Read bahnar Horiso 102 Bible Online

Horiso 102 - bahnar bible

Horiso 102

¹Ơ Kră Yang, apinh Ih mơng nơ̆r inh krao khan. Ăn kơ nơ̆r inh hơpơi dŏng truh tơ Ih.

²Lăm năr pơmat-tat, apinh 'nĕ ôn muh măt Ih kơ inh. Apinh Ih pơgling đon mơ̆ng nơ̆r inh; Lăm năr inh krao hơpơi, apinh mă kuăng jah tơl tơwih kơ inh.

³Yua kơ khei năr inh oei arih hiong hach thoi 'nhui, Kơting inh ngŭr thoi ŭnh sa ngar.

⁴Jơhngơ̆m inh đe pơjuă, jô kro thoi 'nhĕt. Dĭng inh mah hiơt kơ sŏng sa.

⁵Yua kơ tơdrong inh tơtok tơtăm sĕch inh đĭ klep kơ kơting.

⁶Inh nhen thoi grơ̆ lăm char glă, kư̆m thoi bơrơ̆m oei lăm tơ bri brah.

⁷Inh kral, inh nhen thoi sem rĕch oei hơdrô̆ kơpal bơbŭng hnam.

⁸Prăt năr lu bơngai ayăt pơ'brơh kơ inh; Lu bơngai pơrăm inh yua anăn inh blei hiap.

⁹Inh sa tơnuh tơplih kơ por. Đak inh nhă hrâu păng đak măt.

¹⁰Yua kơ Ih hil mĭl dêh hiŏng klơ̆m lê̆ inh tơ ataih.

¹¹Khei năr inh oei arih nhen thoi yơ̆p wă kơsơ̆ măng. Inh jô kro thoi 'nhĕt,

¹²Mă-lei ơ Kră Yang! Ih oei pơm pơtao ling-lang. 'Blŏk kơ anăn Ih đĭ jơhnơr.

¹³Ih gô iung păng 'mêm kơ Siôn; Trŏ boih năr wă mơnat ăn kơ Siôn, năr đêl pơkă truh boih.

¹⁴Lu đĭch đam Ih 'mêm dêh kơ tơmo Siôn. Păng 'mêm kơ 'mui teh sư mơ̆n.

¹⁵Đĭ kon pơlei pơla gô hli yom kơ anăn Kră Yang, Đĭ-đăng pơtao lăm teh đak gô hli yom kơ tơdrong ư-ang Ih.

¹⁶Kră Yang gô pơjing dơ̆ng pơlei Siôn. Sư gô pơdah Sư kơdih lăm tơdrong ư-ang

¹⁷Sư gô mơ̆ng nơ̆r lu bơngai pơmat-tat krao khan. Ưh kơ đei pơdê lê̆ dôm nơ̆r lu sư apinh.

¹⁸Chih 'măn lê̆ bĕ tơdrong âu kơ chăl đơ̆ng rŏng. Minh adrĕch pơjing đơ̆ng rŏng lu sư gô kơkuh bơnê kơ Kră Yang;

¹⁹Kră Yang nger lăng bơih đơ̆ng anih 'lơ̆ng rơgoh. Đơ̆ng kơpal plĕnh Sư lăng tơ teh đak.

²⁰Wă kơtơ̆ng nơ̆r đơ̆ng lu bơnă ôr krao. Păng dŏng pơklaih bơngai mă đe wă pơlôch;

²¹Wă kơ đe ră roi anăn Kră Yang lăm Siôn. Păng kơkuh bơnê kơ Sư tơ lăm Jêrusalem,

²²Kơplah lu kon pơlei, lu dêh char pơtao akŭm băl wă kơkuh kơ Kră Yang.

²³Sư pơm ăn jơhngơ̆m inh rơdu lăm chăl arih inh, Pơm ăn kơ lu năr arih inh rai djăl.

²⁴Inh khan: “Ơ Kră Yang 'Bok Kei-Dei inh! 'Nĕ kơ iŏk lê̆ inh tŏk-bŏk oei hơmuh hơmŏng. Lu sơnăm Ih oei oei ling-lang.”

²⁵Blŭng-a sơ̆ Ih pơjing teh đak păng lu plĕnh đơ̆ng ti Ih pơjing.

²⁶Lu plĕnh teh gô hiong răm mă-lei Ih oei oei ling-lang; Plĕnh teh gô so thoi ao tai; Ih gô tơplih plĕnh teh thoi tơplih ao păng lu sư jing hŭt lê̆.

²⁷Mă-lei Ih ưh kơ đei layơ tơplih. Lu sơnăm Ih ưh kơ đei layơ tôch.

²⁸Lu kon sâu đĭch đam Ih oei đei ling-lang. Adrĕch adrung lu sư đei pơjing rai kơjăp 'bơ̆t anăp Ih.