Read bahnar Jop 33 Bible Online

Jop 33 - bahnar bible

Jop 33

¹“Ơ Jop, apinh ih mơ̆ng bĕ nơ̆r inh pơma. Pơgling đon mơ̆ng bĕ dôm nơ̆r inh pơma.

²'Nâu inh ha bơih 'bơ̆r, nơ̆r inh pơma lăm hơpiĕt inh bơih.

³Nơ̆r inh pơma gô lĕch tơdrong tơpăt đơ̆ng lăm jơhngơ̆m. Hơkŭng inh gô pơma hăm tơdrong hlôh wao tơpăt sĭt.

⁴Yang bơhngol 'lơ̆ng Kră Yang 'Bok Kei-Dei pơjing inh bơih, Hơyuh kial dui jơhngơ̆m Kră Yang Tih Hloh ăn kơ inh arih.

⁵Tơdah ih gơh tơl bĕ nơ̆r inh iung dơ̆ng ră roi bĕ dôm nơ̆r trŏ wă dŏng ih 'bơ̆t anăp inh!

⁶'Bơ̆t anăp Kră Yang 'Bok Kei-Dei inh kư̆m thoi ih Sư kư̆m man pơjing inh hăm teh lơ̆n.

⁷Apinh ih 'nĕ kơ hli kơ kiơ kiơ. Inh ưh kơ đei pơma kơtĭt trăp tơ ih.

⁸Tơpă đon inh đei kơtơ̆ng bơih nơ̆r ih pơma, Inh mơ̆ng bơih nơ̆r ih pơma:

⁹‘Inh 'lơ̆ng rơgoh, ưh kơ đei pơm glăi; Inh ưh kơ đei yoch, ưh kơlah pơm yoch.

¹⁰Mă-lei Kră Yang 'Bok Kei-Dei chă tơdrong yoch inh, Sư pơm kơ inh thoi bơngai ayăt.

¹¹Kră Yang hơnuh lê̆ jơ̆ng inh. Răp lăng rim trong inh yak.’

¹²Inh tơl, ih pơma thoi noh glăi. Kră Yang 'Bok Kei-Dei tih hloh kơ kon bơngai.

¹³Liơ ih pơjah pơjăng hăm Sư? Chrih kơ Sư khan ưh kơ tơl nơ̆r ih.

¹⁴Yua kơ Kră Yang 'Bok Kei-Dei pơma bơtho lơ 'măng, lơ tơdrong Mă-lei kon bơngai bơ̆n ưh kơ wă mơ̆ng,

¹⁵Lăm tơdrong apo, lăm tơdrong tơ'bôh tơ kơmăng. Kơplah kon bơngai oei tep hlơ̆k, 'Bĭch tep tơ kơpal giơng sư,

¹⁶Kră Yang pơih đon wă kơ lu sư mơ̆ng. Pơsĭt nơ̆r chrih bơtho tơhli lu sư wă kơchăng.

¹⁷Wă kơ kon bơngai weh đơ̆ng tơdrong pơm kơnê̆, păng hŭt lê̆ jơhngơ̆m juăt pơang.

¹⁸Wă dŏng pơklaih bơhngol lu sư đơ̆ng sơlŭng jrŭ, Wă wei tơdrong arih huay kơ lôch răm kơ đao gưm.

¹⁹Kră Yang bơtho hơmet kon bơngai hăm tơdrong jĭ jăn dêh 'bĭch păn kơpal giơng, Kơting pơpơ̆ tơtey ling-lang,

²⁰Pơm ưh kơ 'maih sŏng sa, kư̆m areh mă tơmam sa 'băt 'lơ̆ng.

²¹Akâu akar lu sư hơkĕ hơkong Lăp 'bôh kơting kơtong sĕch akar đĭ klep.

²²Bơhngol truh bơih 'bơ̆t jê̆ sơlŭng jrŭ. Tơdrong arih oei gô yang lôch năm iŏk.

²³Mă-lei tơdah kơplah 'nâu đei linh jang 'lơ̆ng truh, Lăp minh 'nu lăm rơbâu hơngan linh jang. Wă pơm 'long sơlam bơtho kon bơngai pơm tơdrong trŏ.

²⁴Mơnat kơ sư na apinh lung Kră Yang 'Bok Kei-Dei khan: ‘Dŏng pơklaih sư wă huay kơ huŏng lăm sơlŭng jrŭ, inh chă 'bôh bơih trong huai iŏk.’

²⁵Na akâu sĕch akar sư rơmuăn nhen thoi oei 'lơ̆p; Jơhngơ̆m pran sư hơlơ̆k dơ̆ng thoi oei mơlôh.

²⁶Sư krao apinh Kră Yang 'Bok Kei-Dei, na Kră Yang tơl tơwih. Sư kơkuh kơ Kră Yang hăm tơdrong chơt hiôk. Yua kơ Kră Yang huai iŏk sư.

²⁷Sư hat hơri păng roi tơbăt 'bơ̆t anăp đĭ-đăng bơngai. ‘Inh pơm yoch bơih yak đŏng đĕo weh đơ̆ng trong tơpăt. Mă-lei Kră Yang ưh kơ đei phak kiơ̆ kơ inh yoch.

²⁸Kră Yang dŏng pơklaih bơhngol inh huay kơ huŏng lăm sơlŭng jrŭ, Ăn kơ tơdrong arih inh chơt hiôk 'bôh hơdah.’

²⁹Tơpă Kră Yang 'Bok Kei-Dei pơm tơdrong noh. Kơ kon bơngai kơ băt hơdôm 'măng.

³⁰Wă dui iŏk bơhngol kon bơngai klaih đơ̆ng sơlŭng jrŭ. Wă ăn kơ kon bơngai gơh đei arih hơdah pơchrang.

³¹Ơ Jop, mơ̆ng inh bĕ athei oei hreh, mơ̆ng inh pơma.

³²Tơdah ih đei tơdrong kiơ 'maih tơl inh; Pơma bĕ, yua kơ inh 'maih 'bôh ih 'lơ̆ng tơpăt.

³³Tơdah ưh, athei ih mơ̆ng; Athei oei hreh mơ̆ng inh bơtho tơdrong gơh hơgei.”