Read bahnar Jop 4 Bible Online

Jop 4 - bahnar bible

Jop 4

¹Êliphas, bơngai Thêman sư tơl:

²Tơdah đei bơngai pơ̆n pơma dơnuh hăm ih, ih hăm hiôk ưh? “Mă-lei hăm đei bu mă kĕ ĕnh ưh kơ pơma?

³Ki sơ̆, ih đei bơtho pơlung lơ bơngai, Ih đei tơgŭm bơih ti rơdu jing pran.

⁴Nơ̆r ih pơma tơgŭm bơngai pơ̆k gơh iung dơ̆ng, Ih pơm ăn kŭl-tăng rơdu jing jăng.

⁵Mă-lei dang ei đei tơdrong gleh truh kơ ih, mă ih kư̆m ưh kơ kĕ chu iŏk; Ih tơ'bơ̆p tơdrong pơmat-tat, na ih hli tơrơ.

⁶Ih hli yom kơ Kră Yang 'Bok Kei-Dei, liơ ih ưh kơ lui kơjăp? Ih arih 'lơ̆ng tơpăt, liơ mă ưh kơ đei hơmĕng?”

⁷“Ih athei tơchĕng lăng 'mơ̆i, hăm đei bơngai 'lơ̆ng tơpăt ưh kơ pơm yoch mă wă lôch hiong? Păng hăm đei anih ayơ bơngai 'lơ̆ng tơpăt đe pơrăm?

⁸Kiơ̆ thoi inh 'bôh bơngai mă choh hăm tơdrong kơnê̆, lu bơngai rei tơdrong pơmat-tat đĕch, gô kĕch iŏk tơdrong noh.

⁹Hơyuh kial dui jơhngơ̆m Kră Yang 'Bok Kei-Dei pơrăm lu sư. Tơdrong Kră Yang 'Bok Kei-Dei hil mĭl na lu sư hiong răm.

¹⁰Mă khan bơngai kơnê̆ grĕnh arum thoi dăm-brang, hơnĕnh dăm-brang yŏng Kră Yang gơ̆ lê̆ bơih.

¹¹Dăm-brang pran kơtang lôch yua kơ ưh kơ đei sem bri wă sa. Păng khŭl dăm-brang kon lu sư tơklah tơklang.”

¹²Minh nơ̆r pơma hơgơ̆m truh tơ inh. Đon inh kơtơ̆ng nơ̆r pơma mơmơnh.

¹³Oei tep tơchĕng kơ tơdrong apo 'bôh kơmăng, kơplah tŏk-bŏk măng đĭ-đăng bơngai oei tep hlơ̆k

¹⁴Tơdrong hli truh tơ inh pơm kơ inh tơtơ̆, pơpơ̆ đĭ-đăng kơting.

¹⁵Đei hơyuh kial bah brih muh măt inh, pơm kơ inh tĭr hơdrôt sŏk sop iung!

¹⁶Đei ngôi rup noh dơ̆ng hĭ, inh lăng ưh kơ kơnăl. Đei hơbŏ bơngai lĕch dơ̆ng 'bơ̆t anăp inh. Oei dơ̆ng hreh, inh kơtơ̆ng nơ̆r pơma:

¹⁷‘Kon bơngai bơ̆n hăm đei bu 'lơ̆ng tơpăt 'bơ̆t anăp Kră Yang 'Bok Kei-Dei? 'Bơ̆t anăp Kră Yang Tơ'ngla pơjing hăm đei bu 'lơ̆ng rơgoh?

¹⁸Mă lu đĭch đam Sư, Sư kư̆m ưh kơ ngeh. Lu Lĭnh Jang, Sư kư̆m oei jô̆ glăi.

¹⁹Pơma kiơ kơ kon bơngai đơ̆ng teh lơ̆n. Pơjing đơ̆ng 'mui teh, trŏ kơ pơjuă bơhlơ̆r thoi mua kơmot.

²⁰Lăm minh pơgê kơsơ̆ đe pơrăm sư hĕch hoch. Lôch hiong hlŏng hloi ưh kơ đei bu băt dơ̆ng.

²¹Mưh tơlei bơsŭn plôh tơ nai. Lu sư gô lôch, pă đei bu hŏk iŏk gơh hơgei.’