Read bahnar Horiso 104 Bible Online

Horiso 104 - bahnar bible

Horiso 104

¹Ơ bơhngol inh hơri bơnê bĕ kơ Kră Yang! Ơ Kră Yang 'Bok Kei-Dei inh. Ih Tih tơpă. Ih hrŭk boih tơdrong ư-ang păng krưp rŏ tơpă!

²Kră Yang gom Sư kơdih hăm tơdrong hơdah, Nhen thoi minh blah ao tai Sư bơyar plĕnh thoi bơyar bơsŭn.

³Sư roh hơpok hnam kơpal sư tơ kơpal đak,a Sư yua hơmơ̆l pơm gre. Sư hao kơpal pơnăr kial.

⁴Sư yua kial pơm bơngai pơtruh nơ̆r Sư. Pla ŭnh pơm đĭch đam Sư.

⁵Sư dan teh tơ kơpal lu hơnă teh noh, wă kơ teh ưh pă tơdrŏ pơpơ̆ dơ̆ng

⁶Ih yua dơsĭ jrŭ gom teh thoi gom hăm ao. Đak tŏk kơjung hloh kơ lu kông,

⁷Ih hil chrih đak tơrơ hloi kơtơ̆ng jơwa grơ̆m Ih đak kơdâu ôn đĭ

⁸Đĭ kông tŏk kơjung, lu thŭng thong huŏng tơ ala truh tơ anih mă Ih đei 'măn kơ sư.

⁹Ih hơgăt kơ đak dang noh boih ưh pă gơh tŏk hloh dơ̆ng, na huay kơ lơ̆p teh.

¹⁰Sư pơm kơ lu đak glung lĕch ro jơ̆p kơ thong sư ro sơlam kông.

¹¹Đak glung noh ăn lu sem bri nhă; đơ̆ng đak noh lu seh bri klaih rơhing.

¹²Lu sem păr pơm tơpu oei tơ rok cheng glung noh. Hmoi asi tơ kơpal dơng 'long.

¹³Đơ̆ng anih kơjung Sư, Sư ruh đak tơ lu kông, 'Bĕnh kơ teh đei plei yua, lĕch đơ̆ng tơdrong jang Sư.

¹⁴Sư pơm ăn kơ 'nhĕt bluh ăn kơ lu sem brem. 'Long pơle wă yua kơ kon bơngai păng 'ba hơ'bo 'nhot sa chăt đơ̆ng teh.

¹⁵Sik hơmu tơmam pơhiôk jơhngơ̆m kon bơngai. Đak rơmă ôliwơ pơm ăn kơ muh măt hơdah hơdong, Por sŏng wă ăn kơ jơhngơ̆m kon bơngai pran.

¹⁶Lu tơm 'long Kră Yang đei ruh hơiuh đĭ-đăng 'long hơngo char Liban đêl Sư pơtăm.

¹⁷Tơ noh mă lu sem pơm tơpu; Gah klang kok sư yua 'long hơngo pơm anih sư oei.

¹⁸Tơ lu kông kơjung anih lu bơbe bri oei. Hơgơp tơmo anih kơ lu kơne bri ôn.

¹⁹Sư pơjing boih măt khei wă kơ tơdra bơyan. Măt 'năr băt dang yơ jơ sư mơ̆t.

²⁰Ih pơjing măng mu, noh jô̆ kơmăng; Kơplah noh đĭ lu sem bri lĕch;

²¹Lu dăm-brang mơlôh grĕnh chă sa, chă sa tơmam mă đơ̆ng Kră Yang 'Bok Kei-Dei ăn kơ lu sư.

²²Dah 'năr lĕch lu sư brŏk wih, 'bĭch ôn tơ lăm trôm anih lu sư.

²³Na kon bơngai, lĕch năm jang, Bơ̆jang dĭng truh kơ kơsơ̆.

²⁴Ơ Kră Yang, tơdrong jang Ih lơ tơpă. Hăm tơdrong gơh hơgei Ih pơjing tôm tơmam. Kơpal teh 'bĕnh-'bang kơ tơmam Ih.

²⁵To đak dơsĭ tih să pă băt. Lăm noh đei kon sem, ka tih iĕ pă kĕ jô̆.

²⁶Tơ noh duk, thŏng-nan brŏk năm; Lêwiathanb mă Kră Yang đei pơjing boih glơi hơnul tơ lăm noh.

²⁷Đĭ-đăng lu sem brem chang gô Ih ăn tơmam sa kơ lu sư kiơ̆ kơ lăp.

²⁸Layơ Ih ăn kơ lu sư, lu sư sơng iŏk, Ih bơlang tơpang ti, lu sư sa phĭ mah tơmam sa 'lơ̆ng.

²⁹Layơ Ih ôn muh măt, lu sư rŭng răng. Layơ Ih pơdrâu kial dui jơhngơ̆m. Lu sư lôch păng brŏk tơ 'mui teh.

³⁰Wă ih ăn Bơhngol đơ̆ng Ih, lu sư jing đei hloi. Ih pơm ming teh jing 'nao dơ̆ng.

³¹Hơpơi kơ tơdrong ư-ang Kră Yang oei oei ling-lang; Hơpơi kơ Kră Yang hiôk chơt kơ tơdrong jang Sư.

³²Sư lăng tơ teh teh pơpơ̆ hloi; Sư pel kông na kông lĕch 'nhui.

³³Đĭ chăl arih inh gô hơri bơnê kơ Kră Yang. Inh oei arih dang yơ, inh gô hơri bơnê kơ Kră Yang 'Bok Kei-Dei dang noh;

³⁴Ăn tơdrong inh tơchĕng 'lơ̆ng lăp đon Sư. Inh gô chơt hiôk lăm Kră Yang.

³⁵Ăn kơ lu bơngai yoch lôch hiong đĭ đơ̆ng teh đak. Păng lu bơngai pơm kơnê̆ pă đei dơ̆ng, Ơ bơhngol inh hơri bơnê bĕ kơ Kră Yang: Halêluya!