Read bahnar Jop 27 Bible Online

Jop 27 - bahnar bible

Jop 27

¹Jop oei pơma dơ̆ng păng khan:

²Kră Yang 'Bok Kei-Dei arih pơm kơdranh kơ inh, Sư ưh kơ wă sek ăn kơ inh tơpăt Kră Yang Tih Hloh, pơm kơ chăl arih inh chhŭr nuih.

³Dang yơ inh oei dui jơhngơ̆m, oei đei hơyuh kial arih Kră Yang 'Bok Kei-Dei oei lăm trôm muh inh.

⁴'Bơ̆r inh ưh kơ đei pơma tơdrong kơnê̆, Hơpiĕt inh kư̆m ưh kơ đei pơma hơlĕnh.

⁵Tơpă sĭt inh ưh kơ đei layơ khan jô̆ lu iĕm trŏ! Mă truh kơ lôch, inh oei jô̆ inh oei 'lơ̆ng tơpăt.

⁶Inh khan tơpă inh 'lơ̆ng tơpăt, inh ưh kơ đei tơplih nơ̆r; Đĭ lăm chăl arih inh, jơhngơ̆m inh ưh kơ đei chrih kơ inh.

⁷Rŏ kơ phak lu ayăt kơ inh thoi lu bơngai pơm kơnê̆, Lu bơngai blah inh sek phak lu sư thoi bơngai ưh kơ tơpăt.

⁸Lu bơngai ưh kơ lui đei chang hơmĕng kiơ mưh chăl arih âu tôch, Mưh Kră Yang 'Bok Kei-Dei pơdrâu lê̆ tơdrong arih lu sư?

⁹Kơplah đei tơdrong răm truh, Kră Yang 'Bok Kei-Dei hăm mơ̆ng nơ̆r lu sư krao ôr?

¹⁰Lu sư hăm đei chơchă tơdrong hiôk chơt lăm Kră Yang Tih Hloh, Hăm đei krao apinh Kră Yang 'Bok Kei-Dei ling-lang ưh?

¹¹Inh gô bơtho tơ'bôh ăn kơ lu iĕm, gah tơdrong Mơsêh Mơyang Kră Yang 'Bok Kei-Dei, Ưh kơ đei ôn kơ lu iĕm tơdrong kiơ Kră Yang Tih Hloh wă.

¹²Lu iĕm 'bôh băt hlôh bơih tơdrong 'noh, Lei liơ lu iĕm oei pơma nơ̆r tơdrong kơ đei?

¹³'Nâu, tơdrong mă Kră Yang 'Bok Kei-Dei 'măn kơ lu bơngai pơm kơnê̆, Mŭk tơmam kơ lu bơngai pơm kơnê̆ iŏk đơ̆ng Kră Yang Tih Hloh.

¹⁴Kon sâu lu sư rai lơ kơdrơ̆m kư̆m gô pơ̆k lôch yua kơ đao gưm. Adrĕch adrung lu sư ưh kơ đei sa phĭ mah.

¹⁵Lu bơngai oei arih hlot lu sư kư̆m gô lôch kơ tơdrong jĭ hơbuh, Mă akăn adro lu sư kư̆m ưh kơ đei nhơ̆m hmoi.

¹⁶Mă lu bơngai pơm kơnê̆ mong jên hu nhen thoi pơlao chuơh, Hơdrom hơbĕn ao hơlôk thoi pôi teh lơ̆n.

¹⁷Hơbĕn ao lu sư chơ̆p hơdrom, mă-lei lu bơngai tơpăt sư gô hrŭk Jên hu lu sư, bơngai 'lơ̆ng tơpăt gô asong băl.

¹⁸Hnam lu sư pơm, nhen thoi wai dŭng Thoi pơk đe pơm gô mir.

¹⁹Lu sư 'bĭch tep, mơdrŏng hiôk, hnam oei 'lơ̆ng. Lăp lu sư lar măt hnam ưh pă đei dơ̆ng.

²⁰Tơdrong hli krưp truh tơ lu sư nhen thoi đak lơ̆p; Kial hơbŭt kơmăng puh pơđông lê̆ lu sư.

²¹Kial đơ̆ng gah hơlĕch tơthu anhăk lu sư, na hiong hloi. Pơđông lê̆ lu sư đơ̆ng anih lu sư oei.

²²Huơ̆r pơdăr lu sư, ưh pă đei mơnat kơ lu sư; Lu sư adrin kơdâu ôn đơ̆ng kial tih.

²³Kial oei bah tơ lu sư thoi đe tap ti che bơle Păng hơhôch pơklai puh lu sư đơ̆ng anih lu sư oei.