Read bahnar Jop 7 Bible Online

Jop 7 - bahnar bible

Jop 7

¹“Chăl arih kon bơngai kơpal teh thoi bơngai linh jang gleh lap, hăm trŏ năr sư arih thoi bơngai jang apah kơ năr?

²Thoi bơngai đĭch hơpơi dêh kơ đei yơ̆p, thoi bơngai jang apah chang hơmĕng kơ jên khei,

³Kŭm thoi noh, khei năr arih inh ưh kơ đei hơmĕng kơ kiơ, inh arih pơmat-tat prăt măng.

⁴Mưh inh 'bĭch tep, inh jet kơdih, layơ inh iung? Mă-lei măng jing kơjung tai, inh pơpơ̆ blông đang dĭng truh 'brưch hơdah.

⁵Akâu inh hrai kuer sa, akar inh kơchap tơ'boch thoi hrŭk ao. Akar inh kro hơđang jing đuh.”

⁶“Chăl arih inh năm kuăng thoi kơtuăl brai đe wai, inh lôch tôch hiong ưh kơ đei hơmĕng kiơ.

⁷Apinh Kră Yang 'Bok Kei-Dei 'blŏk chăl arih inh thoi minh hơyuh kial dui jơhngơ̆m; Măt inh ưh pă đei 'bôh tơdrong pŭn hiôk bơih.

⁸Măt bu mă lăng inh ưh pă 'bôh inh bơih; măt Ih chă lăng inh, pă đei inh bơih.

⁹Thoi hơmơ̆l păr đông hiong đĭ. Thoi noh mơ̆n kon bơngai jur năm tơ pơlei lôch ưh pă gơh brŏk dơ̆ng.

¹⁰Sư ưh pă brŏk tơ hnam sư dơ̆ng, tơ anih sư oei sơ̆ ưh pă 'bôh sư dơ̆ng.”

¹¹“Yua kơ noh na inh ưh kơ ĕnh nơ̆r inh wă pơma; Yua kơ jơhngơ̆m inh sơ'ngon inh gô pơma; inh gô ôr mưh jơhngơ̆m inh pơmat dêh.

¹²Inh hăm trŏ kơ đak dơsĭ Tih, dah 'bih Prao lăm đak dơsĭ jrŭ, Na Ih mah wei gak inh?

¹³Mưh inh tơchĕng, giơng inh gô pơlung inh, kơplah inh 'bĭch inh hiôk jơhngơ̆m dă 'biơ̆ tơtok

¹⁴Kơplah noh Ih gô pơm kơ inh hli lăm tơdrong apo, hli tơrơ krưp lăm tơdrong inh 'bôh.

¹⁵Kơtrơ̆m jah đe ket hơlŏng inh kơtĕch jơhngơ̆m, jah lôch 'lơ̆ng hloh kơ arih lăm kơting akâu âu.

¹⁶Inh đĭ hăl bơih tơdrong arih inh; Inh đĭ ưh pă 'maih arih bơih. Apinh ih 'nĕ pă hiơ̆k kơ inh, yua kơ chăl arih âu thoi minh hơyuh kial dui jơhngơ̆m đĕch.”

¹⁷“Kon bơngai noh kiơ Ih mă gĭt kơ sư, Ih mah 'blŏk tơchĕng kơ sư,

¹⁸păng lăng hơlen rim pơgê, pơlong lăng sư ling-lang?

¹⁹Dĭng dang yơ mă Ih ưh pă lăng tơ inh. Jah lê̆ inh rơhơi jơhngơ̆m gơh luăn đak hai.

²⁰Ơ Kră Yang mă wei-lăng kon bơngai, tơdah inh đei pơm yoch, inh hăm pơm kiơ kơ Ih? Liơ Ih pơjing inh pơm tơmam Ih prah pơđam? Liơ inh tă jing bơngai pơhiơ̆k Ih?

²¹Yua kơ kiơ Ih ưh kơ mơnat ăn tơdrong yoch inh păng huay pă jô̆ tơdrong yoch inh. Ưh pă đunh bơih inh gô 'bĭch lăm 'mui teh; Ih gô chơchă inh, mă-lei pă đei inh bơih.”