Read bahnar Horiso 10 Bible Online

Horiso 10 - bahnar bible

Horiso 10

¹Ơ Kră Yang, yua kơ kiơ Ih dơ̆ng ataih, Kơplah đei tơdrong pơmat-tat liơ Ih ôn akâu?

²Lu bơngai kơnê̆, hăm tơdrong pơang lu sư druh lu dơnuh răm; Ăn kơ lu sư 'leh lăm hơđong mă lu sư đăk.

³Yua kơ lu bơngai kơnê̆ pơư kơdih kơ tơdrong lu sư 'maih wă; Lu bơngai ham kơ tơmam, achăng lê̆ păng pơjăm Kră Yang.

⁴Lu bơngai kơnê̆ pơang, ưh kơ wă chă Kră Yang. Đĭ tơdrong sư tơchĕng khan ưh kơ đei Kră Yang ôh.

⁵Trong sư đei jinga ling-lang; Tơdrong Ih sek tơlang Kră Yang tih tơpă hloh kơ, măt lu sư 'bôh; Sư hiĕk pơjăm đĭ-đăng lu ayăt kơ sư.

⁶Sư tơchĕng lăm jơhngơ̆m khan: “Inh ưh pă tơdrŏ tơdrĕnh; Lăm chăl inh ưh kơ đei tơdrong kiơ truh gleh.”

⁷'Bơ̆r sư 'bĕnh kơ blei hiap, hơlĕnh pơdăr pơjăm pơjuă. Lăm hơpiĕt sư băt pơdăr păng pơm kơnê̆.

⁸Sư oei răp jê̆ pơlei, pơlôch bơngai ưh kơ đei yoch, lăm anih hlơp; Măt lu sư răp lăng wă pơm kơ lu bơngai pơmat-tat.

⁹Sư ôn lăm anih hlơp thoi dăm-brang oei lăm trôm sơlŭng sư, Sư oei răp wă rôp lu bơngai dơnuh răm. Sư răp bơngai dơnuh răm puh lăm hơnhuăl sư, na rôp hloi lu sư.

¹⁰Sư kŭp drap, na lu bơngai dơnuh răm huŏng lăm tơdrong kơtang.

¹¹Sư khan lăm jơhngơ̆m. “Kră Yang 'Bok Kei-Dei hiơt boih, Kră Yang ôn muh măt Sư, lăng pă 'bôh boih.”

¹²Ơ Kră Yang! Iung bĕ Ih, Ơ Kră Yang 'Bok Kei-Dei, yơ̆r ti Ih bĕ; 'Nĕ hiơt kơ bơngai răm-'băm.

¹³Yua kơ kiơ lu bơngai kơnê̆ blei hiap Kră Yang 'Bok Kei-Dei? Păng khan: “Kră Yang ưh pă đei wă phak pơmat inh boih,”

¹⁴Kră Yang 'bôh boih, tơdrong răm, pơmat-tat hăm tơdrong gleh, Na ti Ih pơm tơwih kơ lu sư. Lu bơngai răm-'băm jao akâu lu sư tơ Kră Yang; Kră Yang jơ̆ Tơ'ngla tơgŭm lu bơngai mơti.

¹⁵Gơ̆ bĕ kơkŏng ti lu bơngai kơnê̆, păng pơrăm tơdrong kơnê̆ lu bơngai yoch, dĭng pă 'bôh 'bơ̆t anăp Ih.

¹⁶Kră Yang boih Pơtao ling-lang hlŏng hloi; Lu teh đak gô pơrăm đĭ đơ̆ng dêh char sư.

¹⁷Ơ Kră Yang, Ih mơ̆ng boih nơ̆r lu bơngai 'lơ̆ng tơpăt 'maih wă. Ih pơm ăn kơ jơhngơ̆m lu sư kơjăp, Ih pơgling đon mơ̆ng lu sư,

¹⁸Wă pơm tơdrong tơpăt kơ lu mơti kơ 'bă păng lu bơngai mă đe pơjuă pơđep. Wă kơ lu kon bơngai mă lĕch đơ̆ng 'mui teh, ưh pă pơm tơhli băl dơ̆ng.