô kơsơ̆ măng, Na khan: “Ưh kơ đei măt bu gơh 'bôh inh,” Na kơlŭk muh măt sư.

¹⁶Lu bơngai tơtông bŏk tơnăr hnam kơmăng, na kơ'năr lu sư chă ôn; Ưh kơ băt kơ hơdah.

¹⁷Gah lu sư măng mu noh kơ 'năr. Yua kơ lu sư pơm buăl juăt hăm tơdrong hli lăm măng mu gueo

¹⁸Lu sư thoi gơmơ̆k blôk đông hoch kơpal đak; Teh jang sa lu sư đe hiap pơtê̆ bơih; Ưh pă đei bu brŏk dơ̆ng bơih tơ pơgar hơmu lu sư.

¹⁹Tơdrong phang-ang păng tŏ pơhach lê̆ đak prĕl, Pơlei lôch kư̆m dui iŏk lu bơngai pơm yoch.

²⁰Mĕ mă pŭ gô hiơt lê̆ kơ lu sư; Lu hrai gô sa lu sư; Đe ưh pă 'blŏk kơ lu sư dơ̆ng; Păng tơdrong kơnê̆ tơgơ̆ bŭk thoi tơm 'long.

²¹Lu sư plah tơgar iŏk tơmam drŏ-kăn hơwŏng, Pơm kơnê̆ kơ lu yă adro po.

²²Mă-lei Kră Yang 'Bok Kei-Dei iŏk tơdrong pran kơtang pơlôch lu bơngai kơtang Ti Kră Yang hiŏng lu sư pă hơmĕng kơ arih.

²³Kră Yang lê̆ lu sư arih hiôk hơđơ̆ng. Măt Kră Yang oei răp lăng trong lu sư

²⁴Lu sư arih đei đe pơyom lăp minh bruh đĕch. Lu sư lôch hiong dong. Lu sư gô jô kro ruh hơlŭng thoi 'nhĕt Thoi hơie 'ba đe yuă lê̆ đơ̆ng tơm.

²⁵Tơdah ưh kơ đei thoi ei bơngai bu jô̆ khan kơ inh pơma hơlĕnh. Păng pơdah nơ̆r inh tơdrong kơ đei.