Read bahnar Jop 41 Bible Online

Jop 41 - bahnar bible

Jop 41

¹Ih hăm gơh wah sem brem tiha dah yua tơlei chô̆ hơpiĕt sư kơjăp?

²Ih hăm gơh tôt muh sư hăm tơlei ưh, dah tôt kang sư hăm gơwŏk mam?

³Sư hăm krao apinh lung ih ưh? Pơma dơnuh hăm ih hiôk ưh?

⁴Dah apinh pơgơ̆p hăm ih, wă bơ̆jang kơ ih đĭ chăl arih ưh?

⁵Ih hăm pơ̆n hơnul ngôi hăm sư nhen thoi hơnul hăm sem păr. Chô̆ sư ăn kơ lu kon drŏ-kăn ih hơnul pơchơt ngôi ưh?

⁶Khŭl bơngai chă ka hăm tơgar băl kơ sư. Blah asong 'nhĕm sư tĕch ăn kơ lu bơngai mơdro ka ưh?

⁷Ih hăm gơh iŏk hok 'bet 'bĕnh kơ akar sư; Iŏk tơju hrang ka na 'bet 'bĕnh kơ kơ̆l sư hă?

⁸Tơdah ti ih pơlong hơtŭt 'bơm sư. Ih gô 'blŏk tơdrong tơblah noh ưh pă wă pơm dơ̆ng!

⁹Tơdrong hơmĕng wă gơh rôp sư noh hiong đĭ hloi. Lăng 'bôh sư đĕch đe tơtơ̆ pơ̆k hraih đang hloi.

¹⁰Ưh kơ đei bu nuih pơ̆n bơhle sư; Lei, bu pơ̆n dơ̆ng 'bơ̆t anăp Inh?

¹¹Bu ăn kơ Inh kiơ boih adrol, na Inh gơh pơdrâu ăn kơ sư dơ̆ng? Đĭ-đăng tơmam tơ ala kơ plĕnh tă kơ tơmam Inh ngăl.

¹²Inh ưh kơ kĕ kơ ĕnh ôh 'bôh jơ̆ng ti sư, Jơhngơ̆m pran păng akâu hơbŏ liĕm sư.

¹³Hăm đei bu pơ̆n 'bet klĕch ao tai sư 'bar tăl? Hăm đei bu pơ̆n năm jê̆ kang sư đei 'bar tŏ dam?b

¹⁴Bu hăm pơ̆n hek 'bơ̆r sư? 'Bĕnh kơ hơnĕnh krưp dêh.

¹⁵Kơchap kơpal rŏng sư lơ.c Thoi trong khêl đe pơrĕng. Tơklep băl glĭp kơjăp;

¹⁶Khêl 'nâu tơklep kơ khêl to, Kial mah ưh kơ gơh klĕch hlôi.

¹⁷Lu sư tơklep băl ưh kơ gơh pleh lê̆,

¹⁸Sư gơseh chêr lĕch hơdah, Măt sư hơdah rang thoi 'năr lĕch til pơgê.

¹⁹Pla ŭnh lĕch đơ̆ng 'bơ̆r sư, Pla ŭnh tơprah tơ puăn pah.

²⁰'Nhui lĕch đơ̆ng trôm muh sư thoi gŏ tŏ blôk, yuh kơklơ̆k kơklăk.

²¹Hơyuh kial dui jơhngơ̆m sư sa ngar khơ̆ng, Pla ŭnh lĕch đơ̆ng 'bơ̆r sư,

²²Hơko sư đei pran kơtang, Rim 'nu bơngai hli krưp kơdâu tơklah tơklang đơ̆ng anăp sư.

²³Lu akar sĕch sư tơklep băl kơjăp, Klep hơrăk thoi đe tuh bơsei, ưh kơ đei tơpleh.

²⁴Plei nuih sư arăng nhen thoi tơmo. Hơrăng thoi kơ kơdŭt tơpăl.

²⁵Kơplah sư iung, mă lu bơngai nuih kơtang kư̆m hli tơtơ̆ ngăl; Lu sư hli tơrơ na kơdâu ôn.

²⁶Iŏk đao 'bet sư, kư̆m ưh kơ klĕch. Mă iŏk hơlă, hok, dah tơju kư̆m lei-lăi đĕch.

²⁷Sư lăng bơsei thoi lĕ kơ hơnong 'ba. Mam kong kư̆m thoi lĕ kơ 'long bŭk.

²⁸Mă 'brơ̆m hră kư̆m ưh đei pơm ăn kơ sư hli kơdâu ôn. Mă hră kaosu prah sư hăm tơmo Sư lăng thoi hơkam 'ba.

²⁹Mă teh sư hăm 'long jra nhen thoi hơnong 'ba, Hiĕk che bơle jơwa hơlă đe hrang weo weo.

³⁰Ala klak sư đei lu akar suĕng thoi ge pơchah. Mưh sư ah klak năm đei trong rek jrŭ lăm hlŭt nhen thoi trong kơđĭnh đe pơ̆ng kơpal tơ̆r rơmo đe dui kơpal anih đe preh 'ba.

³¹Sư glơi lăm anih jrŭ đak poh-yă nhen thoi đak blôk lăm gŏ. Pơm ăn kơ đak dơsĭ tơprah re nhen thoi đe rơ̆ pơgang lăm gŏ.

³²Đơ̆ng rŏng sư đei blô̆k gơmơ̆k rang hơdah. Lăm anih đak jrŭ kok thoi sŏk ko,

³³Kơpal teh âu ưh kơ đei kon sem kiơ tam dang sư; Sư jing kon sem mă ưh kơ băt hli tơdrong kiơ.

³⁴Sư lăng lu sem brem tih ala kơ sư ngăl. Sư pơm pơtao đĭ kơ lu kon sem brem bri brah.