Read bahnar Jop 28 Bible Online

Jop 28 - bahnar bible

Jop 28

¹Hu đei lăm sơlŭng đe sir iŏk, maih đei anih đe 'buh sư.

²Bơsei đe iŏk đơ̆ng lăm teh, Đe rơ̆ tơmo na đei kong.

³Bơngai jang lăm sơlŭng nhơk hơdah tơ lăm măng mu Bŏk sir jơ̆p tơ lăm sơlŭng Wă chă tơmo tơ lăm teh măng mu gueo.

⁴Đe sir trong sơlŭng ataih đơ̆ng anih kon bơngai oei, Tơ lăm anih rơwơ̆ng ưh kơ đei jơ̆ng bơngai bu năm truh; Lu sư chô̆ hơtol akâu hăm tơlei bơ̆jang ataih kơ bơngai nai.

⁵Hơnik hơnam chăt đơ̆ng teh. Mă-lei lăm ala teh đei tơplih nhen thoi đêl ŭnh oei sa tơdrŏ.

⁶Lăm lu tơmo đei tơmo gĭt, đei rang maih lăm noh.

⁷Sem chă choh sa ưh kơ băt trong 'nâu; Măt sem klang chă kư̆m ưh kơ 'bôh;

⁸Sem bri tam mă năm juă dăm-brang kư̆m ưh kơ năm rok noh.

⁹Kon bơngai gơh teh blah tơmo ŭnh, Sir bơlih lu jơ̆ng kông.

¹⁰Mưh bŏk tơmo wă pơih trong sơlŭng. Măt lu sư chă lăng lu tơmo gĭt tơ lăm noh.

¹¹Kon bơngai bơ̆ bơnơ̆ găn đak krong wă huay kơ ro; Wă kơ 'bôh lĕch tơ hơdah dôm tơmam kiơ mă ôn hlơp.

¹²Mă-lei chă tơdrong gơh hơgei đei đơ̆ng yơ? Tơ yơ tơm tơdrong hlôh wao?

¹³Kon bơngai ưh kơ băt trong ba truh tơ tơdrong gĭt gơh hơgei.a Ưh kơ gơh chă tơdrong hơgei tơ kơpal teh âu.

¹⁴Đak jrŭ khan: “Sư ưh kơ đei tơ lăm inh,” Đak dơsĭ khan: “Sư ưh kơ đei oei hơdai hăm inh.”

¹⁵Ưh kơ gơh iŏk kơtuăl maih wă tơplih iŏk sư, Kŭm ưh kơ gơh kŏng iŏk hu na gơh răt sư.

¹⁶Kŭm ưh kơ gơh hơgăt 'long gĭt sư hăm maih Ôphir tơmo gĭt ônik dah hăm tơmo gĭt saphir.

¹⁷Maih dah Phalê ưh kơ gơh pơting hăm sư, Tơmam pơm păng maih kư̆m ưh kơ gơh tơplih iŏk sư

¹⁸Mă tơmo pơkao gĭt lăm đak dơsĭ păng kơmĭl, ưh pă pơma truh dơ̆ng bơih. Tơdrong gơh hơgei gĭt hloh kơ tơmo gôh.

¹⁹Jơmŏng char Êthiôpi ưh kơ gơh pơting hăm sư ôh; Kŭm ưh kơ đei layơ hơgăt 'long gĭt sư hăm maih se.

²⁰Lei tơdrong gơh hơgei lĕch đơ̆ng yơ? Tơm 'bơ̆r đon hlôh wao đơ̆ng yơ?

²¹Gơh hơgei oei klơ̆p ôn lê̆ măt lu bơngai arih, Mă măt lu sem păr kư̆m ưh kơ 'bôh.

²²Hơlŭng jrŭ păng tơdrong lôch khan: “Đon lu nhôn đei kơtơ̆ng ang bơih đe roi.”

²³Lăp minh Kră Yang 'Bok Kei-Dei hlôh băt trong truh tơ gơh hơgei. Păng minh Sư đĕch băt kơ chă anih sư tơ yơ.

²⁴Yua kơ Sư lăng 'bôh tôch kơ teh, Păng 'bôh nhen jơ̆p kơpal teh đak ala plĕnh.

²⁵Layơ Sư ăn tơdrong kơtang kơ kial. Gơh kŏng tơng lăng đak.

²⁶Layơ Sư hơgăt ăn tơdrong juăt kơ bơyan 'mi, Pơih ăn trong kơ grơ̆m glaih.

²⁷Kơplah noh Kră Yang 'bôh tơdrong hơgei, păng tơbăt tơlĕch, ăn kơ đĭ-đăng rim bơngai athei mơ̆ng, Kră Yang lăng hơlen păng pơm sư kơjăp.

²⁸Kră Yang khan kơ kon bơngai “Hli yom kơ Kră Yang, noh bơih tơdrong gơh hơgei; Weh ataih đơ̆ng tơdrong kơnê̆, 'noh bơih tơdrong hlôh wao.”