Read bahnar Horiso 108 Bible Online

Horiso 108 - bahnar bible

Horiso 108

¹Ơ Kră Yang 'Bok Kei-Dei, jơhngơ̆m inh kơjăp; Inh gô hơri, hơri bơnê hăm đĭ jơhngơ̆m

²Ơ brŏ dung hăm tĭng-nĭng hơđơ̆r bĕ. Inh gô râu pơgê hrôih hơđơ̆r.

³Ơ Kră Yang, inh gô bơnê kơ Ih, lăm lu kon pơlei pơla. Inh gô hơri ư-ang kơ Ih lăm lu dêh char.

⁴Yua kơ tơdrong 'mêm tih Ih kơjung hloh kơ plĕnh, Tơdrong 'lơ̆ng tơpăt Ih truh tơ hơmơ̆l.

⁵Ơ Kră Yang, ăn kơ anăn ih đe pơyom kơjung hloh kơ plĕnh; Ăn tơdrong ư-ang Ih tơ jơ̆p kơpal teh đak!

⁶Yua bĕ ti 'ma Ih dŏng pơklaih păng tơl tơwih nơ̆r lu nhôn. Wă kơ lu bơngai mă Ih 'mêm gơh klaih hlôi.

⁷Kră Yang 'Bok Kei-Dei khan đơ̆ng lăm anih rơgoh Sư: “Inh gô 'nă hal, klah song Sichem păng pơtŏ thŭng Sikôt.

⁸Gileat gah Inh, Manase kư̆m lei-lăi; Êphraim jơ̆ môk pĕng kơ̆l inh; Juđa jơ̆ 'long jra pơtao inh.

⁹Môap jơ̆ bơng Inh hum 'nhao. Inh dan chơkhŏ Inh tơ Eđôm, Inh gô jreo chơt hiôk jei tơ teh đak Philistin.”

¹⁰Bu gô ba inh tơ pơlei tih kơjăp? Bu gô chông ba inh truh tơ char Eđôm?

¹¹Ơ Kră Yang 'Bok Kei-Dei hăm trŏ kơ Ih jơ̆ Tơ'ngla mă achăng lê̆ lu nhôn? Ơ Kră Yang 'Bok Kei-Dei, Ih ưh pă đei năm tơblah hơdai hăm linh lu nhôn dơ̆ng.

¹²Apinh Ih tơgŭm lu nhôn, blah lu ayăt. Yua kơ tơdrong tơgŭm tơduă kon bơngai ưh kơ yua kiơ.

¹³Đơ̆ng Kră Yang 'Bok Kei-Dei na lu nhôn kĕ jei. Yua kơ Kră Yang gô pơjuă bơhlơ̆r lê̆ lu ayăt kơ lu nhôn.