Read bahnar Jop 6 Bible Online

Jop 6 - bahnar bible

Jop 6

²“Ôi! Hơpơi rŏ kơ đe kŏng lăng tơdrong pơmat-tat inh, dôm tơdrong gleh pơmat inh dan kơpal 'long kŏng!

³Tơdrong noh trăp hloh kơ chuơh đak dơsĭ! Yua kơ noh bơih na inh pă kĕ ĕnh pơma.

⁴Yua kơ 'brơ̆m Tơ'ngla Kră Yang Hloh prah 'bơm inh, Jơhngơ̆m inh huch đak hơkăm, Inh hli tơrơ tơdrong Kră Yang 'Bok Kei-Dei blah inh.

⁵Aseh iĕ hăm hmoi ôr tơdah sư đei 'nhĕt sa? Dah rơmo hăm hmoi tơdah sư đei 'nhĕt kro sa?

⁶Tơmam sa sap, đe hăm tah 'boh ưh?a Lăm lăk kok kơtăp iĕr hăm đei 'bâu kiơ ưh?

⁷Inh ưh kơ wă sa tơmam noh ôh; sa rai thim jĭ jăn.”

⁸“Ơ inh wă dêh dôm tơdrong apinh noh đei; Rŏ dêh kơ Kră Yang 'Bok Kei-Dei ăn đei dôm tơdrong inh hơpơi wă.

⁹Kuă kơ kiơ Kră Yang lăp đon pơjuă bơhlơ̆r inh. Rŏ kơ Sư yua ti Sư chơ̆ng kơtĕch lê̆ chăl arih inh.

¹⁰Tơdrong lôch noh jing tơdrong pơlung inh; păng inh gô pơplŏng chơt hiôk lăm tơdrong jĭ jăn dêh. Yua kơ inh ưh kơ đei sơngah dôm nơ̆r Kră Yang Tơ'ngla 'Lơ̆ng Rơgoh pơma.”

¹¹“Inh đei jơhngơ̆m pran đơ̆ng yơ mă kĕ chang gô. Chăl arih inh tôch liơ ning-mônh, na inh mah adrin?

¹²Jơhngơ̆m pran inh hăm trŏ kơ thoi tơmo? Akâu inh hăm trŏ kơ thoi kong?

¹³Tơpă inh ưh kơ gơh tơgŭm inh kơdih ôh, păng tơm tơdrong tơgŭm dŏng inh đĭ weh ataih đơ̆ng inh.

¹⁴“Bơngai rơdu ơh sơ'ngon kăl kơ đei 'bôh buăl tơgŭm pơlung, mă khan bơngai noh hiong tơdrong hli yom kơ Kră Yang Tih Hloh.

¹⁵Lu 'nhŏng oh inh jing bơngai hơlĕnh, nhen thoi thong đak hrĕng kro. Thoi đak lơ̆p ro koch jăng.

¹⁶Đak noh gơsŏk yua kơ prĕl. Đak krong rai tŏk yua kơ prĕl hach.

¹⁷Mưh đei bơyan tŏ đak hrơ̆, b mưh đei 'năr tŏ pơchrang, đak hrơ̆ kro đĭ.

¹⁸Lu bơngai mơdro hao lăk-đa weh trong nai; năm jrok lăm char glă păng lôch hiong đĭ.

¹⁹Lu bơngai mơdro đơ̆ng pơlei Têma chơchă đak Lu bơngai mơdro đơ̆ng tơring Sêba hơmĕng kơ đei đak.

²⁰Lu sư hơwơ̆l hơwang yua kơ lui hơmĕng dêh. Truh tơ thong bơngoi sơ'ngon.

²¹Kiơ̆ kơ inh 'bôh, lu iĕm thoi lu thong noh, lu iĕm 'bôh tơdrong pơmat-tat inh, lăng krưp păng hli tơrơ.

²²Inh ưh kơ đei apinh lu iĕm: “Apinh iĕm ăn bĕ tơmam kơ inh! Apinh pơyơ̆r ăn bĕ kơ inh tơmam đơ̆ng lu iĕm đei!

²³Apinh pơklaih inh đơ̆ng ti lu bơngai ayăt bĕ! Dah khan, huai iŏk inh bĕ đơ̆ng ti lu bơngai pơjuă pơđep inh!”

²⁴“Apinh iĕm bơtho tơ'bôh kơ inh, na inh ngăn hreh; Apinh tơ'bôh tơbăt kơ inh pơm glăi 'bơ̆t yơ.

²⁵Nơ̆r chrih trŏ,c pơm jĭ jơhngơ̆m tơpă! Mă-lei lu iĕm wă chrih kơ inh tơdrong kiơ?

²⁶Lu iĕm tơchĕng gơh chrih bơtho inh, nơ̆r liơ? Kơplah lu iĕm lăng nơ̆r inh pơma gah tơdrong pơmat-tat thoi kial tơthu.

²⁷Lu iĕm hăm đei hlang lăng tơgar băl iŏk kon mơti, dah tơplih buăl iĕm iŏk tơmam?”

²⁸“Dang ei, inh apinh iĕm lăng tơpăt tơ muh măt inh, inh ưh kơ đei pơma hơlĕnh kơ lu iĕm.

²⁹Inh apinh lu iĕm tơchĕng lăng dơ̆ng, 'nĕ chă jâu kư̆ kă. Apinh lu iĕm lăng hơlen bĕ, inh ưh kơ đei yoch.

³⁰Hơpiĕt inh hăm lah pơma kiơ hơlĕnh? Inh ưh kơ băt dah inh hơlĕnh hă?”