Read bahnar Jop 30 Bible Online

Jop 30 - bahnar bible

Jop 30

¹Mă-lei dang ei, lu sư hiĕk ăr kơ inh, lu sư tơdăm 'lơ̆p hloh kơ inh, Mă 'bă lu sư, inh pă jô̆ bơih, wă jang wei triu. Hơdai hăm kŏ inh.

²Ti pran kơtang lu sư hăm đei yua kiơ kơ inh, Mưh jơhngơ̆m pran lu sư, pă đei bơih?

³Hơkĕ hơkong pơngot rơwĕt kơ'bah kơ'bôch, Thông hoang lăm teh hrĕng kro. Lăm bri rơwơ̆ng juơ juŏ.

⁴Lu sư phĕ hla 'long pơgang, păng lu hơmŭl 'long bri. Rơh tơlei 'long bri pơm tơmam sa lu sư.

⁵Đe puh tơweh lu sư đơ̆ng lăm kon pơlei; Đe hil hiap lu sư thoi lu bơngai tơtông.

⁶Lu sư oei rok lăm thong cheng kông, Lăm trôm lăm teh, dah lăm sơlam lu hơgơp tơmo.

⁷Lu sư krao ôr tơ lăm rơ̆m tơnơm 'long, Lu sư 'bĭch hơlun băl ala lu bơmreh jơla.

⁸Lu adrĕch ưh kơ gơh yua anăn sơnăm ưh kơ đei. Đe areh teh pơpuh tơlĕch lê̆ đơ̆ng lăm char.

⁹Na dang ei kon sâu lu sư hơri jô̆ pơjăm inh, Roi 'bơm che bơle kơ inh.

¹⁰Lu sư lăng inh krưp 'brơ̆, weh ataih kơ inh, Ưh pă hĕo gơsoh đak hai kơ muh măt inh.

¹¹Yua kơ Kră Yang 'Bok Kei-Dei yaih lê̆ dơhiĕng hră inh rơdu păng pơm kơ inh mơlâu. Na lu sư pă đei pơyom kiơ kơ inh.

¹²Gah 'ma kơ inh, minh khŭl bơngai kơlĕl iung blah; Blah inh kơdâu tơrơ. Sir sơlŭng wă pơrăm inh.

¹³Lu sư pơrăm lê̆ trong inh, Inh rai răm lu sư rai tŏk. Lu sư ưh kơ kăl bơngai pơdŏng.

¹⁴Lu sư blư truh hloi đơ̆ng trong đak hlôh tih. Lu sư blŭng mơ̆t grŏl rok đêl tơnăr hơlih.

¹⁵Lu tơdrong hli krưp năm pơm kơ inh, Đe tơhiong lê̆ tơdrong ư-ang đe pơyom kơ inh tơthu pơđông lê̆ tơ ataih. Tơdrong hiôk hơđơ̆ng inh păr đông thoi hơmơ̆l.

¹⁶Dang ei, tơdrong arih inh pơchah hach bơih, Năr pơmat-tat truh bơih tơ inh,

¹⁷Kơmăng đei tơdrong jĭ truh tơ kơting inh, Tơdrong jĭ rĕn sa inh, ưh kơ pơdơh.

¹⁸Tơdrong mơsêh tih Kră Yang 'Bok Kei-Dei, rôp pơdŭng ao inh. Chô̆ gơhret inh thoi chô̆ hơko ao.

¹⁹Kră Yang klơ̆m inh tơ teh trôk. Inh nhen thoi 'mui tơnuh.

²⁰Inh krao apinh, mă-lei Ih ưh kơ đei tơl; Inh dơ̆ng tơ noh, mă-lei Ih pă 'maih lăng tơ inh.

²¹Kră Yang jing pơm kơnê̆ hăm inh, Iŏk ti mơsêh Ih druh blah inh.

²²Ih ăn kial pơđông lê̆ inh tơ ataih. Ih pơpuh pơđông lê̆ inh hăm kial hơbŭt.

²³Inh băt tơpă Ih wă ba inh tơ tơdrong lôch. Anih pơkă wă 'măn kơ lu bơngai arih.

²⁴Tơpă ưh kơ đei bu yơ̆r ti pơrăm lu bơngai đei tơdrong gleh truh. Sư krao dŏng pơklaih, kơplah oei lăm anih pơmat-tat,

²⁵Inh ưh kơ đei nhơ̆m kơ bơngai tơ'bơ̆p tơdrong pơmat-tat hă? Jơhngơ̆m inh ưh kơ đei sơ'ngon kơ bơngai răm-'băm hă?

²⁶'Bơ̆t mă inh răp gô tơdrong pŭn hiôk, tơdrong pơmat-tat truh; 'Bơ̆t mă inh chang tơdrong hơdah, tơdrong măng mu truh.

²⁷Inh ơh sơ'ngon klơm klak inh hŏnh bop đĭ pă hiôk, Lu tơdrong pơmat truh hơlôk hơlak.

²⁸Inh năm akâu găm đĭ. Ưh kơ trŏ yua kơ tŏ sa. Inh iung dơ̆ng tŏk-bŏk tơpôl păng krao apinh dŏng pơklaih.

²⁹Inh jing 'nhŏng oh hăm kŏ bri, Bôl juăt hăm sem chhơng.

³⁰Akar inh jing găm păng tơlŏng akâu jăn inh yuh tơtŏ kơ chĕp bơlŏ.

³¹Inh reh brŏ tĭng-nĭng lăm ơh sơ'ngon. Inh hlôm 'lal hăm re nơ̆r nhơ̆m hmoi.