Read bahnar Horiso 107 Bible Online

Horiso 107 - bahnar bible

Horiso 107

¹Bơnê bĕ kơ Kră Yang, yua kơ Sư pơm 'lơ̆ng; Tơdrong 'mêm Sư oei oei ling-lang.

²Ăn kơ lu bơngai mă Kră Yang huai iŏk boih. Lu bơngai mă đei dŏng pơklaih đơ̆ng ti lu bơngai ayăt pơjuă, pơma bĕ thoi âu;

³Lu bơngai mă đei krao akŭm boih đơ̆ng jơ̆p kơ dêh char, Đơ̆ng gah hơlĕch, gah bơmơ̆t, đơ̆ng gah yă-nơ̆m gah gơal.

⁴Lu sư oei chă yak tơ lăm char 'blach. Yak trong bri brah chă trong wă mơ̆t oei tơ pơlei ưh kơ 'bôh,

⁵Lu sư pơngot păng ol kơ đak. Jơhngơ̆m lu sư rơmơ̆n pă kĕ.

⁶Kơplah đei tơdrong pơmat-tat lu sư krao apinh Kră Yang. Na Kră Yang pơklaih hloi lu sư đơ̆ng tơdrong pơmat-tat,

⁷Dui ba lu sư rok trong tơpăt. Lu sư năm truh tơ pơlei tih mă gơh oei.

⁸Ăn kơ lu sư bơnê bĕ kơ Kră Yang yua kơ tơdrong 'mêm Sư. Yua kơ tơdrong hlĭch chrơp Sư pơm boih kơ kon bơngai.

⁹Yua kơ Sư pơm kơ bơngai rơhing gơh hrăp. Ăn kơ bơngai pơngot, sa phĭ rơkah kơ tơmam sa 'lơ̆ng;

¹⁰Đei lu bơngai oei lăm măng mu păng yơ̆p tơdrong lôch. Đei lu bơnă pơmat-tat păng oei chô̆ hăm glang mam.

¹¹Yua kơ lu sư pơjah kơ nơ̆r Kră Yang 'Bok Kei-Dei păng sơngah kơ tơdrong Kră Yang Tih Hloh pơđâu.

¹²Yua kơ noh na Kră Yang ăn kơ lu sư jang gleh pơmat. Lu sư pơ̆k ưh kơ đei bu tơgŭm tơiung.

¹³Lăm năr pơmat-tat lu sư krao apinh Kră Yang na Kră Yang dŏng pơklaih lu sư đơ̆ng tơdrong pơmat-tat,

¹⁴Sư dui iŏk lu sư đơ̆ng lăm măng mu păng yơ̆p tơdrong lôch. Kŭm hrĕch lê̆ glang đêl chô̆ lu sư.

¹⁵Ăn kơ lu sư bơnê kơkuh kơ Kră Yang yua kơ tơdrong 'mêm Sư. Yua kơ tơdrong jang hlĭch chrơp Sư pơm boih kơ kon bơngai.

¹⁶Yua kơ Sư pơrăm boih 'măng jang bơsei. Sư chơ̆ng tơgơ̆ lê̆ boih lu dơhlông bơsei.

¹⁷Lu bơngai kơ hlôh đei tơdrong gleh yua kơ pơm tơdrong yoch păng tơdrong kơnê̆.

¹⁸Lu sư lăng areh dêh kơ lu tơmam sa. Lu sư năm tơ jê̆ 'măng jang tơdrong lôch.

¹⁹Lăm năr pơmat-tat lu sư krao apinh Kră Yang, Kră Yang dŏng pơklaih lu sư đơ̆ng tơdrong pơmat-tat.

²⁰Sư tơlĕch nơ̆r păng pơklaih jĭ lu sư, Sư dui hơtŏk lu sư đơ̆ng sơlŭng bơsat.

²¹Ăn kơ lu sư bơnê kơkuh kơ Kră Yang, Yua kơ tơdrong 'mêm Sư yua kơ tơdrong jang hlĭch chrơp Sư pơm boih kơ kon bơngai.

²²Ăn kơ sư pơyơ̆r tơmam soi bơnê iŏk 'bai hơri chơt hiôk na roi pơdah tơdrong jang Sư.

²³Đei lu bơngai jur hao thŏng-nan lăm đak dơsĭ. Păng bơ̆jang tơ lăm đak dơsĭ;

²⁴Lu sư 'bôh tơdrong jang Kră Yang. 'Bôh tơdrong jang hlĭch chrơp Sư tơ lăm đak jrŭ.

²⁵Nơ̆r Sư athei na đei hloi kial hơbŭt pơm kơ đak poh-yă tŏk.

²⁶Hơtŏk lu sư kơjung truh tơ plĕnh, đơ̆ng noh tơjur truh tơ jrŭ hloh. Jơhngơ̆m lu sư pơchah, yua kơ pơmat.

²⁷Lu sư mơngưt mơngat nhen thoi bơngai suai. Tơdrong hơgei lu sư hiong đĭ.

²⁸Lăm năr pơmat-tat lu sư krao apinh Kră Yang. Kră Yang dŏng pơklaih lu sư đơ̆ng tơdrong pơmat-tat.

²⁹Sư khă hơbŭt thĕng jing hơđơ̆ng. Păng đak poh-yă thĕng nhĕt.

³⁰Lu sư chơt hiôk yua kơ huay pă poh-yă boih. Kră Yang chông ba lu sư tơ anih mă lu sư hơpơi wă.

³¹Ăn kơ lu sư bơnê ư-ang kơ Kră Yang yua kơ tơdrong 'mêm Sư, Yua kơ tơdrong jang hlĭch chrơp Sư pơm boih kơ kon bơngai!

³²Ăn kơ lu sư pơư pơang kơ Kră Yang lăm năr kon pơlei akŭm. Păng bơnê kơ Sư tơ lăm lu Kră akŭm pơđâu.

³³Sư tơplih đak Krong jing char 'blach. Tu đak glung jing teh hrĕng kro.

³⁴Teh mơ̆r 'lơ̆ng jing teh 'băt 'boh, Yua kơ đei tơdrong kơnê̆ lăm lu kon pơlei oei tơ noh.

³⁵Sư pơm kơ char 'blach jing đak dơnâu. Teh hrĕng kro jing đak glung;

³⁶Sư ăn kơ lu bơngai pơngot oei tơ noh. Lê̆ lu sư pơjing pơlei tih wă oei.

³⁷Lu sư pơm mir rei adrĕch păng pơtăm tơm hơmu lăm mir chŭn tơm hơmu đei plei lơ.

³⁸Kră Yang 'Bok Kei-Dei ăn tơdrong pŭn hiôk kơ lu sư, lu kon pơlei rai hrôh. Sư ưh kơ đei ăn kơ kon sem dơrong lu sư hrŏ hiong,

³⁹Dah lu sư hrŏ jơhngơ̆m ơh klai. Yua kơ đe pơjuă pơđep, đei tơdrong pơmat-tat păng ơh sơ'ngon.

⁴⁰Sư tuh tơdrong đe areh kơ lu bơngai pơgơ̆r. Ăn kơ lu sư yak thông lăm char glă ưh kơ đei trong.

⁴¹Mă-lei Sư hơtŏk lu bơngai dơnuh hin klaih đơ̆ng tơdrong pơmat-tat. Ăn kơ hnam dơnŏ hrôh ngôh rai lơ thoi khŭl triu.

⁴²Lu bơngai tơpăt 'bôh păng chhôk hơnôk. Gah bơngai pơm kơnê̆ lu sư pơŏm 'bơ̆r.

⁴³Lu bơngai mă hlôh wao gơh hơgei 'blŏk kơ tơdrong 'nâu. Păng tơchĕng răk tơdrong 'mêm Kră Yang.