Read bahnar Jop 5 Bible Online

Jop 5 - bahnar bible

Jop 5

¹“Ih krao apinh bĕ, hăm đei bu tơl ih? Ih wă gơnang kơ bu lăm lu linh jang 'lơ̆ng rơgoh?

²Lu bơngai kơtul đei jơhngơ̆m blĕk pơlôch kơdih akâu, jơhngơ̆m gar pơlôch lu bơngai kơhlôh kơwao.

³Inh 'bôh bơih lu bơngai kơtul rai chăt rơh, mă-lei pă 'biơ̆ đĕch Kră Yang gô hiap anih hnam sư oei.a

⁴Lu kon hơ'lơ̆p sư ưh kơ đei hơđơ̆ng ôh, đe gô juă bơhlơ̆r 'bơ̆t 'măng jang, na ưh kơ đei bu dŏng lu sư.

⁵Lu bơngai pơngot sa đĭ dôm lu plei sư phĕ yuă. Lu sư kư̆m sa plei chăt đơ̆ng lăm rơ̆m jơla; păng lu bơngai rơhing, 'nhĕng kơ mŭk tơmam lu sư.

⁶Yua kơ tơdrong pơmat-tat kon bơngai ưh kơ lĕch đơ̆ng 'mui teh ôh, Hăm tơdrong rŭng răng kon bơngai kư̆m ưh kơ chăt đơ̆ng teh mơ̆n;

⁷Mă-lei đơ̆ng năr đe tơpŭ kơ kon bơngai sư đei tơdrong pơmat-tat. Tơpă gô thoi ŭnh đeh đông tơ kơpal.”b

⁸“Gah inh, inh gô krao chă Kră Yang 'Bok Kei-Dei, inh gô pơjao tơdrong inh kơ Sư

⁹Sư pơm dôm tơdrong tih-tin, ưh kơ đei bu hlôh, Tơdrong hlĭch chrơp ưh pă kĕ jô̆.

¹⁰Sư ăn đak 'mi jur tơ teh. Đak 'mi hơiuh kơ mir na.

¹¹Sư tơiung lu bơngai răm-'băm. Ăn kơ lu bơngai nhơ̆m hmoi oei tơ anih hơđơ̆ng.

¹²Sư pơrăm lê̆ tơdrong lu bơngai kơnê̆ chă đon wă pơm. Ăn kơ tơdrong kiơ ti lu sư wă pơm ưh kơ jing.

¹³Sư rôp lu bơngai hơgei 'bơ̆r đon huŏng lăm tơdrong kơnê̆ lu sư wă pơm. Sư kư̆m pơtôch lê̆ 'bônh đĕch tơdrong lu bơngai kơnê̆ wă pơm.

¹⁴Kơ'năr lu sư yak thoi lăm măng mu. Tŏk-bŏk 'năr dơ̆ng lu sư chă hơwơ̆ thoi kơmăng.

¹⁵Mă-lei Sư dŏng pơklaih lu bơngai pơmat-tat đơ̆ng đao gưm,c pơklaih lu sư đơ̆ng 'bơ̆r păng ti lu bơngai pran kơtang.

¹⁶Thoi noh lu bơngai dơnuh hoh đei chang hơmĕng, lu bơngai kơnê̆ Kră Yang pơŏm lê̆ 'bơ̆r.”

¹⁷“'Nâu, pŭn dêh kơ bơngai mă Kră Yang 'Bok Kei-Dei teh bơtho, thoi noh 'nĕ kơ lăng hơi, kơ Kră Yang Tih Hloh teh bơtho.

¹⁸Sư teh rơka, mă-lei Sư gô pơ̆n ming hơmet, Sư teh jĭ, mă-lei Sư gô pơklaih.

¹⁹Ih đei tơ'bơ̆p tơdrong pơmat-tat tơdrâu tơpơh 'măng, Sư oei dŏng pơklaih ih.

²⁰Lăm tơdrong pơngot rơwĕt, Sư dŏng pơklaih ih đơ̆ng lôch. Lăm tơdrong tơblah Sư pơklaih ih đơ̆ng đao gưm wă pơlôch ih.

²¹Sư pơklaih ih đơ̆ng 'bơ̆r hơpiĕt bơngai pơma kơnê̆, Ih huay kơ hli ôh mă tơdrong răm truh.

²²Ih gô hiĕk hơđơ̆ng mă tơdrong răm păng tơdrong pơngot rơwĕt truh. Mă sem bri ih kư̆m huay kơ hli.

²³Mir chŭn ih choh huay kơ tơmo păng lu sem bri brah oei hiôk hăm ih.

²⁴Ih gô băt sĭt bơsŭn anih ih oei hiôk jơnap. Ih gô wei rong lu khŭl triu rơmo ih, oei tôm ưh kơ đei hiong ayơ.

²⁵Ih gô 'bôh adrĕch adrung kon sâu lơ kơdrơ̆m, kon sâu ih lơ thoi 'nhĕt kơpal teh.

²⁶Ih gô brŏk tơ bơsat kơplah ih 'lŏ kră sot lơ sơnăm thoi hơchô̆ 'ba truh tơ anih preh 'ba lăp bơyan.”

²⁷“Dôm tơdrong noh lu nhôn lăng sĭt trŏ tơpă boih. Mơ̆ng bĕ inh, na ih gô băt tơdrong noh.”