Read bahnar Jop 39 Bible Online

Jop 39 - bahnar bible

Jop 39

¹Ih hăm băt bơyan kiơ bơbe bri su ưh? Ih hăm 'bôh bơyan kiơ juei yŏng tuh kon?

²Ih hăm đei jô̆ sư anăp hơdôm khei? Ih hăm băt jơ 'năr sư tuh,

³sư drum kơchôt jơ̆ng. Ôr jĭ dêh kơplah kon sư lĕch?

⁴Lu kon iĕ sư pran jăng, tih wơ̆ lăm tơmăn glă; Đơ̆ng noh tơklah kơ mĕ năm ưh pă wih dơ̆ng.

⁵Bu ăn kon aseh bri kơdâu pơplŏng mơ̆ng kơ wă, Bu yaih ăn kơ aseh iĕ hơbĕch hơbal to?

⁶Inh ăn kơ sư tơmăn glă pơm hnam, Teh đei 'boh pơm anih oei.

⁷Sư hiĕk pơjăm pơlei tih hrơ̆ng hreng. Ưh kơ đei kơtơ̆ng ôh nơ̆r bơngai wei aseh iĕ ôr.

⁸Kông groi noh tơmăn 'nhĕt sư, Sư năm jơ̆p-jang chă 'nhĕt 'nao bluh.

⁹Rơmo bri hăm chu jang kơ ih ưh? Sư hăm chu drum 'bĭch kơmăng lăm hơdrong ưh?

¹⁰Ih hăm gơh tah rơmo bri tơ 'long rơuơ na choh mir ưh? Sư hăm chu kiơ̆ đơ̆ng rŏng ih na 'bơ tŭn tơ lăm thŭng?

¹¹Ih hăm wă yua rơmo bri mă pran jăng dêh? Hăm wă jao kơ sư tơdrong jang gleh lap?

¹²Ih hăm lui ngeh kơ sư wă chơ ba 'ba ih păng chơ iŏk đơ̆ng anih preh 'ba?

¹³Grơ̆-ă tơtuh pơnăr hiôk chơt; mă-lei sŏk pơnăr sư ưh kơ đei dang sŏk pơnăr sem bŏng ko.

¹⁴Yua kơ grơ̆-ă pră kơtăp sư kơdih tơ lăm teh, Pơ'nơ̆m kơtăp sư tơ lăm chuơh,

¹⁵Hiơt lê̆ kơnh đei jơ̆ng juă kơpal noh. Păng đei kon sem bri pơjuă lê̆ kơtăp sư.

¹⁶Grơ̆-ă hăm lu kon sư, nhen lĕ ưh pă kon kơdih. Ưh pă hli pơmat-tat mă sư kơtăp lơ hĭ.

¹⁷Yua kơ Kră Yang 'Bok Kei-Dei ưh kơ ăn tơdrong gơh hơgei kơ sư, Kŭm ưh kơ đei asong ôh tơdrong hlôh wao kơ sư.

¹⁸Tơdah kơplah sư iung kơdâu sư hiĕk ăr kơ aseh hăm bơngai hao aseh.

¹⁹Ih hăm ăn kơ aseh jơhngơ̆m pran ưh Ih hăm ăn kơ hơko sư, chăt grôi?

²⁰Ih hăm pơm kơ sư pơplŏng thoi lep, Aseh hmoi heh heh hăm pơm kơ đe hli?

²¹Sư kôch teh lăm thŭng, hiôk chơt jơhngơ̆m pran sư; Sư drong tơ anăp lu linh chĕp khêl đao.

²²Sư lăng tơdrong hli hơi đĕch, ưh kơ hli tơdrong kiơ, 'Bơ̆t anăp pla đao gưm sư ưh kơ đei kơdŭn.

²³Kơpal rŏng sư 'brơ̆m lăm jŏ re mơgrĕk mơgrŏk. Hơlă păng tơju tŏ pơchrang rang hlơ-hlêr.

²⁴Hăm tơdrong nuih păng blĕk sư kơdâu hrĕnh. Kơplah hlôm keng re, sư ưh kơ kĕ ĕnh dơ̆ng minh 'bôt.

²⁵Lăp kơtơ̆ng đe hlôm keng, sư ôr: Heh he, Đơ̆ng ataih sư 'bâu hơyuh tơblah, Sư kơtơ̆ng nơ̆r lu yŏng linh krao tơkĕch thoi grơ̆m.

²⁶Hăm trŏ yua tơdrong hơgei ih na kon klang kơtơp păr weh. Pơđêng pơnăr sư păr tơ gah gơal?

²⁷Hăm trŏ kiơ̆ nơ̆r ih tơtă na sem klang dơsum păr tŏk, Pơm tơpu sư tơ anih kơjung?

²⁸Sư pơm tơpu pơm hnam lăm trôm tơmo. Lăm trôm tơmo hơđang pơm anih kơjăp.

²⁹Đơ̆ng anih noh, sư chă rôp sem sa, Măt sư lăng 'bôh đơ̆ng ataih tơpă.

³⁰Lu hơnar sư trep sa pham, Anih ayơ đei kon sem lôch lei đei hloi sư tơ noh.