Read bahnar Jop 9 Bible Online

Jop 9 - bahnar bible

Jop 9

¹Jop tơl khan:

²Inh băt sĭt tơdrong noh trŏ; Mă-lei kon bơngai liơ gơh 'lơ̆ng tơpăt 'bơ̆t anăp Kră Yang 'Bok Kei-Dei?

³Tơdah wă pơjah hăm Kră Yang 'Bok Kei-Dei, Sư jet rơbâu nơ̆r ưh kơ đei bu gơh tơl minh nơ̆r,

⁴Kră Yang 'Bok Kei-Dei mơsêh păng hơgei, hăm đei bu kĕ pơjah pơjăng hăm Kră Yang 'Bok Kei-Dei na jei sư?

⁵Kră Yang 'Bok Kei-Dei hiŏng kông, kông ưh kơ băt adrol, lăm năr Sư hil Sư bơlih plơ̆ lê̆ kông.

⁶Sư gơgŭ teh đơ̆ng hơnă sư, jrăng tơjră sư pơpơ̆ gĭl-gŭl;

⁷Sư tơtă kơ măt 'năr 'nĕ kơ lĕch Sư găn lê̆ lu sơnglŏng

⁸Minh 'nu Sư đĕch bơlang plĕnh Păng dơ̆ng juă kơpal đak dơsĭ poh-yă.

⁹Sư pơjing kơ sơnglŏng Klang-giônga păng sơnglŏng Tung yăb. Hơnglŏng hơdrŭng iĕrc păng khŭl jơ'bôt sơnglŏng gah gơal.d

¹⁰Sư pơm lu tơdrong tih-tin ưh kơ đei bu kĕ băt, tơdrong hlĭch chrơp bu kĕ jô̆.

¹¹Dah Sư năm rok cheng inh, inh ưh kơ 'bôh Sư, dah Sư yak brih inh kư̆m ưh kơ kơnăl.

¹²Tơdah Sư tơgar pleh đơ̆ng bu, bu pơ̆n khă Sư? Bu pơ̆n khan kơ Sư, “Ih pơm kiơ thoi noh?”

¹³Kră Yang 'Bok Kei-Dei ưh kơ đei lê̆ ôh tơdrong Sư hil; Lu bơngai tơgŭm Rahape bon drap ala jơ̆ng Sư.

¹⁴Thoi noh liơ inh gơh tơl nơ̆r Sư? Inh wă gơh rơih nơ̆r ayơ tơl Sư?

¹⁵Mă inh rơgoh huay kơ yoch kư̆m ưh kơ gơh pơma dŏng dih kâu, Inh lăp apinh mơnat đĕch đơ̆ng Tơ'ngla sek tơlang inh.

¹⁶Mă Sư tơl nơ̆r inh krao apinh, inh kư̆m oei ưh kơ ngeh Sư mơ̆ng nơ̆r inh

¹⁷Sư pơm kial hơbŭt tơpơ̆k inh, păng pơm kơ rơka rai să tơdrong kơ đei.

¹⁸Sư ưh kơ ăn kơ inh hơya chă kial dui jơhngơ̆m, mă-lei roi ăn kơ inh sơ'ngon rai dêh.

¹⁹Dah pơlong lăng jơhngơ̆m pran, jei Sư! Tơdah gơnang tơdrong trŏ lăp, bu pơ̆n kêng sư?

²⁰Mă khan inh bơngai 'lơ̆ng tơpăt huay kơ yoch. Nơ̆r lĕch đơ̆ng 'bơ̆r inh gô jô̆ inh yoch; mă khan inh bơngai tơpăt Sư gô tơ'bôh ăn kơ inh đŏng đĕo.

²¹Inh 'lơ̆ng tơpăt, mă-lei inh khan kơdih ưh kơ yua kiơ; inh areh kơ tơdrong arih inh.

²²Đĭ-đăng bơngai lei-lăi đĕch; na inh khan, Sư pơrăm bơngai tơpăt hăm bơngai pơm kơnê̆.

²³Mưh đei tơdrong truh pơlôch pơrăm ưh kơ tam băt. Sư hiĕk ăr kơ bơngai ưh kơ đei yoch.

²⁴Kơplah teh đak jao bơih kơ lu bơngai pơm kơnê̆ pơgơ̆r. Sư chĭt lê̆ măt lu 'bok sek tơlang lăm teh đak. Tơdah ưh kơ trŏ Sư pơm lei bu pơm?

²⁵Năr chăl arih inh năm hrĕnh hloh kơ bơngai kơdâu năm roi tơbăt, Lu năr chăl arih inh kơdâu ôn bơih ưh kơ đei tơdrong pŭn hiôk.

²⁶Lu sư bah kuăng thoi plŭng tanh kram, thoi klang bruh rôp sa sem.

²⁷Tơdah inh khan kơdih. “Inh ưh pă ôr tơtok bơih, inh gô pơm tơ'bôh muh măt oei hiôk hiĕk chơt.”

²⁸Inh hli kơ oei pŭ dôm tơdrong pơmat-tat inh, yua kơ inh băt, Ih ưh kơ jô̆ inh bơngai tơpăt;

²⁹Tơdah Kră Yang oei jô̆ inh yoch, lei liơ oei nŏng kơ ming hơmet ưh kơ yua kiơ?

³⁰Mă khan inh hum hơpĕch hăm 'bŏng, păng ôp ti inh păng tơnuh.

³¹Ih kư̆m oei tơhuŏng inh lăm sơlŭng. Dĭng mah ao inh lăng inh 'mê̆ krưp.

³²Tơpă, Sư ưh kơ trŏ kon bơngai thoi inh, Wă kơ inh gơh tơl Sư; Wă kơ nhi gơh năm hơdai tơ anih sek tơlang.

³³Rŏ kơ đei bu dơ̆ng sơlam sek kơ nhi. Đei gơh sek pơđĭ 'bar pah ba.

³⁴Noh boih na mă Kră Yang 'Bok Kei-Dei iŏk lê̆ 'long băl wă teh đơ̆ng kơdŭ rŏng inh, wă kơ inh huay pă hli tơrơ kơ Sư dơ̆ng.

³⁵Lei na inh gơh pơma dơnuh hăm Sư, huay pă hli bơih, yua kơ inh ưh kơ gơh pơm thoi noh ôh dang ei.